Француздық «Orano» компаниясы өзінің өндірістік және инвестициялық қызметін Қазақстанда жалғастыруға ниетті

Қазақстанның Франциядағы елшісі Жан Ғалиев «Orano Mining» француз компаниясының бас директоры Николя Маэспен кездесу өткізді. Әңгіме барысында тараптар әлемдік уран нарығын дамыту үрдістері туралы пікір алмасты, сондай-ақ екі елдің уран өнеркәсібіндегі әріптестігін кеңейту мәселелерін талқылады.

Н.Маэс 1996 жылдан бастап «Orano» 1200-ге жуық жұмыс орнын құрған «КАТКО» бірлескен кәсіпорны арқылы Қазақстан экономикасына 1 млрд. еуро инвестициялағанын атап өтті. Оның айтуынша, жақын арада «КАТКО» сенімді және ұзақ мерзімді стратегиялық серіктес ретінде өзінің тау-кен өндіру кәсіпорнының жаңа секторын дамытуға қосымша 100 млн. еуро инвестициялауды жоспарлап отыр. Сонымен қатар, компания әлеуметтік және экологиялық маңызы бар жобаларды іске асыруға белсенді қатысуды жоспарлап отыр.

«Orano» - Францияның ірі халықаралық өнеркәсіптік тобы және атом өнеркәсібінің көшбасшысы. 1996 жылы «Orano» (51%) және «Қазатомөнеркәсіп» ҰАК» АҚ (49%) Түркістан облысындағы ірі уран кенішінің операторы болып табылатын «КАТКО» Қазақстан-француз бірлескен кәсіпорнын құрды.