Норвегиялық Стортингте Қазақстанның саяси реформалары түсіндірілді

Қазақстанның Норвегиядағы Елшісі Әділ Тұрсынов Норвегияның Стортинг (Парламент) депутаты мен сыртқы істер және қорғаныс жөніндегі Тұрақты комитетінің төрайымы Ине Эриксен Сёрейдемен кездесу өткізді.

Елші Ине Эриксен Сёрейдеге Президент Қасым-Жомарт Кемелұлы Тоқаевтың бастамасымен елімізде жүргізіліп жатқан саяси және экономикалық реформалардың жүзеге асырылу барысы, Қазақстанның саяси өміріндегі Парламенттің рөлін күшейту, сондай-ақ Астана мен Осло арасындағы қатынастардың жай-күйі мен келешегі туралы хабардар етті.

Сұхбаттасушылар екіжақты деңгейде де, көпжақты институттар шеңберінде де Қазақстан-Норвегия ынтымақтастығының жалпы контекстінде парламенттік дипломатияны жандандырудың маңыздылығын атап өтті.

Әділ Тұрсынов Ине Эриксен Сёрейдені тараптарға қолайлы уақытта елімізге сапармен келуге шақырды.