2015 жылдан бастап Бухарест қаласында жыл сайын Қазақстан киносы фестивалі өткізіліп келеді. Фестиваль аясында Қазақстанның белгілі режиссерлерінің туындылары көрсетіледі.
2017 жылдан бастап Қазақстан киносы күндері Констанца және Клуж-Напока қалаларында да өткізіліп келеді.
2020 жылғы 10 қыркүйекте Бухарест қаласының орталық аудандарының бірінде ұлы қазақ ақыны, ойшыл және ағартушы Абай Құнанбайұлының бюстін салтанатты түрде ашу рәсімі өтті.
2021 жылғы 22 наурызда Бухарест қаласында Құрманғазы атындағы Қазақ ұлттық консерваториясының концерті өтті.
2021 жылғы 10 қыркүйекте Бухарест қаласында «Қазақстан» алаңы және Астана қаласында ұлы румын ақыны Михай Эминескудің бюсті бір мезгілде салтанатты түрде ашылды.
2022 жылғы 29 маусымда Қазақстан Республикасының Президенті Қасым-Жомарт Тоқаевтың «Әке туралы ой-толғау» кітабының румын тіліндегі нұсқасының тұсаукесері өтті. Сол күні Румыния Президенті Клаус Йоханнистің «Pas cu Pas» («Қадам сайын») кітабының қазақ тіліне аударылған нұсқасы да таныстырылды.
2022 жылғы 12 қыркүйекте Клуж-Напока қаласындағы Ұлттық опера театрында Нұрғиса Тілендиев атындағы «Отырар сазы» академиялық фольклорлық-этнографиялық оркестрінің концерті өтті.
2024 жылғы 24 наурызда Бухарест қаласында Наурыз мерекесіне арналған салтанатты іс-шара өтті. Мерекелік бағдарлама аясында Астана қаласы Өнер академиясының қазақстандық музыканттарының қатысуымен концерт ұйымдастырылды.
2024 жылғы 11 қарашада Бухарест қаласындағы Ұлттық музыка университетінің опера залында Қазақстан Республикасының Республика күніне арналған салтанатты іс-шара өтті. Мерекелік бағдарлама Қазақстанның белгілі опера әншісі А. Желтыргузовтың концертімен жалғасты.
2025 жылғы 20 маусымда Бухарест қаласының Ұлттық кітапханасында ұлы қазақ ақыны, ойшылы және ағартушысы Абай Құнанбайұлының 180 жылдығына арналған салтанатты конференция өтті.
2025 жылғы 16 қазанда Қазақстан Республикасының Республика күні қарсаңында Бухарест қаласында Роза Бағланова атындағы «Қазақконцерт» мемлекеттік академиялық концерттік ұйымының «TURAN» этно-фольклорлық ансамблінің салтанатты концерті өтті.
2025 жылғы 25 қарашада «Kazakhstan: Born Bold» имидждік науқаны аясында румыниялық журналист Марина Алмашанның Қазақстан туралы «Қазақ даласынан тікелей Facebook-ке» атты кітабының тұсаукесері өтті. Бұған дейін Қазақстан Республикасының Румыниядағы Елшілігінің қолдауымен және «Rompetrol» компаниясының демеушілік көмегі арқасында Марина Алмашанның Қазақстанға сапары ұйымдастырылған болатын.
2026 жылғы 20 наурызда «Астана Балет» ұлттық хореография академиясының тәрбиеленушілері Бухарест қаласында Наурыз мерекесіне арналған іс-шара аясында өнер көрсетті.
Қазақстан Республикасында румын ұлттық-мәдени бірлестіктері жұмыс істейді. Атап айтқанда, Астана қаласында — «Димитрий Кантемир», Алматы қаласында — «Штефан Великий», Қарағанды қаласында — «Дачия», Павлодар қаласында — «Буковина» ұлттық-мәдени бірлестіктері қызмет атқарады.