Қазақстан мен Сауд Арабиясының медиа саласындағы ынтымақтастығы талқыланды

2024 жылғы 19 қарашада Қазақстан Республикасының Жидда қаласындағы Бас консулы Р.Қоспанов белгілі журналист және блогер Низар әл-Алимен кездесті.

Кездесу барысында медиа саласындағы ынтымақтастықты кеңейту жолдары мен болашақ жоспарлар талқыланып, Қазақстанның Сауд Арабиясы бұқаралық ақпарат құралдарында кеңінен танылуына ерекше назар аударылды.

2023 жылдан бері Н.әл-Али Қазақстанның Елшілігі және Бас консулдығымен тығыз әрі жемісті ынтымақтастықта жұмыс істеп келеді. Биылғы қыркүйек айында саудтық журналист 5-ші Дүниежүзілік көшпенділер ойындарын насихаттау мақсатында Астанаға сапармен барды. Н.әл-Али дайындаған бейнерепортаждар мен әлеуметтік желілердегі және дәстүрлі ақпарат құралдарындағы жарияланымдар арқасында Көшпенділер ойындары Сауд Арабиясы БАҚ-та кеңінен танылды.

Осыған байланысты кездесу барысында Бас консул Н.әл-Алиге Қазақстан Республикасының Сауд Арабиясындағы Елшісі М.Менілбековтің атынан қазақтың мәдени-тарихи құндылықтары мен дәстүрлерін насихаттауға қосқан үлесі, сондай-ақ Қазақстанды тартымды туристік бағыт ретінде танытудағы еңбегі үшін Алғыс хат табыс етті.