Сауд Арабиясының ірі холдингімен туризм және қонақ үй бизнесі саласындағы инвестициялық мүмкіндіктер талқыланды

2023 жылғы 16 сәуірде Қазақстанның Сауд Арабиясындағы Елшісі Берік Арын саудтық Al Hokair Group холдингінің төрағасы Маджед Әл-Хокейрмен кездесті.

Кездесу барысында тараптар Қазақстан мен Al Hokair Group арасындағы ынтымақтастықты кеңейту жолдарын, соның ішінде Қазақстанда туризм және қонақ үй бизнесі саласындағы перспективалық инвестициялық жобаларды жүзеге асыру мүмкіндіктерін жан-жақты талқылады.

Қазақстанның бизнес топтарымен іскерлік байланыстарды кеңейту мақсатында Al Hokair Group басшысы 2023 ж. 8-9 маусымда елімізде өтетін Астана халықаралық форумы аясында қазақстандық тараппен бірқатар келіссөздер жүргізуге дайын екенін жеткізді.

Al Hokair Group – 1975 жылы құрылған ірі саудтық холдинг болып табылады. Холдинг қызметі қонақжайлық пен ойын-сауық салаларының дамуына бағытталған. Бүгінгі таңда компанияның қорында Сауд Арабиясында және Араб шығанағындағы елдерде Radisson, Holiday Inn, Hilton, Marriott және т.б. әлемдік деңгейдегі 35 қонақ үй, сондай-ақ жылына 30 миллионнан астам келушілерге қызмет көрсететін 92 түрлі тақырыптық саябақтар мен ойын-сауық орталықтары бар.