Дохада Тұңғыш Президент күні мен Қазақстан Республикасы Тәуелсіздігінің 30 жылдығына арналған салтанатты қабылдау өтті

2021 жылғы 5 желтоқсанда Қазақстан Республикасының Қатардағы Елшілігі Тұңғыш Президент күні мен Қазақстан Республикасы Тәуелсіздігінің 30 жылдығына орай салтанатты қабылдау ұйымдастырды.

Іс-шараға Қатар Үкіметі мен билеуші ​​отбасы мүшелері, мемлекеттік органдардың, ірі ұлттық және жеке компаниялардың басшылары, Дохада тіркелген шетелдік дипломатиялық миссиялар мен халықаралық ұйымдардың басшылары, қоғам қайраткерлері, ғылыми орта мен қазақ диаспорасының өкілдері, сондай-ақ елдің жетекші БАҚ өкілдері қатысты.

Өз сөзінде Елші А.Исағалиев Қазақстанның тәуелсіздік жылдарындағы негізгі жетістіктеріне және оның қуатты тәуелсіз мемлекет ретінде қалыптасуының маңызды кезеңдеріне тоқталды. Дипломат ҚР Тұңғыш Президент – Елбасы Н.Ә.Назарбаевтың еліміздің қалыптасуы мен дамуындағы айрықша рөлін, оның ауқымды бағдарламалары мен стратегияларын, халықаралық бастамалары мен дипломатиялық жеңістерін ерекше атап өтті. Сондай-ақ Елші қонақтардың назарын ҚР Президенті Қ-Ж.к.Тоқаевтың басшылығымен мемлекетіміздің одан әрі тұрақты және қарқынды дамуына бағытталған саяси және экономикалық саладағы теңдессіз реформаларына аударды.

Қазақстан мен Қатар арасындағы екіжақты қарым-қатынастарға қатысты А.Исағалиев дипломатиялық қатынастар орнатылған сәттен бастап 28 жыл ішінде қол жеткізілген екіжақты және көпжақты деңгейлердегі жемісті өзара іс-қимыл үшін қатарлық әріптестеріне алғыс білдіре отырып, соңғы уақытта байқалып отырған түрлі салалардағы екіжақты ынтымақтастықтың жоғары деңгейін атап өтті.

Қабылдау бағдарламасы аясында Қазақстанның тәуелсіздік жылдарындағы жетістіктері туралы бейнеролик көрсетілді. Сондай-ақ, дәстүр бойынша қонақтарға қазақ асханасының түрлі тағамдары ұсынылды, олар барлық қатысушылардың көңілінен шықты.