Бас консул Самарқанд Мемлекеттік университетінің ректорымен кездесті

2025 жылғы 23 қаңтарда Қазақстан Республикасының Самарқанд қаласындағы Бас консулы Талғат Шәріпов Ш.Рашидов атындағы Самарқанд Мемлекеттік университетінің ректоры Рустам Халмурадовпен кездесу өткізді.

Кездесу барысында тараптар ғылыми-білім беру, академиялық және гуманитарлық ынтымақтастық, сондай-ақ екі елдің оқу орындары арасында тәжірибе алмасу, бірлескен жобаларды іске асыру мәселелерін талқылады.

Р. Халмурадов Университеттің даму тарихы туралы егжей-тегжейлі айтып,  2024 жылдың қазан айында СамГУ-де Абай атындағы орталық пен қазақ тілі мен әдебиеті бөлімін ашқаны үшін қазақстандық тарапқа ризашылығын білдірді. Қазақ тілі мен әдебиетін оқыту бойынша сабақтарды университеттің оқу үдерісіне 2025-2026 оқу жылында енгізу жоспарланып отырғанын хабарлады.

Өз кезегінде Бас консул екі ел арасындағы ғылыми-білім беру және мәдени ынтымақтастықты нығайтуға бағытталған бастамаларға жан-жақты қолдау көрсетуге дайын екенін атап өтті.