Қазақстан Республикасының Ауғанстандағы Уақытша сенімді өкілі Ғ.И.Ақбасов Балх провинциясына ресми сапар жасады.

Балх, 13 наурыз - Қазақстан Республикасының Ауғанстандағы Уақытша сенімді өкілі Ғ.И.Ақбасов Балх провинциясына ресми сапар жасады.

Сапар барысында Ғ.И.Ақбасов Балх провинциясының губернаторы М.Ю.Вафа және өңірдің басқа да лауазымды тұлғаларымен кездесті.

Кездесу кезінде Қазақстанның дипломатиялық миссиясының басшысы губернаторды 14 наурызда «Айритом» АЭА аумағында қазақстандық өндірушілердің өнімдері ұсынылатын павильонның ашылуы жоспарланғаны туралы хабардар етті.

Губернатор М.Ю.Вафа өз кезегінде Ауғанстан аумағында еркін экономикалық аймақ құру жоспарларын бөлісіп, Ауғанстан мен Қазақстан арасындағы сауда айналымын кеңейтуге, сондай-ақ Ауғанстанның жеміс-жидектері, көкөністері және құрғақ жемістерінің Қазақстанға экспортын дамытуға ауған тарапынан қызығушылық бар екенін атап өтті.

Ғ.И.Ақбасов Қазақстанның екі ел арасындағы сауда-экономикалық байланыстарды нығайтуға және көлік-логистикалық ынтымақтастықты дамытуға ниетті екенін жеткізді.

Сапар аясында Қазақстанның дипломатиялық миссиясының басшысы Мазари-Шариф қаласындағы бірқатар кәсіпорындардың жұмысымен танысты, оның ішінде «Шамал Профиль» (қазақстандық Qarmet болат прокатынан металл бұйымдарын өндіру), «Кеноат Башх» (Қазақстаннан ұн мен жүгері өнімдерін экспорттау, кондитерлік өнімдер шығару және оларды Қазақстанға экспорттау), «Муфид Групп» (Қазақстаннан экспортталатын майлы дақылдарды өңдеу).