Қазан, 2023 жылғы 11-12 желтоқсан – Абай облысының әкімі Нұрлан Уранхаев бастаған қазақстандық делегацияның Татарстан Республикасына сапары өтті. Делегация құрамына Абай облыстық мәслихатының төрағасы Қуаныш Сүлейменов, Семей қаласының әкімі Нұрбол Нұрсағатов, Курчатов қаласының әкімі Болат Әбдіралиев, Alikhan Bokeikhan University ректоры Александр Қойчубаев, сондай-ақ облыстың мемлекеттік органдарының, іскер, ғылыми және қоғамдық топтарының өкілдері кірді.
Бұл сапар Татарстан Республикасының Мемлекеттік кеңесінің төрағасы Фарид Мұхаметшиннің Семей қаласына сапары барысында 2022 жылғы 9-10 қыркүйекте қол жеткізілген уағдаластықтардың жалғасы болды.
Делегация Татарстан Республикасы Раисы Р. Миннихановпен, Татарстан Республикасы Мемлекеттік Кеңесінің төрағасы Ф. Мухаметшинмен, Қазан қаласының әкімі И. Метшинмен, Татарстан Республикасының инвестициялық ынтымақтастық агенттігінің төрағасы Т. Минуллинамен, Татарстан Республикасының Сауда-Өнеркәсіп палатасының төрағасы Ш. Агеевпен кездесулер мен келіссөздерге қатысты. Сонымен қатар, делегация «Иннополис» арнайы экономикалық аймағы, «Иннополис» университеті, «Химград» технополисі, Қазан федералды және мемлекеттік медициналық университеттері, Б. Рамеев атындағы IT-паркі және т.б. жұмысының негізгі бағыттарымен танысты. Тараптар сауда-экономикалық, инвестициялық және өңірлік ынтымақтастықты одан әрі арттыру қажеттігін атап өтті.
Бұл тақырып іскер топтар өкілдерінің қатысуымен өткен форум барысында өз жалғасын тапты. Қазақстанның Қазан қаласындағы Бас консулы Ерлан Ысқақов еліміздегі мемлекеттік өмірдің барлық салаларының жан-жақты жаңаруын, әлеуметтік-экономикалық дамуын және Қазақстандағы қолайлы инвестициялық және іскерлік ахуалды атап өтіп, құттықтау сөз сөйледі. Өнеркәсіптік кооперациядағы ынтымақтастықты кеңейту және бірлескен жобаларды іске асыру мәселелеріне ерекше назар аударылды.
Форум аясында Абай облысының және Татарстан кәсіпорындарының экспорттық және инвестициялық әлеуетінің тұсаукесерлері ұсынылды. В2В кездесулері өтті, іскерлік делегациялармен өзара сапарлармен алмасу және екіжақты сауда байланыстарын дамыту мәселелері талқыланды.
Сапар қорытындысы бойынша Абай облысы мен Татарстан Республикасы арасындағы өзара ынтымақтастық туралы Меморандумға, Иннополис университеті мен Alikhan Bokeikhan University арасындағы ынтымақтастық туралы келісімге қол қою және Қазан қаласының қоғамдық орындарының бірінде қазақ ақыны және жазушысы Абай Құнанбаевқа бюст орнату ұсынылды.