ҚР Елшісі мен НАТО Бас хатшысының Арнайы өкілі ынтымақтастық мәселелерін талқылады

БРЮССЕЛЬ, 2022 жылғы 31 қаңтар - Қазақстанның Бельгиядағы Елшісі Марғұлан Баймұхан НАТО-ның Кавказ және Орталық Азия бойынша Бас хатшысының Арнайы өкілі Хавьер Коломинамен кездесті.

Әңгіме барысында Арнайы өкіл Қазақстандағы тәртіпсіздіктер барысында қаза тапқандарға көңіл айтты. Қазақстандық дипломат Х.Коломинаны Қазақстандағы соңғы оқиғалардың себептері мен салдары, сондай-ақ халықтың қауіпсіздігін қамтамасыз ету және елдегі қалыпты өмірді қалпына келтіру бойынша мемлекет қабылдаған шаралар туралы егжей-тегжейлі хабардар етті. Қазақстан билігі мұқият және толыққанды тергеу жүргізіп жатыр, оның нәтижелері әлемдік қоғамдастыққа ұсынылатын болады деп мәлімделді.

М.Баймұхан Қазақстан Президенті Қ. Тоқаевтың жаңадан құрылған ҚР Үкіметінің алдына қазақстандықтардың сапалы өмір сүру жағдайларын және елдің одан әрі табысты дамуын қамтамасыз ету жөнінде нақты міндеттер қойғанын атап өтті.

Сонымен қатар, тараптар "Бір серіктес – Бір жоспар" тұжырымдамасы аясындағы екіжақты ынтымақтастықтың жай-күйі мен перспективаларын, сондай-ақ Ауғанстандағы жағдайды қоса алғанда, жаһандық және өңірлік қауіпсіздіктің өзекті мәселелерін талқылады.