Француз сарапшылары Орталық Азия өңірінің рөлін талқылады

Париж, 2023 жылғы 27 сәуір - Қазақстанның Франциядағы Елшілігінің қолдауымен Орталық Азияда мамандандырылған француз сарапшыларының қатысуымен Париждегі БҰҰ университетаралық комитеті (CINUP) ұйымдастырған «Орталық Азия және оның өңірлік рөлі» тақырыбында дөңгелек үстел өтті.

Іс-шараны ашқан Қазақстанның Франциядағы Елшісі Гүлсара Арыстанқұлова ел басшылығының өңірдегі саяси, экономикалық және мәдени байланыстарды нығайту жөніндегі күш-жігерін атап өтіп, еліміздің Орталық Азия өңіріндегі рөліне аудиторияның назарын аударды.

Пікірталас барысында сарапшылар өңір елдері, соның ішінде Қазақстан алдында тұрған заманауи сын-қатерлер бойынша пікір алмасты. Атап айтқанда, CINUP Президенті Эрик Гюошон, Францияның Халықаралық қатынастар институтының (IFRI) өкілі Микаэль Левистон және Францияның Орталық Азия зерттеулер институтының сарапшысы Дидье. Шоде өз сөздерінде өңірдің әлемдегі өсіп келе жатқан рөлін білдірді. Сонымен қатар, француз сарапшылары біздің елімізде демократиялық институттарды жан-жақты нығайту және өткен парламенттік сайлауды қоса алғанда, жаңа саяси жүйені енгізу бойынша қабылданып жатқан шараларды оң аспектіде бағалады. Қазақстанның бірқатар елдерге, соның ішінде Ауғанстанға гуманитарлық көмек көрсетудің маңыздылығы атап өтілді.

Сонымен қатар, қатысушылар ү.ж. 8-9 маусымда өтетін Астана халықаралық форумы – жаңа диалог алаңымен танысты. Форум климаттың өзгеруіне, азық-түлік тапшылығына және энергетикалық қауіпсіздікке қатысты мәселелерді шешу жолдарын қарастыру мақсатында шетел үкіметтерінің, халықаралық ұйымдардың, бизнес пен ғылыми ортаның жоғары лауазымды делегаттарының диалогына арналған алаң болмақ.

Іс-шара соңында барлық қатысушылар арасында өңірлік және халықаралық ынтымақтастықтың өзекті мәселелері бойынша сындарлы пікір алмасу өтті.