Қазақстан Елшісі Болат Иманбаев Армения Республикасының Аумақтық басқару және инфрақұрылымдар министрi Гнел Саносянмен кездесті

Ереван, 2021 жылғы 26 қазан - Елші Болат Иманбаевтың Армения Республикасының Аумақтық басқару және инфрақұрылымдар министрі Гнел Саносянмен кездесуінде тараптар қазақстан-армян өңіраралық, инфрақұрылымдық, көліктік және сауда ынтымақтастығы мәселелерін талқылады. Министр Арменияның осы бағыттар бойынша Қазақстанмен екіжақты және көпжақты форматтағы өзара іс-қимылды жандандыруға мүдделілігін білдіріп, қолда бар үлкен әлеует пен өсу перспективасын атап өтті.

Кездесуде 2021 жылғы 26 мамырдағы Экономикалық ынтымақтастық жөніндегі қазақстан-армян үкіметаралық комиссиясының 8-ші отырысының хаттамасын орындау мәселелері талқыланып, екіжақты ынтымақтастыққа жаңа серпін берілгені атап өтілді. Елші Мемлекет Басшысы Қасым-Жомарт Тоқаевтың «Халық бірлігі және жүйелі реформалар – ел өркендеуінің берік негізі» атты Қазақстан халқына Жолдауының негізгі ережелері туралы хабардар етіп, инфрақұрылымдық және өңірлік реформаларға, сондай-ақ ҚР әлеуметтік-экономикалық жаңғыруының өзекті бағдарламалары мен қазақстандық халықаралық бастамаларға егжей-тегжейлі тоқталды.