Сауд Арабиясының астанасында Әбу Насыр әл-Фарабидің 1150 жылдық мерейтойын атап өтуге ерекше атсалысқан тұлғаларға алғыс хаттар мен медаль тапсырылды

2021 жылғы 26 сәуірде Қазақстан Республикасының Сауд Арабиясындағы Елшісі Берік Арын Король Фейсал атындағы Исламдық зерттеулер орталығының басқарма төрағасы Биік Мәртебелі ханзада Турки әл-Фейсал Әл Саудпен кездесті.

Кездесу барысында Елші Б.Арын ұлы ойшыл Әбу Наср әл-Фарабидің 1150 жылдығын халықаралық деңгейде кеңінен атап өтуге қосқан үлесі үшін ханзада Турки әл-Фейсал Әл Саудқа ҚР Мəдениет жəне спорт министрі А.Райымқұлованың алғыс хатын және Әл-Фараби атындағы ҚазҰУ ректорының шешімімен берілген ««ӘЛ-ФАРАБИ» үлкен алтын медалін» табыс етті. Орталықтың Бас хатшысы Сауд әл-Сархан да қазақ министрінің алғыс хатымен марапатталды.

Ханзада Турки әлемнің екінші ұстазы Әл-Фараби мерейтойына орай ұйымдастырылған халықаралық шаралар, соның ішінде Орталық алаңында 2020 жылғы 8 желтоқсанда «Әбу Наср әл-Фарабидің адамзат өркениетінің дамуына қосқан үлесі» тақырыбында өткен конференция ұлы мұсылман ғалымының өмір жолы, еңбектері және шығармашылық мұралары жайлы кеңінен ой бөлісуге жақсы мүмкіндік бергендігін және екіжақты мәдени байланыстарды нығайтуға оң әсерін тигізгенін атап өтіп, қазақ тарапының марапатына шынайы ризашылығын білдірді.

Кездесу қорытындысы бойынша тараптар алдағы уақытта да достас Қазақстан мен Сауд Арабиясы арасындағы мәдени-ғылыми ынтымақтастықты кеңейтуге септігін тигізетін бірлескен жобаларды жүзеге асыруды жалғастыруға уағдаласты.

Ханзада Турки әл-Фейсал Сауд Арабиясының Барлау қызметін 24 жыл бойы басқарған, Корольдіктің Ұлыбритания мен АҚШ-тағы Елшісі болған әйгілі саяси қайраткер.