Қазақстан Республикасы Парламентінің Мәжілісі мен Сербия Халықтық Скупщинасының парламентаралық достық топтары депутаттарының кездесуі туралы

Белград, 2021 жылы 15 маусым – Екіжақты парламентаралық ынтымақтастықты нығайту жөніндегі қызмет аясында Қазақстан Республикасы Парламенті Мәжілісінің «Қазақстан Республикасы – Сербия Республикасы» ынтымақтастық тобының депутаттары мен Сербия Республикасының Халықтық Скупщинасының Қазақстанмен достық тобының депутаттары арасында онлайн форматта жұмыс кездесуі өтті.

Келіссөздер барысында тараптар екі ел арасындағы қарым-қатынастардың дәстүрлі достық сипатта дамып келе жатқандығын атап өтті.

Депутаттар өз елдеріндегі ішкі саяси және әлеуметтік-экономикалық жағдай туралы, COVID-19 таралуына қарсы іс-қимыл жөніндегі шаралар барысы жөнінде ақпарат алмасты.

Қазақстан Парламентінің мүшелері сербиялық әріптестерін ҚР Президенті Қасым-Жомарт Тоқаевтың бағытына сәйкес Қазақстанда жүзеге асырылып жатқан саяси және әлеуметтік-экономикалық реформалар туралы хабардар етті. Еліміздегі азаматтық қоғамды одан әрі реформалау мәселелеріне ерекше назар аударылды.

Парламентаралық ынтымақтастықты нығайту тақырыбын талқылай отырып, екі ел депутаттары парламенттік дипломатия шеңберіндегі өзара іс-қимылды жандандыру туралы екіжақты бастамамен келісті. Атап айтқанда, ұлттық парламенттерде құрылған достық топтары депутаттарының өзара сапарларын ұйымдастыру мәселесі сөз болды.