Қазақстанда Республика күні атап өтіледі

25 қазанда Қазақстанда ұлттық мереке – Республика күні атап өтіледі.
1990 жылғы 25 қазанда Қазақстанның мемлекеттік егемендігі туралы Декларация қабылданды. Декларацияда Қазақ КСР-нің егемендігі жарияланып, Қазақстанның тәуелсіз мемлекет ретіндегі саяси-құқықтық негіздері жарияланды. Онда тұңғыш рет аймақтың тұтастығы, бөлінбейтіндігі және мызғымастығы, халықтар мен олардың тілдерінің мәдениетін дамыту, ұлттық бірегейлікті нығайту сияқты мемлекеттіліктің қағидалары бекітілді.
25 қазан 2001 жылы мемлекеттік мерекелер тізіміне енді. 2009 жылы еліміздің Тұңғыш Президентінің Жарлығымен Республика күні мемлекеттік мерекелер тізімінен алынып тасталды.
2022 жылғы 16 маусымдағы Ұлттық Құрылтайдың бірінші отырысында сөйлеген сөзінде Қазақстан Президенті Қасым-Жомарт Тоқаев Республика күніне ұлттық мереке мәртебесін қайтаруды ұсынды.
Қыркүйек айында Қазақстан Республикасы Парламенті Сенатының депутаттары Мәжілістен кейін «Қазақстан Республикасының кейбір заңнамалық актілеріне кинематография, мәдениет және мерекелер мәселелері бойынша өзгерістер мен толықтырулар енгізу туралы» Заңды қабылдады. Атап айтқанда, «Қазақстан Республикасындағы мерекелер туралы» заңға өзгертулер енгізіліп, Республика күні 25 қазанда мемлекеттік мереке, ал Тәуелсіздік күні 16 желтоқсанда мемлекеттік мереке болып белгіленді.