Неміс саясаткерлер мен сарапшылар Қазақстанның сыртқы саяси бастамаларын талқылады

БЕРЛИН, 2022 жылғы 14 қазан – бүгін Қазақстанның Германиядағы Елшілігінің бастамасы бойынша неміс саясаткерлері мен сарапшыларының қатысуымен «Қазақстанның бейбіт сыртқы саясаты. АӨСШК-нің VI Саммиті мен Әлемдік және дәстүрлі діндер көшбасшыларының VII съезінің қорытындылары» тақырыбындағы дөңгелек үстел өтті.

Іс-шараны аша отырып, Қазақстанның Германиядағы Елшісі Н.Онжанов тәуелсіздік алған жылдары ішінде Қазақстан халықаралық қоғамдастықтың белсенді және жауапты мүшесіне айналғанын және бейбіт сыртқы саясатын белгілейтін бірқатар халықаралық бастамаларын ұсынғанын атап өтті.

Ол қатысушыларды Астанада өткен Әлемдік және дәстүрлі діндер көшбасшыларының VII съезі туралы және съезде қабылданған Декларацияның негізгі ережелері туралы хабардар етті. Бұл мәнмәтінде Рим Папасы Франциск Қазақстанның ұлтаралық және дінаралық диалогты ілгерілетуге қосып жатқан үлесін жоғары бағалағаны атап өтілді.

Сонымен қатар, қазақстандық дипломат бір күн бұрын Астанада өткен Азиядағы өзара іс-қимыл және сенім шаралары жөніндегі кеңесінің VI саммитінің қорытындылары туралы егжей-тегжейлі хабарлады. Ол АӨСШК-тің беделі жылдан-жылға артып келе жатқанын, платформаның өзі азиялық континентте көпжақты ынтымақтастықтың тетігі ретінде сәтті орныққанын атап өтті.

Неміс сарапшылары бірауыздан Қазақстанның көпвекторлы саясаты дәл қазіргі жағдайда өзінің тиімділігін көрсетіп жатқанын және мемлекеттің түрлі саяси, діни және этникалық тараптар арасында диалог орнатуға күш-жігері, сондай-ақ өзінің көршілес елдерімен және аймақтық құрылымдармен бейбітшіл өмір сүруге ұмтылуы ерекше оң қасиет болып табылатынын атап өтті.

Журналист және Орталық Азия бойынша сарапшы Б.Ветцель қазіргі күрделі халықаралық жағдайда да Қазақстан Үкіметі өзінің дәстүрлі көпвекторлы сыртқы саясатын алға бастыруға жағдай жасап жатқанын атап өтті. Қазақстан мен Еуропа арасындағы ынтымақтастықтың экономикалық мүмкіндіктері туралы айта отырып, ол қазақстандық энергияны Әзірбайжан немесе Орталық Азия арқылы әлемдік нарыққа тасымалдаудың баламалы бағыттарын дамытудың маңыздылығына назар аударды.

АӨСШК қызметі туралы айта отырып, іс-шараға қатысушылар бұл құрылым 30 жыл ішінде Азия континентінде бейбітшілікті, қауіпсіздікті, тұрақтылық пен өркендеуді ілгерілету үшін көпжақты ынтымақтастық механизмі ретінде сәтті жүзеге асырылып келе жатқанын атап өтті.

Саясаттанушы А.Рар: «Қазір бізде әлемде рөлі артқан жаңа Азия бар. Бірақ қазіргі көпполярлы жүйе үшін бейбітшілікті сақтау мәселесі өзекті болып қала береді. ЕҚЫҰ-дан айырмашылығы, АӨСШК жауапкершілік аймағында шешуді қажет ететін көптеген нақты проблемалар бар (Ауғанстан, Ирак, Сирия, Йемен, Әзірбайжан мен Армения арасындағы қақтығыс және т.б.). Осыған байланысты мен Азияда сенім орнату маңызды деп есептеймін және континент үшін ынтымақтастықтан басқа балама жоқ».

Германияның бұрынғы елшісі, Орталық Азия бойынша сарапшысы А.Зайферт өз бағаларында Шанхай ынтымақтастық ұйымына ерекше тоқталып, «Орталық Азия – оның жүрегі» екенін, оның сыртқы саясатта үлкен рөл атқаратынын атап өтті.

Іс-шара барысында Қазақстан мен Германия арасындағы экономика, білім беру және жастар алмасу саласындағы ынтымақтастықты арттыру мәселелері де талқыланды.