Самарқандта «Қытай – Орталық Азия» саяси партиялар диалогының тақырыптық конференциясы өтті
2026 жылғы 6 қыркүйекте Самарқанд қаласында «Орталық Азия – Қытай» саяси партиялар диалогының «Орталық Азия мен Қытай арасындағы байланыстарды нығайтудағы саяси партиялардың рөлі» тақырыбындағы конференциясы өтті. Іс-шара Қытай Коммунистік партиясы Орталық комитетінің Халықаралық бөлімі бастамасымен ұйымдастырылды.
Конференцияға Орталық Азия елдері мен Қытайдың саяси партияларының, заң шығарушы органдарының және қоғамдық-саяси топтарының өкілдері қатысты. Қазақстандық делегация құрамына «Әділет» (А. Сарым, Н. Матжани, А. Баяш), «Ауыл» (Қ. Айтуғанов), «Ақ жол» (С. Ерубаев) партияларының және Қазақстан Халық партиясының (И. Сұңқар) басшылары мен өкілдері кірді.
Конференцияда Орталық Азия мемлекеттері мен Қытай арасындағы саяси, экономикалық және гуманитарлық ынтымақтастықты одан әрі дамыту мәселелері, сондай-ақ саяси сенімді нығайтудағы және жоғары деңгейде қол жеткізілген уағдаластықтарды іске асырудағы саяси партиялардың рөлі талқыланды.
Қазақстандық делегация партияаралық диалогты дамыту, парламентарийлер, сарапшылар мен жастар ұйымдары арасындағы өзара іс-қимылды кеңейту, сондай-ақ мемлекеттік басқару, экономикалық жаңғырту, цифрландыру, әлеуметтік саясат және кәсіпкерлікті қолдау салаларында тәжірибе алмасу қажеттігіне назар аударды.
«Си Цзиньпиннің жаңа дәуірдегі қытайлық ерекшелігі бар социализм туралы идеялары және Орталық Азиядағы бейбітшілік» симпозиумы аясында партиялық басқарудың қытайлық моделі, кадрлар даярлау, мемлекеттік басқару және әлеуметтік-экономикалық даму мәселелері бойынша пікір алмасу өтті. Қазақстанның саяси партияларының өкілдері экономикалық жаңғырту, инвестициялар тарту, өнеркәсіпті дамыту және халықтың әл-ауқатын арттыру салаларындағы Қытай тәжірибесіне практикалық қызығушылық танытты.
Конференция қорытындысы бойынша қатысушылар «Орталық Азия – Қытай» саяси партиялар диалогын өзара түсіністікті, саяси сенімді және практикалық ынтымақтастықты нығайту тетігі ретінде одан әрі дамытудың маңыздылығын атап өтті.
Іс-шара аясында Қазақстан Республикасы Құрылтайының депутаты, «Әділет» партиясы фракциясының өкілі А. Сарым Өзбекстан Республикасы Олий Мәжілісі Заң шығару палатасының депутаты, Өзбекстан Либералдық-демократиялық партиясы фракциясы жетекшісінің орынбасары А. Аслоновпен кездесті. Тараптар парламентаралық және партияаралық өзара іс-қимылды нығайту мәселелерін талқылады.