Жалпы мағлұмат
1991 жылғы 16 желтоқсанда Түркия Қазақстанның тәуелсіздігін ең алғашқы ел болып таныды.
1992 жылдың 2 наурызында екі ел арасында дипломатиялық қатынастар орнатылды.
2022 жылғы 15 наурыздан бастап Еркебұлан Сәпиев ҚР-ның Түркиядағы Төтенше және Өкілетті Елшісі қызметін атқарады.
2020 жылғы 13 қаңтардан бастап Уфук Екиджи Түркияның Қазақстандағы Елшісі қызметін атқарады.
Саяси ынтымақтастық
Егемен еліміздің шетелдегі алғашқы дипломатиялық өкілдігі - Қазақстан Республикасының Түркиядағы Елшілігі 1992 жылы қазанда ҚР Тұңғыш Президенті Президенті – Елбасы Н.Назарбаевтың Түркияға алғашқы ресми сапары кезінде ашылды.
Қазақстанның Ыстанбұлда және Анталияда Бас консулдығы, сондай-ақ Денизли, Алания, Бурса, Битлис, Хатай, Кония және Мерсин қалаларында 7 Құрметті консулдары жұмыс істейді.
Түркияның Алматыда және Ақтауда Бас консулдықтары, Шымкентте Құрметті консулдығы қызмет атқарады. Қазіргі уақытта, ТР-дың Түркістан қаласында Бас консулдығын ашу жұмыстары жүргізіліп жатыр.
Ең жоғары деңгейдегі кездесулер:
Тәуелсіздікке қол жеткізген сәттен бастап, ҚР Тұңғыш Президенті – Елбасы Н.Назарбаев Түркияға 24 рет мемлекеттік, ресми және жұмыс сапарларымен барды. Түркия президенттері Қазақстанға сапармен 16 рет, ал ТР Премьер-министрлері 6 рет келді.
ҚР Тұңғыш Президенті - Елбасы Н.Назарбаевтың 2009 жылы 21-23 қазанда Түркияға жасаған ресми сапары барысында Стратегиялық әріптестік туралы келісімге қол қойылды.
2012 жылы 22-24 мамырда Түркия Премьер-Министрі Р.Т.Ердоғанның Қазақстанға ресми сапары шеңберінде Жоғары деңгейлі стратегиялық ынтымақтастық кеңесін құру туралы Бірлескен мәлімдемеге және «Жаңа синергия» ортақ экономикалық бағдарламасына қол қойылды.
2012 жылы 11-12 қазанда Елбасының Түркия Республикасына ресми сапары барысында ҚР мен ТР арасындағы Жоғары деңгейлі стратегиялық ынтымақтастық кеңесінің 1-ші отырысы өткізілді. Түркия Президенті Р.Т.Ердоғанның 2015 жылы сәуірде Қазақстанға жасаған ресми сапары шеңберінде Жоғары деңгейлі стратегиялық ынтымақтастық кеңесінің 2-ші отырысы өтті.
2018 жылы 9 шілдеде ҚР Премьер-Министрі Б.Сағынтаев Түркияның жаңадан сайланған Президенті Р.Т.Ердоғанның инаугурациясына қатысты.
2018 жылы 12-13 қыркүйекте ҚР Президенті Н.Назарбаев Түркияға ресми сапары барысында Жоғары деңгейлі стратегиялық ынтымақтастық кеңесінің 3-ші отырысына қатысты.
2021 жылы 12 қарашада Ыстанбұлда өткен Түркі кеңесінің 8-ші Саммитіне қатысу үшін ҚР Президенті Қ.К.Тоқаевтың Түркияға жұмыс сапары өтті.
2022 жылы 10-11 мамырда ҚР Президенті Қ.К.Тоқаевтың Түркияға мемлекеттік сапары өтті. Сапардың қорытындысы бойынша екі ел арасындағы «Кеңейтілген стратегиялық серіктестік туралы бірлескен мәлімдемеге», сондай-ақ, 6 үкіметаралық және 8 ведомствааралық құжаттарға қол қойылды.
2022 жылы 12-13 қазанда ТР Президенті Р.Ердоғанның Қазақтанға мемлекеттің сапары мен Жоғары деңгейлі стратегиялық ынтымақтастық кеңесінің 4-ші отырысы өтіп, 6 ведомствоаралық құжаттарға қол қойылды. Сапар аясында, ТР Президенті 6-шы АӨСШК Саммитіне қатысты.
Парламентаралық ынтымақтастық
2018 жылы 20-21 қарашада ҚР Парламенті Мәжілісінің төрағасы Н.Нығматуллин Измирде ұйымдастырылған ТүркПА-ның 8-ші пленарлық отырысына қатысты.
2019 жылы 24 қыркүйекте Түркия Ұлы Ұлттық Мәжілісінің төрағасы Мұстафа Шентоп Нұр-Сұлтанда өткен «Үлкен Еуразия: Диалог. Сенім. Серіктестік» атты Еуразия Парламенттері Төрағаларының 4-ші кездесуіне қатысты.
2021 жылы 26-27 қыркүйекте ТҰҰМ Төрағасы М.Шентоп бастаған делегацияның Қазақстанға ресми сапары өтіп, Түркістан қаласында өткен ТүркПА-ның 10-шы пленарлық отырысына қатысты.
2022 жылы 29 қыркүйек – 2 қазан аралығында Түркияның Изник елді-мекенінде 4-ші Дүниежүзілік көшпенділер ойындарына ҚР Парламенті Мәжілісінің Төрағасы Е.Қошанов бастаған делегация қатысты. Іс-шара аясында ҚР Парламенті Мәжілісінің Төрағасының Түркия Президенті Р.Ердоғанмен кездесуі өтті.
Сыртқы саяси мекемелер арасындағы ынтымақтастық
2018 жылы 19-20 сәуірде ҚР Сыртқы істер министрі Қ.Әбдірахманов Түркияға ресми сапармен барды.
2019 жылы 24 мамырда ТР Сыртқы істер министрі М.Чавушоғлудың Қазақстанға сапары өтті.
2021 жылы 17-18 наурызда ҚР Премьер-Министрінің орынбасары - Сыртқы істер министрі М.Тілеубердінің Түркияға ресми сапары өтті. Сапар барысында Қазақстан-Түркия бірлескен стратегиялық жоспарлау тобының 6-шы отырысы болды.
2021 жылы 17-20 маусымда ҚР Премьер-Министрінің орынбасары - Сыртқы істер министрі М.Тілеуберді «Анталия Дипломатия Форумына» қатысу мақсатында Түркияға сапармен барды.
2021 жылы 26-27 қыркүйекте Министр М.Тілеуберді Ыстанбұл қаласында өткен Түркітілдес мемлекеттердің ынтымақтастық кеңесі Сыртқы істер министрлері кеңесінің Ауғанстандағы ахуал бойынша кезектен тыс отырысына қатысты.
2021 жылы 11-12 қазанда Астанада АӨСШК сыртқы істер министрлерінің 6-шы кездесуіне Түркия Сыртқы істер министрінің орынбасары С.Өнал қатысты.
2021 жылы 11 қарашада Ыстанбұлда өткен Түркі кеңесі Сыртқы істер министрлер кеңесінің отырысына ҚР Премьер-Министрінің орынбасары - Сыртқы істер министрі М.Тілеуберді қатысты.
2022 жылы 24 ақпанда Түркия Сыртқы істер министрі М.Чавушоғлудың Қазақстанға сапары мен Қазақстан-Түркия Бірлескен стратегиялық жоспарлау тобының 7-ші отырысы өтті.