Қазақстан Елшісі Бахрейн Сыртқы саяси ведомствосының басшысымен кездесті
2020 ж. 19 қарашада Қазақстанның Бахрейн Корольдігіндегі (БК) Елшісі қызметін қоса атқарушы Берік Арынды БК Сыртқы істер министрі Абдул Латиф бен Рашид Әл-Заяни қабылдады.
Кездесу барысында екіжақты және көпжақты форматтағы Қазақстан-Бахрейн қарым-қатынастарының күн тәртібіндегі бірқатар өзекті мәселелер бойынша пікір алмасылды.
Атап айтқанда, тараптар қазіргі жоғары деңгейдегі екі ел арасындағы саяси диалогты жалғастыруға дайындықтарын қуаттады, мәдени-гуманитарлық, сауда-экономикалық және инвестициялық ынтымақтастықты жандандырудың жолдарын, сондай-ақ Ислам ынтымақтастығы ұйымы, Азиядағы өзара ықпалдастық және сенім шаралары жөніндегі Кеңес (АӨСШК) және т. б. халықаралық ұйымдар шеңберіндегі өзара іс-қимыл мен ұстанымдарын үйлестіру мәселелерін талқылады.
Осы тұрғыда, Елші Қазақстанның АӨСШК-дегі төрағалығының басымдықтары және осы Кеңес шеңберіндегі жаңа бастамалары туралы хабардар етті.
Сонымен қатар, Б.Арын министрді ҚР-дағы саяси және әлеуметтік-экономикалық ахуалдың қазіргі дамуымен таныстырды, елдегі заңнамалық өзгерістер мен алдағы парламенттік сайлауға дайындық барысы туралы әңгімеледі.
Коронавирустың жаһандық өршуі аясында Азық-түлік қауіпсіздігі мәселелерінің өзектілігін ескере отырып, қазақстандық дипломат Бахрейн тарапын 2013 жылы ҚР Тұңғыш Президенті-Елбасы Н.Ә.Назарбаевтың бастамасымен құрылған Азық-түлік қауіпсіздігі жөніндегі Ислам ұйымына қосылуға шақырды.
Бахрейн СІМ-нің басшысы екі ел арасындағы саяси диалог деңгейін жоғары бағалап, ынтымақтастықтың басқа да маңызды бағыттары бойынша өзара іс-қимылды нығайту қажеттігін атап өтті.
Министр ҚР СІМ басшылығына жылы лебіздерін және Қазақстан халқына деген амандық пен одан әрі өркендеу тілектерін жеткізді.
Екіжақты қарым-қатынастарды жандандыру мақсатында тараптар екі елдің сыртқы саяси ведомстволары арасында саяси және консулдық консультациялар өткізуге, Манамадағы ҚР Құрметті консулын тағайындау мәселесін пысықтауға, сондай-ақ өзара тиімді ынтымақтастықты жан-жақты кеңейтуге бағытталған өзге де іс-шараларды ұйымдастыруға келісті.