Румынияда Қазақстан Тәуелсіздігінің 30 жылдығымен құттықтайды
2021 жылғы 26 тамыз, Крайова қаласы – Румынияда Қазақстан Тәуелсіздігінің 30 жылдығын мерекелеуге арналған бірқатар іс-шараларды өткізуді жалғастыру шеңберінде облыстық Кеңес басшылығының және Парламент депутаттарының, сондай-ақ мэрия, бизнес және академиялық топтар, БАҚ өкілдерінің қатысуымен дөңгелек үстел өтті.
Сөз сөйлеу барысында Елші Нұрбах Рүстемов қазіргі Қазақстан тарихындағы аса маңызды оқиғалар, Тұңғыш Президент – Елбасы Нұрсұлтан Назарбаевтың мемлекеттің қалыптасуындағы тарихи рөлі, әділ қоғам құруға және халықтың әл-ауқатын арттыруға бағытталған Президент Қасым-Жомарт Тоқаев бастамашы болған реформаларды демократияландыру мен іске асырудың ағымдағы процесі туралы хабардар етті.
Қазақстандық дипломат 30 жыл ішінде біздің еліміз экономикалық көрсеткіштердің жоғары өсіміне қол жеткізгенін және теңдестірілген және көпвекторлы сыртқы саясаттың арқасында халықаралық танымалдыққа ие болғанын атап өтті. Сонымен қатар, Елші Қазақстан халқы Ассамблеясының Қазақстан халқының бірлігіне қол жеткізуге ықпал еткен этносаралық келісімді нығайтудағы табысты рөлі туралы айтып берді.
Сонымен бірге, үлкен идеологиялық маңызы бар және қазақ халқының құндылықтары мен өзіндік ерекшеліктерін қайта жаңғырту болып табылатын "Рухани жаңғыру" мемлекеттік бағдарламасы атап өтілді.
Өз кезегінде, мерейтойымен құттықтай отырып, облыстық кеңес төрағасының орынбасары Михай Нэцу тәуелсіздік жылдары Қазақстан өзін сенімді серіктес және қарқынды дамып келе жатқан мемлекет ретінде көрсете отырып, халықаралық аренада әсерлі нәтижелерге қол жеткізгенін мәлімдеді.
Іс-шараға қатысушылар Қазақстан-Румыния қарым-қатынастарына ерекше назар аударды. Парламент депутаты Юлиан Бадя Қазақстанның Румынияның маңызды саяси және экономикалық әріптесі болып табылатынын, дипломатиялық қарым-қатынастар орнатылған сәттен бастап өзара іс-қимылдың барлық салалары бойынша ынтымақтастық белсенді дамып келе жатқанын айтты.
Тараптар пандемияның жаһандық дағдарысына қарамастан, Қазақстан мен Румыния екіжақты әріптестікті белсенді түрде ұлғайтуды жалғастырып жатқанын атап өтті. Бұл ретте, 2021 жылғы 9 қыркүйекте өткізу жоспарланған экономикалық және ғылыми-техникалық ынтымақтастық жөніндегі Үкіметаралық комиссияның 16-шы отырысы қосымша серпін береді деп көзделуде.
Іс-шара аясында "әлемдік қоғамдастық мойындаған Қазақстан" атты фотокөрме ұйымдастырылды, онда румын тарапы Қазақстанның көркем табиғатымен және жас елорда – Нұр-Сұлтан қаласының заманауи сәулетімен танысты.
Көпшіліктің назарын Семей ядролық полигонының фотосуреттері аударды. Н.Рүстемов 29 тамызда Елбасының Семей ядролық полигонын жабу туралы Жарлығының 30 жылдық мерейтойы атап өтілетінін айтты.
"Бұл тарихи шешім Қазақстанның ядролық қарудан азат әлем пайдасына қағидатты таңдауы болып табылады", - деді ол.
Сондай-ақ, қонақтар назарына румын тіліне аударылған Абай Құнанбайұлының "Қара сөздер", Елбасының "Тәуелсіздік дәуірі" кітаптары мен Мемлекет Басшысы 2020 жылғы 1 қыркүйектегі Жолдауымен кітапшалар ұсынылды.
2009 жылы «29 тамыз» БҰҰ Бас ассамблеясының 64-сессиясында "Ядролық сынақтарға қарсы іс-қимылдың халықаралық күні" болып бекітілді.