Визалық сұрақтар:

• Қазақстан мен Словакия арасында визалық режим қолданылады.
• Словакияға кіру үшін Қазақстан Республикасының азаматтары Шенген визасын ресімдеуі қажет. Словакия Шенген аймағының бөлігі болып табылады, сондықтан бұл визаның болуы қатысушы елдер арасында еркін жүруге мүмкіндік береді.
• Шенген визаларының негізгі түрлері:
• Қысқа мерзімді виза (С санаты): туристік, іскерлік немесе жеке сапарларға арналған, максималды болу мерзімі 180 күн ішінде 90 күнге дейін.
• Ұлттық виза (D санаты): Словакияда оқу немесе жұмыс істеу секілді ұзақ уақыт болу үшін қажет.
• Қазақстан Республикасының жарамды жол жүру құжаттары: Ұлттық, қызметтік, дипломатиялық паспорттар.

Паспорттың жарамдылығы:

• Паспорттың жарамдылық мерзімі сапар аяқталғаннан кейін кем дегенде 6 айға дейін жарамды болу керек.

Кедендік бақылау:

• Қолма-қол ақша декларациясы: егер сіз 10 000 еуродан асатын немесе басқа валютадағы баламасы бар қолма-қол ақшаны (чектерді, жол аударымдарын және басқа ақша баламаларын қоса) әкелсеңіз немесе әкетсеңіз, сізге валюта туралы декларацияны толтыру қажет болады.
• Әкелуге және әкетуге тыйым салынған заттар: есірткілер мен психотроптық заттар, қару-жарақ пен оқ-дәрілер (тиісті рұқсатсыз), улы және қауіпті заттар, жалған құжаттар мен ақша, жануарлар мен өсімдіктер (тиісті рұқсатсыз сирек немесе жойылып кету қаупі төнген), ет, сүт өнімдері.
• Жабайы табиғаттың кейбір түрлерін, өсімдіктерді, сондай-ақ олардың бөліктерін (олардан жасалған бұйымдарды), егер олар халықаралық конвенциялардың (мысалы, CITES) қорғауында болса, әкелуге тыйым салынады.

Медициналық сақтандыру:

• Медициналық сақтандыру полисін сатып алуы сапар кезінде жазатайым оқиғадан сақтандыруға және сақтандыру жағдайы басталған кезде күтпеген медициналық шығындардан аулақ болуға мүмкіндік береді.

    «Туристі міндетті сақтандыру туралы»

Эпидемиялық ахуал:

• 2025 жылғы 25 Наурызда Словакия Үкіметі аусыл эпидемиясына — тұяқты жануарлардың жедел және жоғары жұқпалы инфекциясына байланысты бүкіл елде төтенше жағдай жариялады. Үш ірі қара мал шаруашылығында аурудың өршуі тіркелді. Бұған жауап ретінде сиыр, қой, ешкі және шошқа сияқты вирусқа сезімтал жануарлардың қозғалысына шектеулер енгізілді және бұл жануарларды басқа елдерге экспорттауға уақытша тыйым салынды.
• Вакцинация: Словакияға кіру үшін аусылға қарсы вакцинация туралы сертификат қажет емес, себебі бұл ауру адамға берілмейді.
• Шекарада тексеру: саяхатшылар шекарадан өту кезінде қосымша тексерулерге немесе карантинге жатпайды, егер олар шектеулі аймақтарда жануарлармен тікелей байланыста болмаса.

Қалыптасқан тәртіп нормалары:

• Словакияда болған кезде осы елдің заңдарын сақтау қажет. Заңнаманы білмеу жауапкершіліктен босатпайды. Сондықтан жол қозғалысы ережелері, қоғамдық көлікті пайдалану тәртібі және қоғамдық орындардағы мінез-құлық нормалары секілді күнделікті өміріңізге қатысты болуы мүмкін негізгі заңдармен танысу маңызды.
• Жалпы қабылданған этика мен мораль нормаларын ұстаныңыз. Словакияда сыпайылық, жеке кеңістікті құрметтеу және қоғамдық тәртіпті сақтау бағаланады. Мысалы, қоғамдық көлікте қарттарға, мүгедектерге және жүкті әйелдерге жол беру әдеттегідей.
• Словак тіліндегі негізгі сөздер мен сөз тіркестерін білу сіздің тұруыңызды жеңілдетеді және жергілікті тұрғындармен қарым-қатынасты ыңғайлы етеді. Ірі қалаларда көптеген адамдар ағылшын тілін түсінеді және сөйлейді, бірақ жергілікті тұрғындардың мәдениеті мен дәстүрлерін құрметтеу үшін словак тілінде бірнеше сөз тіркестерін үйрену пайдалы болады, мысалы:
• Dobrý deň — Қайырлы күн
• Ďakujem — Рақмет
• Prosím — Өтінемін
• Ako sa máte? — Қалыңыз қалай?
• Словакияда қоғамдық көліктерде, пойыздар мен вокзалдарда тыныштықты сақтау әдеттегідей. Мұндай жерлерде қатты тақырыптар туралы сөйлесу немесе телефондарды пайдалану көбінесе басқаларды құрметтемеу ретінде қабылданады.
• Мейрамханалар мен кафелерде шоттың 5-10% мөлшерінде шайлық қалдыру әдетке айналған. Кейбір жерлерде шайлықтар жиынтық сомаға қосылуы мүмкін, сондықтан қосымша ақша қалдырмас бұрын шотты тексеріңіз.

Пайдалы ақпарат:

• Словакияда Google Maps, Waze, MapsMe сияқты мобильді карталар арқылы оңай шарлауға болады. Интернет байланысы шектеулі жерлерде картаға кіру қажет болған жағдайда офлайн режимге арналған карталарды жүктеп алыңыз.
• Словакияда халықаралық төлем жүйелері кеңінен қолданылады Visa, Mastercard, және Maestro. UnionPay карталары соншалықты танымал болмауы мүмкін және оларды кейбір жерлерде қабылдау шектеулі болуы мүмкін. Дүкендерде, мейрамханаларда және қолма-қол ақшаны алу кезінде есеп айырысуды жеңілдету үшін Visa немесе Mastercard картасын алу ұсынылады.
• Словакияда ұялы байланысқа ыңғайлы болу үшін интернет қосылған жергілікті SIM картасын сатып алуға болады. Бұл тиімді және ыңғайлы, өйткені роумингтегі ұялы байланыс тарифтері жоғары болуы мүмкін. Orange, T-Mobile және O2 сияқты ірі операторлар туристер үшін жақсы мәмілелер ұсынады. Сондай-ақ, Қазақстанда роумингті қосуға болады, бірақ бұл қымбатырақ болуы мүмкін.
• Словакияның Братислава сияқты ірі қалаларында билетті қажет ететін ыңғайлы қоғамдық көлік жүйелері (трамвайлар, автобустар мен пойыздар) бар. Билеттерді автоматтардан сатып алуға немесе жол ақысын төлеу үшін мобильді қосымшаларды пайдалануға болады. Кейбір қалаларда сапарларға ақы төлеу үшін "байланыссыз карталар" жүйесі бар.

Шетелге оқуға, жұмысқа немесе тұрақты тұруға барған жағдайда

• Құжаттарыңызды алдын ала заңдастыру немесе апостиль қою керек. Бұл, ең алдымен, білім туралы құжаттарға, АХАТ органдары берген куәліктерге, мүліктік қатынастарға және әлеуметтік қамсыздандыру мәселелеріне қатысты құжаттарға қатысты.

Консулдық есеп туралы:

• Оқу, жұмыс немесе тұрақты тұру мақсатында шет мемлекетке келген қазақстандық азаматтарға жақын жердегі қазақстандық дипломатиялық өкілдікте немесе консулдық мекемеде консулдық есепке тұру ұсынылады.
• Консулдық есепке қою Қазақстанға бармай-ақ көптеген мәселелерді шешуге мүмкіндік береді (сайлау мен референдумдарға қатысу, паспортты ресімдеу, азаматтық хал актілерін тіркеу және т.б.), сондай-ақ болу мемлекетінде әскери іс-қимылдар, жаппай тәртіпсіздіктер, дүлей зілзалалар туындаған жағдайда сіздің эвакуацияңызды жеңілдетеді.

Құқық қорғау органдарымен ұсталған жағдайда сіздің іс-әрекетіңіз:

• Күтпеген жағдайлар туындаған жағдайда (жергілікті құқық қорғау органдарының ұстауы, басқа адамдар тарапынан қорқыту, жол-көлік оқиғалары және т.б.) Сіз болу мемлекетінде қазақстандық консулдық мекеменің қызметкерімен кездесуді талап етуге құқығыңыз бар.
• ҚР консулдық мекемесінің қызметкерлері болмаған кезде шет тілінде қандай да бір Хаттамаларға және өзге де құжаттарға қол қоймаңыз.