Қазақстан мен Португалия: өңіраралық ынтымақтастықтың келешегі
2022 жылғы 2-3 наурызда Қазақстан Елшісі Дәулет Батырашев Португалияның Орталық аймағына кіретін Визеу және Коимбра округтеріне жұмыс сапарымен барып, онда ресми мекемелермен және жергілікті іскерлік топтармен сауда-экономикалық және мәдени-гуманитарлық салалардағы ынтымақтастықты дамытудың кең ауқымды мәселелері бойынша келіссөздер жүргізді.
Визеу қаласының мэрі Фернанду де Карвальо Руаш мырза және Коимбра қаласының мэрі Жозе Мануел да Силва мырзамен кездесулері барысында қазақстандық дипломат оларды шетелдік инвесторларды қорғау бойынша ҚР Үкіметі қабылдаған шаралар, елімізде бизнес жүргізудің практикалық аспектілері және отандық компаниялардың экспорттық әлеуеті туралы егжей-тегжейлі хабардар етті. Қазақстанның транзиттік-көлік әлеуетіне, логистика мен жүк тасымалы саласында әріптестік орнату мүмкіндіктеріне ерекше назар аударылды.
Португалдық муниципалитеттердің басшылары тәуелсіздіктің 30 жылы ішінде экономикалық дамудағы, сондай-ақ демократиялық мемлекет құру үдерістеріндегі Қазақстан қол жеткізген жетістіктерге ерекше тоқталып өтіп, өңіраралық ынтымақтастықтың перспективаларын және өзара өңірлік бизнес-миссияларды ұйымдастыру қажеттілігін атап өтті. Жеңіл өнеркәсіп, ауыл шаруашылығы, жиһаз өндірісі және құрылыс салаларында екі елдің кәсіпорындары арасында байланыс орнату мүмкіндіктері талқыланды.
Келіссөздердің тағы бір маңызды аспектісі - жергілікті оқу орындарымен өзара тиімді байланыстар орнату болды. Мысалы, Жозе Мануел да Силва қазақстандық жоғары оқу орындарының Португалиядағы ең ірі 25 мыңнан астам студенті бар Коимбра университетімен және болмыш елдің алдыңғы қатарлы Coimbra iParque Инновациялық ғылыми-техникалық паркімен (ү.ж. наурыз айының соңында елшінің арнайы сапары жоспарланған) ынтымақтастық орнату қажет екені туралы пікір білдірді.
Өз кезегінде, Фернанду де Карвальо Руаш Қазақстанмен Визеудің мәдени-гуманитарлық қарым-қатынастарын жолға қоюға және ҚР мүдделі қаласымен бауырластық байланыстарды орнатуға мүдделілігін білдіре отырып, биыл елдеріміз арасында дипломатиялық қатынастардың 30 жылдығын мерекелеу шеңберінде бірқатар бірлескен іс-шараларды ұсынды.
Сонымен қатар, Визеу Өңірлік кәсіпкерлер ассоциациясының (AIRV) президенті Жоау Ребелу Коттамен келіссөздер өтіп, оның шеңберінде ҚР экономикасына инвестициялар тарту бойынша нақты жобаларды іске асыру перспективалары және португалдық бизнес-делегациялардың сапарларын ұйымдастыру мәселелері талқыланды (ү.ж. 20 сәуірде Орталық Португалияның 50 компаниясының қатысуымен ірі бизнес-конференция өткізу туралы уағдаластық).
Іскерлік топтармен байланыс орнату мақсатында бірқатар жергілікті, сондай-ақ Визеу және Лейрия округтерінің ақпараттық технологиялар, агроөнеркәсіптік кешен, инфрақұрылым және құрылыс, жеңіл өнеркәсіп сияқты салалардағы кәсіпорындар өкілдерінің қатысуымен бизнес-семинар өтті.
ҚР бизнес-құрылымдарымен байланыс орнату және еліміздің инвестициялық мүмкіндіктерімен танысу мақсатында Қазақстанға сауда миссиялар ұйымдастыруға мүдделілік расталды. Атап айтқанда, Filstone - Comérico de Rochas S.A. (гранит, мәрмәр және әктас өндірісі) және Ivo Cutelarias S.A. (кәсіби және тұрмыстық пайдалануға арналған асхана құралдары өндірісі) компанияларының басшылары Рикарду Жорж және Антониу Пералта Қазақстанда өз бизнесін дамытуға және ү.ж. бірінші жартысында ҚР-дағы әлеуетті серіктестермен келіссөздер жүргізуге дайындығын білдірді.