Қазақстан Республикасы Сыртқы істер министрінің орынбасары А.Айдаровтың Бразилияның жетекші "TV Supren" телеарнасына берген сұхбаты

Бразилиа, 2021 жылғы 25 қараша – Қазақстан Республикасы Сыртқы істер министрінің орынбасары Алмас Айдаров Бразилия Планетарлық одағының Президенті, бразилиялық "TV-Supren" телеарнасының басшысы Улисис Ридель дэ Ресенде интерью берді.

Қазақстандық дипломат Қазақстанның Тәуелсіздіктің 30 жылындағы негізгі жетістіктері туралы хабардар етіп, Қазақстан Республикасының Тұңғыш Президенті – Елбасы Нұрсұлтан Назарбаевтың Қазақстан мемлекеттілігінің қалыптасуы мен нығаюындағы тарихи рөліне ерекше назар аударды. Сондай-ақ, ол Мемлекет Басшысы Қасым-Жомарт Тоқаевтың "Халық бірлігі және жүйелі реформалар – елдің өркендеуінің берік негізі" атты Қазақстан халқына Жолдауы аясында саяси реформалардың сәтті жүзеге асырылуы туралы баяндады. Сонымен қатар, А.Айдаров арнаны Қазақстанның қазіргі әлеуметтік-экономикалық дамуы, елдің халықаралық экономикалық рейтингтері және Қазақстанның инвестициялық саясаты туралы хабардар етті.

Улисис Ридель Қазақстан Республикасының Тұңғыш Президенті – Елбасы Нұрсұлтан Назарбаевтың тұлғасына таңдана қарайтынын және оның ұлтаралық бірлікке, халықаралық қауіпсіздікті нығайтудың жаһандық процесіне, ядролық қаруды таратпауға қосқан үлесін жоғары бағалайтынын атап өтті.