Қазақстан әлемнің жылыжай шаруашылығының астанасы – Вестландпен ынтымақтастықты нығайтуда

Вестланд, Нидерланд – 2025 жылғы 23 қаңтар – Қазақстанның Нидерландтағы Елшісі Қайрат Әбдірахманов Вестланд мэрі Бауке Арендспен кездесті.

Кездесу барысында қазақстандық дипломат 2023 жылы мэрдің Қазақстанға жасаған сапары үшін алғысын білдірді. Бұл сапар нидерландтық муниципалитет басшысының Елімізге алғашқы ресми іссапары болды. Бұл оқиға ынтымақтастықты нығайтуға, соның ішінде Қазақстанда нидерландтық компаниялар санын арттыруға бағытталған келісімдер жасау арқылы жаңа мүмкіндіктер ашты.

Әсіресе, Вестландтың инновациялар мен тұрақты жылыжай шаруашылығы саласындағы әлемдік көшбасшы ретіндегі рөлі ерекше атап өтілді. Елші Қазақстанның ауыл шаруашылығы өндірісінің тиімділігін арттыру және жаһандық азық-түлік қауіпсіздігін нығайту мақсатында озық технологияларды бейімдеуге қызығушылық танытатынын айтты.

Тараптар сондай-ақ Қазақстан делегацияларының Нидерландқа жоспарланған сапарларының бағдарламасындағы Вестландтың негізгі нысандарын, соның ішінде Әлемдік жылыжай шаруашылығы орталығын (World Horti Center) аралау мәселелерін талқылады. Б. Арендс осы сапарларды ұйымдастыруға ықпал етуге және білім мен тәжірибе алмасудың жемісті болуын қамтамасыз етуге дайын екенін білдірді.

Сонымен қатар, тараптар экономиканың басқа да салаларында ынтымақтастық мүмкіндіктерін қарастырды. Елші дәстүрлі салалардан тыс ынтымақтастықты әртараптандырудың стратегиялық маңыздылығын атап өтті. Бұл Қазақстан Президенті Қасым-Жомарт Тоқаевтың экономиканы трансформациялау және тұрақты даму туралы көзқарасына сәйкес келеді.

Кездесу соңында Қ. Әбдірахманов Б. Арендсқа тұрақты қолдауы үшін алғыс білдіріп, Қазақстан мен Вестланд арасындағы байланысты одан әрі нығайтудың маңыздылығын атап өтті. Бұл кездесу Қазақстан мен Нидерланд арасындағы берік әрі дамып келе жатқан әріптестіктің тағы бір дәлелі болды, тараптардың инновацияға, тұрақтылыққа және өзара өркендеуге деген ортақ ұмтылысын көрсетті.