Қазақстан Елшісі брифингке қатысты

АШҒАБАТ, 2021 жылғы 29 қараша – Бүгін "Қарақұм" қонақ үйінде Экономикалық Ынтымақтастық Ұйымының 15-ші саммитінің қорытындысына арналған брифинг өтті.

Брифингке Түрікменстанда тіркелген дипломатиялық миссиялардың және халықаралық ұйымдар өкілдіктерінің басшылары мен қызметкерлері, жергілікті бұқаралық ақпарат құралдарының басшылары мен өкілдері және Түрікменстанда аккредиттелген журналистер, сондай-ақ шетелдік БАҚ өкілдері қатысты.

Брифингті Түрікменстанның Сыртқы істер министрі Рашид Мередов кіріспе сөзімен ашты. Брифинг барысында Экономикалық Ынтымақтастық Ұйымының Бас хатшысы Хусрав Нозири де сөз сөйледі. Сонымен қатар, Түрікменстандағы БҰҰ-ның Тұрақты үйлестірушісі, Түрікменстандағы Еуропалық Одақтың Төтенше және Өкілетті Елшісі және Ашғабаттағы ЕҚЫҰ Орталығының Басшысы сөз сөйледі.

Саммит шеңберінде ЭЫҰ-ны серпінді және тиімді өңірлік экономикалық құрылымға айналдыру мақсатында өзара мүдделі барлық салалардағы ынтымақтастық қарқынын едәуір жеделдету туралы уағдаластыққа қол жеткізілгені, оның ішінде көлік және энергетика саласындағы ынтымақтастыққа басым көңіл бөлінгені атап өтілді.

Брифингке қатысушылар осы саммиттің қорытындысы бойынша іс-қимыл жасау үшін Ашғабат Консенсусын қабылдау ЭЫҰ-ға мүше мемлекеттер арасындағы өзара тиімді ынтымақтастықты жандандыруға, жалпы қауіпсіздік пен тұрақтылықты қамтамасыз етуге ықпал ететінін, сондай-ақ өңір елдерінің экономикалық дамуына серпін беретінін атап өтті.