Қазақстан Республикасының Украинадағы Елшісі Киев қаласының мэрімен кездесті

Ағымдағы жылғы 30 сәуірде Қазақстан Республикасының Украинадағы Елшісі Дархан Кәлетаев Киев қаласының мэрі Виталий Кличкомен кездесті.

Украина астанасының басшысы «Менің екінші Отаным - Қазақстанның Елшісін қарсы алуға қуаныштымын! Киевке қош келдіңіздер!» - деп әңгімесін бастады. Ол өзінің Қазақстанда өткен балалық шақтарын жылы еске алып, кең байтақ дала, ұлы Тянь-Шань таулары мен қазақ халқының қонақжайлылығы оның жүрегінде мәңгі сақталатынын атап өтті.

В.Кличко Киевтің экономикалық әлеуеті туралы хабарлап, қазақстандық бизнесті белсенді сауда-инвестициялық ынтымақтастыққа шақырды. Ол бірлескен жобаларды жүзеге асыруда қажетті қолғабыс көрсететініне сенім білдірді.

Өз кезегінде, Д.Кәлетаев Қазақстандағы инвестициялық ахуал, Астана халықаралық қаржы орталығының мүмкіндіктері, сондай-ақ Қазақстан Республикасының туристік әлеуеті туралы айтты. Ол екі астананың - Нұр-Сұлтан мен Киевтің «егіз қала» қатынастарының аясында бірқатар экономикалық, мәдени - гуманитарлық жобаларды жүзеге асыруды ұсынды.

Сонымен қатар, сұхбаттасушылар COVID-19 таралуына қарсы тұру және халық пен кәсіпкерлерді қолдау шаралары бойынша тәжірибе алмасты.