Қазақстан мен Италия жоғары білім және ғылым салаларындағы ынтымақтастықты кеңейтуде
25 қыркүйекте Астанада ҚР Ғылым және жоғары білім министрі Саясат Нұрбек Италия Республикасының Университеттер және зерттеулер министрі Анна Мария Бернинимен кездесті.
Кездесуде екі ел арасындағы жоғары білім мен ғылыми зерттеулер саласындағы ынтымақтастықтың негізгі бағыттары талқыланды. Негізгі нәтижелердің бірі І.Жансүгіров атындағы Жетісу университетінің базасында Марке политехникалық университетінің филиалын ашу туралы келісімге қол қою болды. университеттер арасындағы келісім қазақстандық және итальяндық студенттер үшін қос диплом бағдарламасын іске асыруды қарастырады.
Министр Саясат Нұрбек Қазақстан мен Италияның білім беру мекемелері арасындағы ынтымақтастықтың маңыздылығын атап, Жетісу университетінің ғылыми-зерттеу қызметін дамытудағы үлесін ерекше атап өтті.
Тараптар студенттер мен оқытушылар алмасу бағдарламаларын, сондай-ақ бірлескен зерттеу жобаларын іске асыру перспективаларын талқылады. Екіжақты ынтымақтастықтың маңыздылығы да ерекше аталып өтті.
Сонымен қатар бірлескен зерттеулерді өзара қызығушылық тудыратын салаларда бірлесіп қаржыландыру мәселесі келісілді. Биылғы жылы Римде қол қойылған өзара түсіністік туралы меморандум аясында басым бағыттарды анықтау және жаңа ұсыныстар әзірлеу үшін бірлескен басқару комитеті құрылады деп жарияланды.
«Орталық Азия – тұрақты және қауіпсіз аймақ, әрі маңызды геосаяси орталық. Бұл өңір жоғары білім беру саласында ғана емес, экономикалық және коммерциялық тұрғыдан да үлкен мүмкіндіктер ұсынады, сондықтан Италия үшін стратегиялық маңызға ие», - деді Анна Мария Бернини.
Ол Қазақстанның адами капиталды дамытудағы өршіл саясатын және университетаралық ынтымақтастықтағы белсенділігін атап өтті. Италия университеттері жыл сайын Қазақстаннан жүздеген студентті қабылдайды, ал бірлескен қаржыландырумен іске асырылатын ғылыми жобалар екіжақты диалогтың маңызды элементі болмақ.
Кездесу соңында Саясат Нұрбек пен Анна Мария Бернини ынтымақтастықтың табысты дамитынына сенім білдіріп, жоғары білім беру саласындағы интеграция және тәжірибе алмасу жолдарын жалғастыруға келісті.
Дереккөз: ҚР ҒЖБМ