Қазақстандық спортшылар Бразилияда өтетін Сурдлимпиада ойындарында бақ сынайды

Кашиас-ду-Сул, 2022 жылғы 1 мамыр – Бразилияның Кашиас-ду-Сул қаласында XXIV жазғы Сурдлимпиада ойындары басталды. Олардың ашылу салтанатына Қазақстан Республикасының Бразилиядағы Елшілігі де қатысты.

Ойындарда 21 спорт түрінде 205 сыйлық жиынтығы ойналады. Оған әлемнің 100 елінен 3000-нан астам спортшы қатысады. Төртжылдықтың басты жарыстарында Қазақстанның намысын 100-ге жуық атлет қорғайтын болады, оның ішінде елордалық балалар мен жасөспірімдер спорт мектебінің тәрбиеленушілері де бар. Біздің спортшылар таеквондо, еркін және грек-рим күресі, каратэ, үстел теннисі, дзюдо, жеңіл атлетика, жүзу сияқты спорт түрлеріне қатысады. Самсундағы (Түркия) XXIII жазғы Сурдлимпиада ойындарының чемпионы, Әлем чемпионатының және көптеген халықаралық турнирлердің жүлдегері Таеквондист Аян Әбдіраш Қазақстанның туын алып жүру құрметіне ие болды.

24-ші Сурдлимпиада ойындары Халықаралық саңыраулар спорт комитетінің және Бразилия саңыраулар спорты конфедерациясының қолдауымен өтеді. Бұл іс-шараны өткізуге Бразилия азаматтығы министрлігі, Риу-Гранде штатының үкіметі, Кашиас-ду-Сул муниципалитеті, Кашиас-ду-Сул университеті қолдау көрсетеді.

Сурдлимпиада ойындары Оңтүстік Америкада алғаш рет өткізіліп отыр. Қазақстанның Бразилиядағы Елшілігі біздің спортшыларымыздың осы ауқымды спорт мерекесіне қатысуын құптайды және оларға тек жарыстарда жеңіс тілейді!