Есірткі мәселесі қазіргі әлем бетпе-бет келіп отырған ең күрделі сын-қатерлердің бірі болып табылады. Нашақорлық тұрақтылық пен қауіпсіздікке нақты қауіп төндіріп, мемлекеттердің әлеуметтік-экономикалық және саяси дамуына кедергі келтіреді, сондай-ақ террористік және өзге де трансұлттық қылмыстық әрекеттерді қаржыландырудың негізгі көздерінің біріне айналуда.
Жаңа психоактивті заттар мен өзге де синтетикалық есірткілердің таралуы жаңа үрдіске айналып отыр.
Олар дәстүрлі есірткілерден (героин, апиын, марихуана, гашиш) «тұтынушыларды тартып алып», есірткі ахуалының дамуына және халықтың есірткіге тәуелділігінің артуына барған сайын көбірек ықпал етуде.
Ұлттық деңгейде есірткі қылмысына қарсы күрес
Есірткі қылмысына қарсы іс-қимыл саласындағы ҚР ішкі саясатының негізін «Есірткі құралдары, психотроптық заттар, олардың аналогтары мен прекурсорлары және олардың заңсыз айналымы мен теріс пайдаланылуына қарсы іс-қимыл шаралары туралы» ҚР Заңы құрайды. Сонымен қатар, есірткі бизнесімен және қылмыстық қызметтің өзге де түрлерімен күрес ҚР-ның 2020-2030 жылдарға арналған Сыртқы саясат тұжырымдамасының негізгі басымдықтарының бірі ретінде айқындалған.
Қазіргі заманғы есірткі қылмысының осы және өзге де сын-қатерлері мен қауіптеріне қарсы шаралар қабылдау ҚР-ның 2026-2028 жылдарға арналған нашақорлық пен есірткі саудасына қарсы күрес жөніндегі тиісті Кешенді жоспарында көзделген, сондай-ақ нашақорлықтың алдын алу және есірткі қылмысына қарсы іс-қимыл мәселелері бойынша Республикалық штаб құрылған.
Халықаралық деңгейдегі есірткіге қарсы ынтымақтастық
Қазақстан есірткілерді бақылаудың халықаралық жүйесіне белсенді түрде интеграцияланған және осы саладағы БҰҰ-ның барлық үш конвенциясын (1961, 1971, 1988 жылдар) ратификациялаған.
Қазақстан БҰҰ конвенцияларына мүше мемлекеттер конференцияларының жұмысына белсенді қатысады және 2025-2027 жылдарға арналған БҰҰ-ның Қылмыстың алдын алу және қылмыстық сот төрелігі жөніндегі комиссиясының (ҚАҚСТК) және 2026-2029 жылдарға арналған БҰҰ-ның Есірткі құралдары жөніндегі комиссиясының (ЕҚК) мүшесі болып табылады.