Қазақстан Елшісі Черногория Президенті Мило Джукановичке сенім грамоталарын тапсырды

Подгорица, 2022 ж. 16 желтоқсан – Қазақстанның Черногориядағы Елшісі ретінде Алтай Әбибуллаев Черногория Президенті Мило Джукановичке (Milo Đukanović) Сенім грамоталарын табыс етті. Президент сарайында өткен салтанатты шарада Қазақстан-Черногория қарым-қатынастарының казіргі ахуалы мен болашағы, сондай-ақ өзара ынтымақтастықты сапалы жаңа деңгейге көтерудің нақты көздері егжей-тегжей талқыланды.

Ұлттық төл мерекемізбен сай келген дипломатиялық рәсім барысында Президент Мило Джуканович барша Қазақстан Халқын Тәуелсіздік күнімен шынайы құттықтап, елімізге бейбітшілік одан әрі гүлдену мен өркендеу тіледі. Черногория Мемлекет басшысы Президент Қасым-Жомарт Тоқаевты қайта сайлануымен тағы да құттықтап, Қазақстанға жаңа белестер мен табыстар тіледі.

Сонымен қатар, Мило Джуканович Қазақстан Президенті бастамасымен жүзеге асып жатқан саяси және кешенді әлеуметтік-экономикалық реформаларға жоғары баға беріп, Қазақстан Черногорияның Eуразиялық кеңістігіндегі басты саяси және сауда-экономикалық әріптесі деп басып айтты.

Президенттің пайындауынша, Черногориядағы жыл сайын Қазақстан азаматтарының демалысы, жерлестерімізге қолайлы жағдай туғызып қауіпсіздіктерін одан әрі қамтамасыз ету қағидатты басымдық болып қала бермек. Подгорица 2023-2024 жылдары Қазақстан азаматтарына маусымды визасыз режимі мен тікелей рейстерді сақтау үшін барынша мүдделі.

Анықтама: 2022 ж. Черногорияға 24 мыңға жуық қазақстандық азамат барған.

 

ҚР Хорватия, Босния және

Герцеговина, Черногориядағы Елшілігі

2022 ж. 16 желтоқсан