Загребте қазақстандық реформалар талқыланды

Ү.ж. 10 наурызда Загреб қаласында Хорватияның экс-президенті Степан Месич, Достық қоғамының төрағасы Андрия Карафилипович, "Севдах" Босниялық мәдени қоғамының басшысы Ферид Диздаревич, Задар кәсіпкер-меценат Петар Швельо және басқа да қоғам қайраткерлері, сондай-ақ Хорватияда аккредиттелген дипломаттардың қатысуымен Қазақстанның бейресми Достар клубының жиналысы өтті.

Елші Төлежан Барлыбаев кездесуге қатысушыларды Мемлекет басшысының ү.ж. 16 наурызда Парламентте ұсынатын жаңартылған бағдарламасы ауқымды реформаларды ілгерілету бойынша ҚР басшылығының күш-жігері туралы хабардар етті. ҚР Президенті жанындағы Жоғары Кеңестің реформалар бойынша отырысының қорытындыларын түсіндіруге ерекше назар аударылды. Салық саясатын оңтайландыру, Қазақстан экономикасының басым секторларында инвесторларға преференциялар мен субсидиялар беру жөніндегі шараларды қамтитын Қазақстанның инвестициялық саясатының жаңа тұжырымдамасының маңыздылығы атап өтілді.

Украина дағдарысы аясында Қазақстанның халықаралық жумысын жария ете отырып, Елші Қазақстан Президентінің Украина, Ресей және Германия көшбасшыларымен телефон арқылы сөйлесуінің қорытындылары, Ақорданың украин халқына гуманитарлық көмек пен дәрі-дәрмек беру туралы шешімі, сондай-ақ ҚР СІМ-нің Қазақстан азаматтарын эвакуациялау жөніндегі шаралары туралы айтты. Кездесуге қатысушылар дағдарысты бейбіт жолмен реттеуге, сондай-ақ Балқан мен посткеңестік аумағындағы қақтығыстар сабақтарын ескере отырып, еуропалық қауіпсіздіктің жаңа архитектурасын әзірлеуге қолдау білдірді.

ХР экс-Президенті С.Месич Қазақстан реформаларының бағытын жоғары бағалап, Президент Қ.Тоқаев бастамашы болған Қазақстанды қайта құру және саяси жаңғырту пакетінің іске асырылуы жаһандық геосаяси сілкіністер мен сыртқы сын-қатерлерге барабар жауап болатынын атап өтті. Ол ҚР басшылығының ұлттық қауіпсіздік пен құқық тәртібін қорғауды қамтамасыз ету жөніндегі тиімді шараларын, сондай-ақ Ақорданың сот жүйесін реформалау, заң үстемдігі мен адам құқықтарын қамтамасыз ету жөніндегі күш-жігерін атап өтті.

Достық қоғамының төрағасы А.Карафилипович, Босниялық қоғамдастықтың басшысы Ф.Диздаревич және хорват кәсіпкері П.Швельо қаңтар айындағы оқиғалар барысындағы батыл шаралардың арқасында Қазақстан инвестициялық тартымдылық пен сыртқы сауда айналымының өсуін қамтамасыз ете отырып, шетелдік серіктестердің сенімін сақтап қалғанын атап өтті. 2021 жылдың қорытындысы бойынша Қазақстан мен Хорватия арасындағы тауар айналымы екі еседен астам өсіп, 680 млн. АҚШ долларын құрағаны атап өтілді, бұл екі ел арасындағы дипломатиялық қатынастар орнатылған сәттен бастап өзара саудадағы ең жоғары көрсеткіш.

Кездесу соңында Елші Қазақстан Достары бейресми клубының мүшелеріне ҚР мен Хорватия арасындағы достық пен ынтымақтастықты нығайтуға қосқан үлесі үшін "ҚР Тәуелсіздігінің 30 жылдығы" мерейтойлық медальдарын табыс етті.

ҚР Хорватиядағы Елшілігінің баспасөз қызметі