А.Мамин Нидерланды Премьер-Министрі М.Рюттемен экономикалық ынтымақтастықтың өзекті мәселелерін талқылады

Глазго, 2021 жылғы 2 қараша.  Климаттың өзгеруі жөніндегі БҰҰ-ның Негіздемелік конвенциясының Тараптар Конференциясының 26-шы сессиясына қатысу үшін, Глазго қаласына жұмыс сапары аясында, Премьер-Министрі Асқар Мамин Нидерланд Премьер-Министрі Марк Рюттемен келіссөздер жүргізді.

Үкімет басшылары сауда-экономикалық, инвестициялық, ауыл шаруашылығы, көлік-логистика, дәстүрлі және баламалы энергетика салаларындағы екіжақты ынтымақтастықты дамытудың перспективаларын талқылады. Сондай-ақ Дүниежүзілік сауда ұйымы және басқа да көпжақты құрылымдар аясындағы өзара іс-қимыл мәселелері қарастырылды.

Қазақстан Республикасының Премьер-Министрі А.Мамин Қазақстан мен Нидерланды арасындағы сауда және инвестиция айналымының жоғары серпінін атап өтті. Биылғы жылдың 8 айында елдер арасындағы тауар айналымы 42,8%-ға өсіп, 3,2 млрд. АҚШ долларды құрады.

Нидерланд Корольдігі Қазақстан экономикасының ең ірі инвесторы болып табылады. 2021 жылдың бірінші жартыжылдығында Нидерландтан Қазақстан экономикасына салынған тікелей инвестициясының көлемі 24,5%-ға өсіп, 3,3 млрд. АҚШ долларды құрады. 2005 жылдан бері Нидерландтың Қазақстандағы ТШИ көлемі 100 млрд. АҚШ доллардан асты.

Қазақстанда Нидерланд капиталының қатысуымен 900-ден астам кәсіпорын жұмыс істейді, олар экономиканың энергетика, машина жасау, құрылыс, көлік-логистика және агроөнеркәсіптік секторларында жұмыс атқарады.