Аустриямен жан-жақты ынтымақтастық Қазақстан Сыртқы істер министрі орынбасарының Венадағы сапарының назарында

Вена, 2024 жылғы 17 маусым – Венаға сапары барысында Қазақстан Республикасы Сыртқы істер министрінің орынбасары Әлібек Бақаев Аустрия Сыртқы істер министрлігінің Бас хатшысы Николаус Маршикпен кездесті. Әңгімелесушілер Қазақстан-Аустрия қарым-қатынастарын дамыту перспективаларын талқылап, жоғары және аса жоғары деңгейде өзара сапарларды ұйымдастырудың маңыздылығын ерекше атап өтті.

Талқылау барысында тараптар қазіргі халықаралық күн тәртібі, оның ішінде Украинадағы жағдай бойынша пікір алмасты. Ә. Бақаев аустриялық әріптесін Астананың ресей-украин қақтығыстарын бейбіт жолмен реттеуге деген ұмтылысын және сұралған жағдайда біздің еліміздің тиісті байланыстар үшін алаң беруге дайын екендігі туралы хабарлады. Ол сондай-ақ ағымдағы жылдың 4 шілдесінде Астанада өткен ШЫҰ саммитінің қорытындыларына кеңінен тоқталды.

Өз кезегінде Н. Маршик елдеріміз арасындағы ынтымақтастықтың келешегін жоғары бағалап, Қазақстанның халықаралық ұйымдардағы белсенді жұмысын және әлемдік мәселелерге теңгерімді көзқарасын атап өтті.

Сол күні қазақстандық дипломат Қазақстан Республикасы делегациясының басшысы ретінде кезекті Қазақстан-Аустрия консулдық консультацияларына қатысты. Аустрия делегациясын Аустрия Республикасы Сыртқы істер министрлігінің Консулдық мәселелер жөніндегі бөлімінің басшысы Г. Штильфрид басқарды. Кездесуге екі елдің ішкі істер министрліктерінің өкілдері қатысты.

Келіссөздер барысында консулдық саладағы екіжақты ынтымақтастықтың кең ауқымды мәселелері қаралды. Атап айтқанда, дипломатиялық паспорт иелерін визалық талаптардан босату және реадмиссия туралы үкіметаралық келісімдердің жобалары бойынша пікір алмасты. Тараптар сондай-ақ ҚР азаматтары үшін ЕО елдерінің визалық режимін жеңілдету мәселелерін талқылады. Осы тұрғыда қазақстандық делегация Қазақстан мен Еуропалық Одақ арасындағы ресми келіссөздерді бастауда Аустрияның қолдауына сенуде.

Сонымен қатар, екі ел арасындағы көші-қон және адам саудасымен күрес саласындағы ынтымақтастықтың келешегі талқыланды.

Кездесу соңында тараптар консулдық саладағы ынтымақтастықты одан әрі нығайтуға дайын екендіктерін білдірді.