Ғылым, білім, мәдени-гуманитарлық, сондай-ақ медицина салаларындағы өзара іс-қимыл Қазақстан мен Ватикан арасындағы ынтымақтастықтың басым бағыттарының бірі болып табылады. Бұл салаларда екі ел арасында бірқатар екіжақты меморандумдар бар.
2024 жылғы қараша мен желтоқсанда қазақстандық ғылыми делегация Ватиканға барып, Апостолдық архив пен Ватикан кітапханасының сирек қолжазбалары мен басқа да тарихи құжаттарын зерттеді. Құнды қолжазбаларды зерттеу қазақ ғалымдарына түркі әлемі мен Қазақстанның бай тарихын тереңірек зерттеуге бірегей мүмкіндік береді. Бұл ынтымақтастық Қазақстан Президенті Қ.Тоқаев пен Қасиетті Тақ басшылығы арасындағы тікелей келісімдердің арқасында қол жеткізілді.
Ынтымақтастықтың тағы бір маңызды бағыты – медицина саласындағы ынтымақтастық. «University Medical Center» қазақстандық корпоративтік қоры мен Ватиканның «Bambino Gesù» педиатриялық ауруханасы арасындағы Меморандумды іс жүзінде жүзеге асыру бойынша бірлескен күш-жігер жұмсалуда. Тараптар генетика, балалардың орфан аурулары, эпилепсия және т.б. салаларда ынтымақтастықты дамытуға ниетті.