Норвегиялық бизнеске Қазақстанның инвестициялық мүмкіндіктері таныстырылды
Ослода Қазақстанның инвестициялық мүмкіндіктеріне арналған дөңгелек үстел өтті. Шараны «Норвегияның Шығыс кеңсесі» (Norsk Østhandelskammer) Сауда-өнеркәсіп палатасы, Қазақстанның Ослодағы Елшілігі және «Kazakh Invest» ҰК» АҚ ұйымдастырды.
Қазақстанның Норвегиядағы Елшісі Әділ Тұрсынов Мемлекет басшысы Қасым-Жомарт Тоқаев бастаған саяси және экономикалық реформалар, бизнес және инвестициялық ахуалды жақсарту бойынша үкіметтің шаралары, сондай-ақ шетелдік компанияларды Қазақстанға көшіру жұмыстары туралы айтты. Ол Елшіліктің Қазақстан мен Норвегия арасындағы сауда-экономикалық және инвестициялық байланыстарды жандандыруға ұмтылысын атап өтті.
«Kazakh Invest» ҰК» АҚ ресми өкілі Сәкен Олжабаев Қазақстандағы инвестициялық ахуал, шетелдік инвесторларды мемлекеттік қолдау шаралары, экономиканың өңдеуші салаларында инвестициялық жобаларды жүзеге асыруға дайын компанияларға мемлекет тарапынан жасалып жатқан қолайлы жағдайлар туралы егжей-тегжейлі айтып берді. «Астана» халықаралық қаржы орталығының құралдары таныстырылды.
Норвегиялық кәсіпкерлердің ерекше қызығушылығын балық өсіру өнеркәсібі, жаңартылатын энергия көздері саласындағы, көліктік-логистикалық инфрақұрылымды дамытудағы ынтымақтастық әлеуеті болды.
«Норвегияның Шығыс кеңсесінің» басқарушы директоры Ханс-Олав Рекдал бұл Қазақстанға арналған кең форматтағы алғашқы кездесу екенін атап өтті. «Бүгінгі іс-шара біздің одан әрі жемісті ынтымақтастығымыздың маңызды бастамасы болып табылады. Қазақстанның Норвегиямен, Еуропамен және Жібек жолымен байланысты барлық елдермен ынтымақтастықты нығайтуға күш салуы бізге ерекше әсер қалдыруда. «Норвегияның Шығыс кеңсесі» әсіресе энергетика, ауыл шаруашылығы, кеме көлігі, аквамәдениет және тау-кен өнеркәсібі салаларындағы ұзақ мерзімді ынтымақтастыққа сенім артады», - деп атап өтті Х.Рекдал.
2022 жылдың соңында Қазақстан мен Норвегия арасындағы тауар айналымы 38 пайызға өсіп, 117,5 миллион долларды құрады. Қазақстанның Норвегияға экспортының негізгі тауарлары бидай, алюминий, ферроқорытпалар, металл бұйымдары, қозғалтқыштар және т.б. болып табылады. Өз кезегінде Норвегия Қазақстанға балық, титан рудалары мен концентраттары, азық-түлік, медициналық мақсаттағы бұйымдар, азот тыңайтқыштарды жеткізеді.
Дөңгелек үстелдің қорытындысы бойынша серіктестік перспективаларын жан-жақты қарастыру үшін Қазақстанға норвегиялық бизнес делегациясын құру жоспарлануда.