Қазақстан Орталық сайлау комиссиясының төрағасы алғаш рет Аустрия Парламенті депутаттарын сайлауына байқаушы ретінде қатысты

Вена, 2024 жылғы 28-30 қыркүйек – Қазақстан Республикасы Орталық сайлау комиссиясының төрағасы Нұрлан Әбдіров Аустрия Парламентінің төменгі палатасы – Ұлттық кеңес депутаттарын сайлау барысын байқауға арналған халықаралық миссияға қатысты. Бұл маңызды оқиға сайлау құқығы мен демократиялық процестер саласында екі ел арасындағы халықаралық ынтымақтастықты нығайтудағы маңызды қадам болды.

Сапар барысында Қазақстан ОСК төрағасы бірқатар сайлау учаскелеріне барып, дауыс беру процесімен танысты, жергілікті сайлау комиссиясының мүшелерімен пікір алмасты және сайлаушылармен сөйлесіп, сайлау жүйесінің жұмысымен жан-жақты танысты.

Сонымен қатар, Нұрлан Әбдіров Сайлау мәселелері департаментінің басшысы Грегор Вендамен, Ұлттық кеңес депутаты доктор Харальд Трохпен және Аустрия Сыртқы істер министрлігі департаментінің директоры Елші Герхард Зайлермен кездесулер өткізіп, екі елдің сайлау органдары арасындағы кәсіби ынтымақтастықты одан әрі дамыту мәселелерін талқылады.

Қазақстан өкілінің Аустриядағы сайлауды бақылауға қатысуы екі ел арасындағы сайлау технологиялары мен сайлау процесінің ашықтығын қамтамасыз ету мәселелері бойынша екіжақты диалогтың маңыздылығы мен ашықтығын көрсетеді. Шетелдік елдердің, оның ішінде Аустрияның тәжірибесін зерделеу Қазақстанда жүзеге асырылатын демократиялық процестердің дамуына ықпал етіп, сайлау ашықтығы мен жариялылығының стандарттарын арттыруға септігін тигізеді.