Сауда және инвестиция перспективалары: Қазақстан мен Мажарстан негізгі бастамаларды талқылады

Будапешт, 2025 жылғы 26 ақпан – HEPA (Мажарстанның экспортты дамыту агенттігі) кеңсесінде Қазақстан делегациясы мен HEPA басшылығы арасында екіжақты сауда-экономикалық ынтымақтастықты нығайтуға арналған кездесу өтті.

Кездесуге HEPA бас директоры Габор Йенеи, халықаралық қатынастар жөніндегі менеджер Акош Мадари және халықаралық қатынастар департаментінің басшысы Ласло Парис қатысты. Қазақстан тарапынан Қазақстан Республикасының Мажарстандағы Елшісі Абзал Сапарбекұлы және Kazakh Invest компаниясының шетелдегі өкілі Ұлбосын Сарыбаева қатысты.

Кездесу 2024 жылдың қараша айында Қазақстан Президентінің Мажарстанға жасаған сапары барысында талқыланған бірлескен инвестициялық жобаларды жалғастыру мақсатында ұйымдастырылды.

Сондай-ақ, тараптар 2025 жылғы 17 ақпанда Мажарстанның Сыртқы істер және сыртқы сауда министрі Петер Сийяртоның Астанаға жасаған сапарының қорытындыларын талқылады.

Қазақстандық сауда миссиясына ерекше назар аударылды, ол 2025 жылғы 17-20 наурызда Мажарстанда өтеді. Осы миссия аясында 2025 жылғы 18 наурызда HEPA және Мажарстан Сауда-өнеркәсіп палатасының (MKIK) қолдауымен бизнес-форум өткізу жоспарланған.

Кездесуде тараптар HEPA және Түркі мемлекеттері ұйымымен бірлесіп жүзеге асырылып жатқан құрғақшылықтың алдын алу бағдарламасын және бұл бағдарламаға Қазақстанның қатысу мүмкіндіктерін талқылады.

Кездесу қорытындысы бойынша тараптар екіжақты ынтымақтастықты тереңдетуге ниетті екендерін растады және өзара іс-қимыл бойынша одан әрі келіссөздер жүргізуге келісті.