Токио, 2026 жылғы 19 қазан - Транскаспий халықаралық көлік бағытын (бұдан әрі — ТХКБ) дамыту және Токио мен Алматы арасында тікелей әуе рейсін ашу арқылы Жапонияның Орталық Азиямен және Кавказбен көліктік байланысын нығайтуға арналған конференция Токиода өтті. Жапондық инвестицияларды ТХКБ инфрақұрылымына тартуға бағытталған іс-шараға Жапонияның тиісті министрліктерінің, JICA агенттігінің, ROTOBO қауымдастығының және логистикалық бизнес өкілдері кіретін 100-ге жуық тұлға қатысты.
Қазақстан Елшісі Ерлан Баударбек-Қожатаев және Әзербайжан Елшісі Фарид Талыбов логистикалық тізбектердің тиімділігін арттыруға және халықаралық көліктік ынтымақтастықты кеңейтуге бағытталған өз елдерінің көлік жүйелерін дамыту стратегияларын таныстырды. Өз баяндамасында Е.Баударбек-Қожатаев ағымдағы жылғы 15 қазанда Бакуде Президенттер Қ.Тоқаев пен И.Әлиевтің қатысуымен халықаралық деректер алмасу мүмкіндіктерін кеңейтуге және цифрлық коммуникациялардың тұрақтылығын арттыруға арналған. Транскаспий талшықты-оптикалық байланыс желісінің ресми түрде пайдалануға берілгенін атап өтті.
Жапония Экономика, сауда және индустрия мемлекеттік министрі Кей Такаги халықаралық көлік-логистикалық бағыттарды әртараптандыру тұрғысынан Токио үшін ТХКБ-ның стратегиялық маңызы зор екенін мәлімдеді. Ол Орталық дәлізді дамыту Жапонияның Орталық Азия мен Кавказ елдерімен сауда-экономикалық іс-қимылын нығайтуға қосымша мүмкіндіктер ашатынына тоқтады.
Жапония Жер, инфрақұрылым, көлік және туризм министрлігі Халықаралық логистикалық кеңсесінің директоры Миеко Коянаги қатысушыларды жапондық компаниялардың Орталық дәліз арқылы жүргізген сынақ тасымалдарының қорытындысымен таныстырды. Бұл тасымалдар бағыттың негізгі параметрлерін, соның ішінде жеткізу мерзімі мен құнын, кедендік рәсімдерден өту ерекшеліктерін және көлік-логистикалық қызмет көрсету сапасын талдауға мүмкіндік берді. Ақтау портындағы кедендік әкімшілендірудің тиімділігін арттыруға Жапонияның жәрдемдесуіне ерекше назар аударылды. Құны 719 миллион иенге дейін жететін жоба жүкті тексеру уақытын үш есе қысқартуға мүмкіндік беретін портты стационарлық ірі габаритті рентген кешенімен жабдықтауды қарастырады.
Іс-шара аясында Air Astana авиакомпаниясының Корея Республикасы мен Жапония бойынша Өңірлік аға менеджері Адель Даулатбек ағымдағы жылғы желтоқсанда іске қосылатын Алматы мен Токио (Нарита әуежайы) арасындағы тұрақты тікелей рейстерге байланысты көліктік қатынасты нығайту перспективалары туралы ақпаратты ұсынды.
Токио, 2026 жылғы 8 қазан – Қазақстан Республикасының Жапониядағы Елшісі Ерлан Баударбек-Қожатаев Жапонияның шетелдік инвестициялар институтының Президенті Кеничиро Хаяшимен кездесу өткізді.
Қазақстандық дипломат сұхбаттасушыны Қазақстан Республикасының 2030 жылға дейінгі инвестициялық саясат тұжырымдамасының негізгі баптарымен таныстырып, салықтық преференцияларға, субсидияларға және шетелдік инвесторлардың құқықтарын қорғаудың мемлекеттік кепілдіктеріне ерекше назар аударды. Сонымен қатар, инвестициялық рәсімдерді барынша жеңілдету үшін «бір терезе» қағидаты бойынша жұмыс істейтін Ұлттық цифрлық инвестициялық платформа сұхбаттасушыны назарына ұсынылды.
Сонымен қатар, тараптар жапон компанияларының Қазақстандағы қазіргі қызметі мен олардың жұмыс жасау ауқымын кеңейту перспективаларын талқылады. Кездесу барысында цифрлық инфрақұрылым, маңызды пайдалы қазбалар, көлік, логистика және агроөнеркәсіптік кешен өнімдерін терең өңдеу сияқты басым салалардағы инвестициялық жобаларды жүзеге асыру мүмкіндіктері қарастырылды.
Осыған байланысты, Елші Қазақстанда өндірістерді оқшаулау (локализациялау) және Жапониядан жоғары технологиялар трансферін жүзеге асыру үшін перспективалы бағыттарды бірлесе іздестіруді ұсынды. Өз кезегінде, Кеничиро Хаяши Қазақстан Республикасының инвестициялық мүмкіндіктерін тереңірек талдауға жәрдемдесуге және жапондық инвесторларға ақпараттық қолдау көрсетуге дайын екенін білдірді.
Кездесу барысында негізгі тақырыбы «Тұрақтылықтан өсуге: Қазақстанның жаңа инвестициялық циклі» деп аталатын KGIR-2026 Қазақстандық жаһандық инвестициялар жөніндегі дөңгелек үстеліне ерекше назар аударылды. Елші Ерлан Баударбек-Қожатаев жапондық шетелдік инвестициялар институтына мүше компанияларды аталған іс-шараға қатысуға шақырып, бұл форум нақты жобаларды таныстыру, сондай-ақ қазақстандық бизнеспен және мемлекеттік даму институттарымен тікелей байланыс орнату үшін тиімді алаң екенін атап өтті.
Анықтама үшін: Жапонияның шетелдік инвестициялар институты жапон компанияларының халықаралық нарықтарға шығуын ілгерілету және Жапония мен басқа елдер арасындағы экономикалық ынтымақтастықты нығайту мақсатында 1991 жылы құрылған. Ұйым өнеркәсіптік корпорацияларды, сауда үйлерін, қаржы институттары мен заң фирмаларын біріктіреді. Оның құрамына JBIC, JOIN, JICT сияқты мемлекеттік қолдау институттары, сондай-ақ Mitsubishi, Mitsui & Co., Sumitomo және ITOCHU сынды ірі корпорациялар кіреді.
Токио, 2026 жылғы 1 қазан – Елші Ерлан Баударбек-Қожатаев Жапонияның Либералды-демократиялық партиясының (ЛДП) Бас хатшысы Шюничи Судзукимен кездесу өткізді.
Қазақстандық дипломат сұхбаттасушыны бір палаталы Құрылтай қызметінің негізгі басымдықтарымен, соның ішінде заңнамалық үдерісті жетілдіру және атқарушы билікке парламенттік бақылауды күшейту шараларымен таныстырды. Жапон саясаткері сондай-ақ екіжақты ынтымақтастықтың ағымдағы күн тәртібі және ҚР Президенті Қ.Тоқаевтың 2025 жылғы желтоқсанда Жапонияға жасаған сапарының қорытындысы бойынша қол жеткізілген уағдаластықтардың іске асырылу барысы туралы ақпарат алды.
Өз тарапынан Ш.Судзуки «Әділет» партиясының басшысы, ҚР Құрылтайының Төрағасы Айбек Дәдебайдың атына партияның ағымдағы жылғы 23 тамызда өткен сайлаудағы жеңісімен құттықтау хатын табыс етті. Жолдауда жапон тарапы Құрылтай сайлауындағы сайлаушылардың жоғары белсенділігі елде жүріп жатқан институционалдық өзгерістерге деген үлкен қызығушылықты айғақтайтынын және қазақстандық қоғамның жоғары үмітін көрсететінін атап өтті.
Ш.Судзуки Жапонияда Қазақстанда жүргізіліп жатқан реформаларды мұқият қадағалап отырғанын мәлімдеп, «Әділет» партиясы мен Жапонияның жетекші саяси күші ретіндегі Либералды-демократиялық партия арасында партиялық диалогты жолға қоюға дайын екенін растады. Оның айтуынша, Токио әлемдегі сақталып отырған экономикалық турбуленттілік жағдайында Қазақстанды энергетикалық қауіпсіздікті қамтамасыз ету саласындағы маңызды серіктес ретінде қарастырады.
Анықтама: Премьер-министр Санаэ Такаичи төрағалық ететін Жапонияның Либералды-демократиялық партиясы елдің екі палаталы Парламентінде 400-ден астам орынға ие. ЛДП иерархиясында Бас хатшы партиядағы екінші тұлға және оның ішкі ұйымдастыруын, қаржысын және партиялық тәртібін басқаратын негізгі қайраткер болып табылады.
Токио, 2026 жылғы 24 қыркүйек – Қазақстан Республикасының Жапониядағы Елшісі Ерлан Баударбек-Қожатаев «Kawasaki Heavy Industries» директорлар кеңесінің Төрағасы және «ROTOBO» Жапон бизнес-қауымдастығының Төрағасы Ёшинори Канэханамен кездесті.
Тараптар 2026 жылғы желтоқсанда Астанада өткізілуі жоспарланған Экономикалық ынтымақтастық жөніндегі Қазақстан мен Жапонияның үкіметтік және жеке секторлары бірлескен комиссиясының алдағы 9-шы отырысының күн тәртібін талқылады. Іс-шараға энергетика, машина жасау, көлік, логистика, тау-кен өнеркәсібі, құрылыс және қаржы секторы сияқты түйінді салалардың атынан ірі жапон бизнесінің 150-ге жуық өкілі қатысады деп күтілуде.
Бұл шара жасанды интеллект пен цифрлық технологияларды дамытуға, «жасыл» трансформацияны ілгерілетуге, қаржы секторындағы ынтымақтастықты тереңдетуге, сондай-ақ жеткізу тізбегінің тұрақтылығын арттыруға баса назар аудара отырып, Жапония мен Қазақстан арасындағы стратегиялық экономикалық серіктестікті нығайтуға арналады. Жапон бизнесі өкілдерінің комиссия жұмысына қатысуын үйлестіруді Жапония-Қазақстан экономикалық комитетінің хатшылығы ретінде «ROTOBO» қауымдастығы жүзеге асырады.
Бірлескен комиссия отырысын өткізу ҚР Президенті Қасым-Жомарт Тоқаевтың 2025 жылғы желтоқсанда Жапонияға жасаған ресми сапарының қорытындысы бойынша қол жеткізілген уағдаластықтарды іске асыруға бағытталған.
Кездесу барысында Елші Е.Баударбек-Қожатаев қазақстандық тараптың «Kawasaki Heavy Industries» компаниясымен ұзақ мерзімді технологиялық серіктестікті нығайтуға, соның ішінде бірлескен жобаларды жүзеге асыруға және озық технологиялық шешімдерді жергіліктендіруге мүдделі екенін атап өтті. Қазақстан тарапы роботтандырылған жүйелерді, операцияларды басқарудың заманауи технологияларын және зияткерлік логистикалық шешімдерді енгізе отырып, автоматтандырылған қойма және фулфилмент кешендерін құру бойынша инвестициялық ұсыныстарды табыстады. Сонымен қатар, сутегі энергетикасы, өнеркәсіпті автоматтандыру, көлік-логистикалық және қалалық инфрақұрылымды дамыту салаларындағы, соның ішінде «Alatau City» технологиялық хабының флагмандық жобасы бойынша инвестициялық жобалар таныстырылды.
Өз кезегінде «Kawasaki Heavy Industries» директорлар кеңесінің төрағасы Ёшинори Канэхана концерннің Қазақстандағы жобаларды жүзеге асыруға қызығушылық танытатынын растап, мұнай-химия саласы мен энергетикалық машина жасауды өзара іс-қимылдың басым бағыттары ретінде атап өтті. Бұдан бөлек, жапон корпорациясының басшысы әлемдік нарықтардағы құбылмалылық жағдайында Қазақстан жапон бизнесі үшін аса маңызды минералдардың стратегиялық тұрғыдан маңызды әрі сенімді жеткізушісі ретінде қарастырылатынын баса айтты.
Анықтама: «Kawasaki Heavy Industries» – энергетика, көлік, авиация және ғарыш техникасы, кеме жасау, өнеркәсіптік жабдықтар, робототехника және инфрақұрылым салаларында жұмыс істейтін ірі жапондық өнеркәсіптік-инжинирингтік корпорация. Сұйытылған сутегі саласындағы әлемдік технологиялық көшбасшылардың бірі бола отырып, «Kawasaki Heavy Industries» оны теңіз арқылы тасымалдауға арналған әлемдегі алғашқы кемені («Suiso Frontier») жобалап салды, сондай-ақ сұйытылған сутегін қабылдайтын әлемдегі тұңғыш мамандандырылған терминалды іске қосты.
«ROTOBO» Жапон бизнес-қауымдастығы Жапонияның Еуразия елдерімен сауда-инвестициялық байланыстарын дамытуға ықпал ететін негізгі институт болып табылады. Ұйым бизнеске кешенді ақпараттық және практикалық қолдау көрсетеді, талдау зерттеулерін жүргізеді, іскерлік миссиялар мен форумдар ұйымдастырады, сондай-ақ Қазақстан мен Жапонияның екіжақты экономикалық комитетінің хатшылығы қызметін атқарады.
Токио, 2026 жылғы 11 қыркүйек – Елші Ерлан Баударбек-Қожатаев Жапонияның Қарусыздану, ғылым және технологиялар орталығының (CDAST) Директоры Нобумаса Акиямамен кездесу өткізді.
Н. Акияма ядролық қарудан азат әлем құруға ықпал ету мақсатында екі ел арасындағы практикалық ынтымақтастықты нығайтудың маңыздылығын атап өтті. Осыған байланысты Орталықтың ядролық қарусыздану және таратпау мәселелеріне арналған жыл сайынғы Хирошима баяндамасын (Hiroshima Report) дайындауға белсенді қатысатынына назар аударды. Бұл тұрғыда Қазақстан дәстүрлі түрде жапондық рейтингте ядролық қауіпсіздіктің негізгі аспектілері бойынша жоғары орындарға ие болып келеді.
Елші Е. Баударбек-Қожатаев ағымдағы жылы атап өтілетін мерейтойлық даталардың – Семей ядролық сынақ полигоны жабылуының 35 жылдығының және Орталық Азияда ядролық қарудан азат аймақ туралы шарттың 20 жылдығының ерекше маңыздылығын атап өтті. Жапон тарапына Орталық Азия елдері Сыртқы істер министрлерінің, сондай-ақ ҚР Сыртқы істер министрі мен Ядролық сынақтарға жаппай тыйым салу туралы шарт ұйымының (ЯСЖТШҰ) Атқарушы хатшысының тиісті мәлімдемелері таныстырылды.
ҚР Президенті Қ. Тоқаевтың Халықаралық биологиялық қауіпсіздік агенттігін (БҚХА) құру жөніндегі бастамасын талқылау барысында Н. Акияма халықаралық қауіпсіздік архитектурасын нығайтуға және биологиялық сын-қатерлерге, оның ішінде жаңа пандемияларға қарсы іс-қимыл тетіктерін жетілдіруге бағытталған ұжымдық күш-жігердің маңыздылығына тоқталды.
Сонымен қатар тараптар қарусыздану, таратпау, халықаралық гуманитарлық құқық, жасанды интеллектті жауапкершілікпен пайдалану және атом энергиясын бейбіт мақсатта пайдалану салаларындағы екіжақты және түрлі халықаралық ұйымдар шеңберіндегі өзара іс-қимылдың перспективалық бағыттарын талқылады.
Тараптар Хирошима, Нагасаки және Семей қалалары арасындағы қалыптасқан байланыстардың маңыздылығына назар аударып, ядролық сынақтардың адамдар мен қоршаған ортаға әсер ету салдарымен айналысатын екі елдің ғылыми-зерттеу орталықтары мен қоғамдық ұйымдары арасындағы алмасуларды кеңейту қажеттілігімен келісті.
Анықтама үшін: Жапонияның Қарусыздану, ғылым және технологиялар орталығы (CDAST) 1996 жылы құрылған. Орталық қарусыздану, таратпау және жаһандық қауіпсіздік салаларында зерттеулер жүргізеді, Ядролық сынақтарға жаппай тыйым салу туралы шартты (ЯСЖТШ) іске асыру тетіктерін әзірлеуге жәрдемдеседі, кәсіби кадрлар даярлауды және халықаралық алмасу бағдарламаларын іске асырады.
Токио, 2026 жылғы 8 қыркүйек – Қазақстан Республикасының Жапониядағы Елшілігінде қазақстандық «Shin-Line» компаниясы мен азық-түлік өнімдерін өндіру және мейрамхана кәсіпкерлігін дамытумен айналысатын жапондық «Shigemitsu Industry» компаниясы арасында бірлескен кәсіпорын құру туралы келісімге қол қою рәсімі өтті.
Қазақстан тарапынан құжатқа «Shin-Line» компаниясының директорлар кеңесінің төрағасы Андрей Шин, ал жапон тарапынан «Shigemitsu Industry» президенті Кацуаки Шигэмицу қол қойды.
Аталған альянс Жапонияның танымал AJISEN RAMEN брендін Қазақстанда дамытуға және кейіннен оны өңір елдерінің нарықтарына шығаруға бағытталған. Ынтымақтастықтың негізгі бағыты «Shigemitsu Industry» өнімдерінің өндірісін жапондық озық технологиялары мен өндірістік стандарттарын, сондай-ақ Халал талаптарын ескере отырып, ҚР-да кезең-кезеңімен жергіліктендіру болады. Бірінші кезеңде Алматы облысының Байсерке ауылындағы «Shin-Line» кәсіпорнының аумағында орталықтандырылған өндірістік база құру және Алматы қаласында брендтің алғашқы флагмандық мейрамханасын ашу көзделген.
Қол қою рәсімі барысында Елші Ерлан Баударбек-Қожатаев жобаның шикізаттық емес секторлардағы Қазақстан-Жапония экономикалық ынтымақтастығын кеңейтудің практикалық нәтижесі болып табылатынын атап өтті. Оның пікірінше, кәсіпорынның іске қосылуы жапон технологиялары мен басқару тәжірибесін тартуға, тамақ өнеркәсібін дамытуға және жаңа жұмыс орындарын ашуға ықпал етеді.
Тараптар желіні Орталық Азия елдерінде дамытуды жоспарлап, кейіннен сондай-ақ ЕАЭО, Кавказ және Шығыс Еуропа нарықтарына шығу мүмкіндігін қарастыруда. Өндірісті Қазақстанда жергіліктендіру ішкі нарықты, сондай-ақ көршілес мемлекеттердегі желінің әлеуетті нысандарын өніммен қамтамасыз етуге мүмкіндік береді.
Жапон тарапы үшін бұл жоба брендті Орталық Азия өңірінде ілгерілетуге және Қазақстанды негізгі өндірістік әрі логистикалық платформа ретінде пайдалануға кең мүмкіндіктер ашады.
Анықтама үшін: «Shigemitsu Industry» компаниясының тарихы 1968 жылдан бастау алады және азық-түлік өнімдерін өндіру мен мейрамхана кәсіпкерлігі саласында көпжылдық тәжірибеге ие. Компания халықаралық франчайзингпен, азық-түлік өнімдерін өндірумен, кадрлар даярлаумен және жаңа өнімдерді әзірлеумен айналысады.
Токио, 2026 жылғы 7 қыркүйек – Елші Ерлан Баударбек-Қожатаев Коносукэ Мацусита атындағы Саяси басқару және менеджмент институтының (Matsushita Institute of Government and Management) Директоры Кенджи Одзэкимен кездесу өткізді.
К. Одзэки 1979 жылы көрнекті жапон кәсіпкері, «Panasonic» корпорациясының негізін қалаушы К. Мацусита құрған Институттың мемлекеттік қызмет, саясат, бизнес және қоғамдық сектор үшін болашақ көшбасшыларды даярлауға және кадрлық әлеуетті қалыптастыруға маманданатынын атап өтті. Институттың танымал түлектерінің қатарында Жапонияның қазіргі Премьер-министрі және билік басындағы Либералдық-демократиялық партиясының төрайымы Санаэ Такаичи бар екені ерекше атап өтілді.
Кездесу барысында тараптар Қазақстан мен Жапония арасындағы академиялық, зияткерлік және сараптамалық алмасуларды, оның ішінде мемлекеттік саясат және халықаралық қатынастар мәселелері бойынша өзара іс-қимылды дамыту перспективаларын талқылады. Мұндай байланыстардың екі ел арасындағы кеңейтілген стратегиялық әріптестікті одан әрі нығайтудағы маңызды рөлі атап өтілді.
Өз кезегінде, Елші Институт басшылығын Қазақстанда жүргізіліп жатқан саяси және әлеуметтік-экономикалық реформалардың негізгі нәтижелермен таныстырып, елдің өзекті жаһандық мәселелер бойынша халықаралық ынтымақтастықты ілгерілетудегі рөлі туралы айтып берді. Қазақстанның халықаралық күн тәртібіндегі мәселелер бойынша диалог жүргізу және өзара қолайлы шешімдер іздеу алаңы бола алатын «орта держава» ретіндегі бастамаларына ерекше назар аударылды.
К.Одзэки Институттың Қазақстанмен өзара іс-қимылды кеңейтуге мүдделі екенін білдірді. Атап айтқанда, Институт басшылығы мен тыңдаушылары 2026 жылғы қарашада Қазақстанда жүргізіліп жатқан реформалардың барысы мен нәтижелерімен танысу, сондай-ақ екіжақты байланыстарды одан әрі дамыту мүмкіндіктерін зерделеу мақсатында Қазақстанның түрлі өңірлеріне баруды жоспарлап отыр. Сапар аясында Қазақстанның мемлекеттік органдарының, бизнес, академиялық орта және қоғамдық ұйымдар өкілдерімен кездесулер өткізу жоспарлануда.
Кездесу қорытындысы бойынша тараптар Қазақстанға алдағы сапарға дайындық аясында Елшінің Институт оқытушылары мен тыңдаушыларына арнайы дәріс өткізуі туралы уағдаласты.
Анықтама үшін: Саяси басқару және менеджмент институты дәстүрлі жоғары оқу орындарынан ерекшеленеді. Оның қызметінде талантты жапон жастарын мұқият іріктеуге және олардың мемлекеттік және өңірлік басқару, әлеуметтік саясат пен бизнес сияқты бағыттардағы практикалық дағдылары мен білімін дамытуға негізгі басымдық беріледі. Институт түлектерінің қатарында Үкімет мүшелері, Парламент депутаттары, қоғам қайраткерлері, өңірлер мен ірі компаниялардың басшылары бар.
Токио, 2026 жылғы 2 қыркүйек – Елші Ерлан Баударбек-Қожатаев Жапония Парламентінің гуманитарлық дипломатия жөніндегі тобының Төрағасы, бұрынғы Премьер-министр Шигэру Ишибамен келіссөздер жүргізді.
Кездесу барысында Ш.Ишиба Премьер-министр қызметінде болған кезеңде Қазақстан мен Жапония арасындағы байланыстарды нығайтуға ерекше көңіл бөлгенін атап өтті. Осы тұрғыда ол өткен жылы ҚР Президенті Қасым-Жомарт Тоқаевтың атына жіберген жолдауында екіжақты ынтымақтастықты және «Орталық Азия+Жапония» Диалогы аясындағы өзара іс-қимылды дамыту жөніндегі көзқарасын баяндағанын жеткізді.
Тараптар ҚР Президентінің 2025 жылғы желтоқсанда Токиоға жасаған алғашқы ресми сапары және «Орталық Азия + Жапония» алғашқы саммитіне қатысу қорытындысы бойынша жоғары деңгейде қол жеткізілген уағдаластықтарды іске асыру барысын талқылады. Саяси және парламентаралық байланыстарды одан әрі дамыту, сондай-ақ экономикалық ынтымақтастықтың жаңа перспективалы бағыттарын игерудің маңыздылығы атап өтілді.
Келіссөздердің бір бөлігі халықаралық қауіпсіздік, орнықты даму және заң үстемдігі мәселелеріне арналды. Ш.Ишиба Қазақстанның ядролық қарусыздану және ядролық қаруды таратпау мәселелеріндегі дәйекті ұстанымын жоғары бағалап, жаһандық қауіпсіздікті нығайтудағы еліміздің маңызды рөлін атап өтті.
Климаттың өзгеруі, табиғи апаттарды алдын алу және олардың тәуекелдерін азайту, су қауіпсіздігі, туризм, мәдениет және гуманитарлық алмасулар салаларындағы өзара іс-қимылды кеңейтудің елеулі әлеуеті бар екені айтылды. Ш.Ишиба Қазақстан үшін экологиялық және су проблемаларына ерекше назар аударып, Арал теңізінің, сондай-ақ Қазақстанның мұздықтарының қазіргі жағдайына қызығушылық танытты. Өз кезегінде Елші Қазақстан Республикасы Президентінің «жасыл» бастамалары, оның ішінде Халықаралық су ұйымын құру туралы ұсынысы жөнінде баяндады.
Сонымен қатар, кездесу барысында Елші Қазақстан Республикасының Құрылтайына сайлау қорытындылары және елімізде жүргізіліп жатқан саяси реформалар туралы сұхбаттасын егжей-тегжейлі хабардар етті.
Токио, 2026 жылғы 31 шілде - Елші Ерлан Баударбек-Қожатаев Жапон су форумының Бас хатшысы Ютака Хосомимен кездесу өткізіп, жаһандық су күн тәртібіндегі өзекті мәселелерді талқылады.
Е.Баударбек-Қожатаев ҚР Президенті Қасым-Жомарт Тоқаевтың Біріккен Ұлттар Ұйымының аясында Халықаралық су ұйымын құру жөніндегі бастамасы туралы ақпарат берді.
Тараптар жаһандық су ресурстарын басқару тиімділігін арттыруға, қолданыстағы халықаралық тетіктер арасындағы үйлестіруді күшейтуге, сондай-ақ инклюзивті диалог пен бірлескен шешімдер әзірлеу үшін ашық алаң қалыптастыруға бағытталған жаңа халықаралық платформаның функциялары жөнінде пікір алмасты.
Ю.Хосоми Қазақстанның су дипломатиясы саласындағы бастамаларын жоғары бағалап, олардың уақтылығы, өзектілігі мен халықаралық маңызы зор екенін атап өтті. Оның айтуынша, қазіргі заманғы су мәселелері кешенді тәсілді талап етеді, өйткені олар климаттың өзгеруі, тұрақты экономикалық даму және халықаралық қауіпсіздік мәселелерімен тығыз байланысты.
Сондай-ақ ол жапон тарапының су күн тәртібі аясында Қазақстанмен ынтымақтастықты одан әрі кеңейтуге мүдделі екенін білдірді. Атап айтқанда, су ресурстарын басқару, су қауіпсіздігін нығайту, сондай-ақ Қазақстан мен Жапонияның қоғамдық ұйымдары мен ғылыми-зерттеу орталықтары арасындағы өзара іс-қимылды дамыту бағыттарындағы ынтымақтастық мәселелеріне ерекше назар аударылды.
Кездесу Жапония Үкіметі ұйымдастырған су ресурстары саласындағы халықаралық ынтымақтастық мәселелерін талқылауға және жаһандық су сын-қатерлерін шешу жолдарын іздеуге арналған іс-шаралар топтамасы – «Жапон су апталығы» (Japan Water Week) аясында өтті. «Thinking Future of Water» тақырыбындағы халықаралық симпозиум барысында Е.Баударбек-Қожатаев халықаралық ұйымдардың басшылары мен саяси лауазымды тұлғаларға, оның ішінде Азия даму банкінің Президенті Масато Кандаға, БҰҰ Су ресурстары жөніндегі конференциясындағы Жапония Премьер-министрінің Арнайы өкілі Ёко Камикаваға, Жапонияның Жер, инфрақұрылым, көлік және туризм министрі Ясуши Канэкоға және Мысырдың Су ресурстары және ирригация министрі Хани Севиламға Орталық Азиядағы су сын-қатерлері және Қазақстанның өңірдегі су проблемаларын шешуге бағытталған бастамалары туралы ақпарат ұсынды.
Анықтама: Жапон су форумы су саясаты, су ресурстарын басқару және тұрақты даму салаларында жұмыс істейтін 100-ге жуық жетекші жапон ұйымдарын біріктіреді. Форум Азия-Тынық мұхиты су форумының және Азия-Тынық мұхиты су саммитінің хатшылығы қызметін атқарады.
УВАЖАЕМЫЕ СООТЕЧЕСТВЕННИКИ!
23 августа 2026 года (с 07:00 до 20:00 по времени Токио) на избирательном участке №425 при Посольстве Республики Казахстан в Японии состоятся выборы в Курултай Республики Казахстан.
Если вы являетесь гражданином Республики Казахстан, достигли 18-летнего возраста на день голосования и обладаете активным избирательным правом, вы имеете право принять участие на выборах.
Для включения в список избирателей гражданам Республики Казахстан, временно или постоянно проживающим на территории Японии и имеющим действительный паспорт гражданина Республики Казахстан, необходимо заранее направить следующие данные:
ФИО, ИИН, дату рождения, адрес проживания в Японии, контактный номер телефона и адрес электронной почты - на электронный адрес k.beisenov@mfa.kz с пометкой «Выборы в Курултай».
Дополнительная информация: +81335891826