Мажар «Fullsulate» Қазақстанда мұнай төгінділерін жоюға және құрылыс оқшаулауға арналған инновациялық материалдарды өндіруді жоспарлауда

Будапешт, 2024 жылғы 23 желтоқсан - Қазақстан Республикасының Мажарстандағы Елшісі Абзал Сапарбекұлы «Fullsulate» компаниясының бизнес дамыту директоры Даниэль Пажитзцкиймен кездесті. Кездесу барысында Қазақстанда инновациялық оқшаулау материалдары мен мұнай төгінділерін жоюға арналған экологиялық қауіпсіз шешімдерді өндіруді жергіліктендіру бойынша амбициялық жоспарлар талқыланды.

Кездесу барысында Даниэль Пажитзцкий «Fullsulate» компаниясының Қазақстан экономикасының негізгі салаларын трансформациялауға бағытталған стратегиялық көзқарасын таныстырды. Компания өзінің патенттелген технологияларын іске асыруды жоспарлап отыр, бұл импортталған оқшаулау материалдарын (мысалы, тас жүн, шыны жүн және пенополистирол) толығымен жергіліктендірлген баламалармен алмастыруға мүмкіндік береді. Бұл шешімдер шығындарды 15%-ға азайтады, цемент және әктас сияқты жергілікті ресурстарды пайдалануға мүмкіндік береді, сондай-ақ жаңа жұмыс орындарын ашады.

«FP OilStop» деп аталатын экологиялық қауіпсіз өніміне ерекше назар аударылды. Бұл инновациялық материал мұнай төгінділерін жоюға және ластанған топырақты қалпына келтіруге арналған. Өнім Қазақстанда толығымен жергілікті ресурстарды, соның ішінде әктасты пайдалана отырып шығарылуы мүмкін, бұл елдің экологиялық тұрақтылық пен экономикалық тәуелсіздік мақсаттарына сәйкес келеді.

Елші Абзал Сапарбекұлы экономикалық және экологиялық басымдықтарды үйлестіретін мұндай бастамаларды Қазақстанның қолдауға дайын екенін атап өтті. Даниэль Пажитзцкий «Fullsulate»-тің Қазақстанмен ұзақ мерзімді ынтымақтастыққа ұмтылысын растап, екі ел арасындағы серіктестіктің елеулі әлеуетіне сенім білдірді.