Саудтық Flynas әуе компаниясы биыл Қазақстанға тікелей тұрақты рейстер ашады
2023 жылдың 5 сәуірде Қазақстанның Сауд Арабиясындағы Елшісі Берік Арын саудтық FlyNas әуе компаниясының Бас директоры Бандер Әл-Моханнамен кездесті.
Кездесу барысында қазақстандық дипломат сұхбаттасын Қазақстанда соңғы саяси және әлеуметтік-экономикалық өзгерістермен, атап айтқанда «Жаңа Қазақстанды» құруға бағытталған Мемлекет басшысының бастамалары мен реформаларын іске асыру аясындағы негізгі мемлекеттік институттарды қайта жаңартудың соңғы кезеңіне айналған ҚР Парламенті Мәжілісі депутаттарын сайлаудың қорытындыларымен және жаңа Үкіметтің құрамымен таныстырып өтті.
Сонымен қатар, тараптар Қазақстан мен Сауд Арабиясы арасында тікелей тұрақты әуе қатынасын іске қосу мәселелерін талқылады.
Елші ҚР Үкіметінің екі ел азаматтарының іскерлік және туристік сапарларын жеңілдету жөніндегі шаралары, оның ішінде Корольдік азаматтары үшін визасыз режимді енгізу және Қазақстан әуежайларында «әуе еркіндігінің» бесінші дәрежесін пайдалану мүмкіндігі туралы хабардар етті.
Flynas басшысы Б.Әл-Моханна компанияның қазақстандық тараппен іскерлік және туристік байланыстарды нығайтуға қызығушылығын қуаттап, бұл мақсатта биыл Қазақстан мен Сауд Арабиясы қалалары арасында тікелей тұрақты әуе рейстердің іске қосылатынын мәлімдеді. Бұл рейстерді Airbus A330 жаңа ұшақтары жүзеге асыратын болады.
Сондай-ақ, тараптар биылғы қажылық маусымында қазақстандық қажыларды Сауд Арабиясына тасымалдауға қатысты мәселелерді талқылады. Жақында ҚМДБ шешімімен Flynas әуе компаниясы еліміздің қажыларын апаратын негізгі әуе тасымалдаушыларының бірі болып белгіленген болатын.
Осы ретте Б.Арын қазақстандық қажыларға барынша қолғабыс көрсетуді, қолайлы бағамен тиісті қызмет көрсетуді және қауіпсіздіктерін қамтамасыз етуге баса көңіл бөлуді сұрады. Б.Әл-Моханна өз тарапынан биыл қажылық жасауға ниеттенген қазақстандық қажыларға барлық қажетті жағдайлар жасалатынына сендірді.
Кездесу қорытындысы бойынша тараптар Қазақстанның туристік әлеуетін Корольдікте ілгерілетуде өзара іс-қимылды жалғастыруға, оның ішінде екі елдің туристік және әуе компаниялары мен ведомстволарының қатысуымен төртінші роуд-шоу өткізуге уағдаласты.
Flynas әуе компаниясы 70 ішкі және халықаралық бағыттар бойынша аптасына 1,5 мыңнан астам рейсті жүзеге асыратын жеке саудтық лоукостер болып табылады. Flynas-тың авиапаркінде жаңа Airbus A320Neo және A330 ұшақтары бар.