Швейцария Қазақстанға озық еуропалық технологияларды тартуға жәрдемдесуде

Цюрих, 2024 жылғы 17 мамыр – Қазақстанның Швейцариядағы Елшісі Қайрат Саржанов қазақстандық «Rail Go» компаниясы мен неміс «WAGNER Rail» арасындағы Қазақстанда шығарылатын «Stadler Rail» швейцариялық жолаушылар вагондарын өртке қарсы қорғаныспен жабдықтау жөніндегі келісімшартқа қол қою рәсіміне қатысты.

«Қазақстан Темір жолы» ҰК швейцариялық «Stadler Rail» теміржол жылжымалы құрамының өндірушісімен бірлесіп Қазақстанда жаңа жолаушылар вагондарын құрастыру жобасын іске асыруда.

Қазақстан Елшісі тараптарды шартқа қол қоюмен құттықтап, қазақстандық нарыққа жаңа еуропалық әріптестерді тартудың маңыздылығын атап өтті. Ол Қазақстанның көлік және логистика саласындағы өнеркәсіптік және инфрақұрылымдық дамуын күшейтуде, сондай-ақ еліміздегі вагон паркінің техникалық жағдайын жақсартуда, жолаушылардың қауіпсіздігі мен жайлылығын арттыруда Қазақстан мен Швейцарияның бірлескен жобасының стратегиялық маңыздылығына ерекше назар аударды.

«Қазақстан Темір Жолы» ҰК мен «Stadler Rail AG» компаниясы арасындағы стратегиялық ынтымақтастық туралы келісімге 2021 жылғы 29 қарашада ҚР Президенті Қ.К.Тоқаевтың Швейцарияға ресми сапары барысында қол қойылды. 2022 жылдың желтоқсанында ҚТЖ мен Stadler Rail жалпы 537 вагон жеткізуге, оларға 20 жыл бойы қызмет көрсетуге және өндірісті оқшаулауға арналған ұзақ мерзімді шарттарға қол қойды.

«Stadler Kazakhstan» ЖШС-ның өндірістік алаңы «Астана-жаңа қала» АЭА-да орналасқан.