Орталық Азияның сыртқы саяси ведомстволарымен Ауғанстандағы бейбітшілік процесі, өңірдің қауіпсіздігі мен экономикалық дамуы талқыланды

Нұр-Сұлтан, 2021 жылдың 7 шілдесі – Онлайн-форматта БҰҰ-ның Орталық Азия үшін превентивті дипломатия жөніндегі өңірлік орталығының басшысының қатысуымен Ауғанстан, Қазақстан, Қырғызстан, Тәжікстан, Түрікменстан және Өзбекстанның сыртқы саяси ведомстволары басшыларының отырысы өтті. Қазақстандық тарапты Қазақстан Республикасы Президентінің Ауғанстан бойынша арнайы өкілі Талғат Қалиев бастады.

Конференцияға қатысушылар Ауғанстандағы бейбітшілік пен экономикалық дамуды қамтамасыз етудің келешегін, саяси, сауда-экономикалық және транзиттік-көлік салалардағы өзара іс-қимылды дамыту мүмкіндіктерін, сондай-ақ НАТО мен АҚШ жетекшілік еткен халықаралық коалиция күштері шығарылғаннан кейін өңірдің қауіпсіздігі мен Ауғанстанның болашақ саяси құрылымы мәселелерін талқылады.

Т. Қалиев Ауғанстандағы бейбітшілік процесінің барлық тараптары арасында консенсус қалыптастыруға және оның Орталық Азиядағы экономикалық процестерге дәйекті интеграциялануына бағытталған халықаралық күш-жігерге қолдау білдірді.

Отырыс қорытындысы бойынша кездесуге қатысушылар Ауғаныстандағы жағдайды реттеу және тұрақтылықты қамтамасыз ету қажеттігін атап өтті. Бейбітшілік орнатуға, халықты біріктіруге, қоғамды демократияландыруға және Ауғанстанды өркендетуге бағытталған бейбітшілік процесін қолдау туралы Бірлескен мәлімдеме қабылданды.