Анкарада «Қымыз фестивалі» өтті
Анкара, 2023 жылғы 21 мамыр – Халықаралық ТҮРКСОЙ ұйымы, Қазақстан Республикасының Мәдениет және спорт министрлігі мен Қазақстанның Анкарадағы Елшілігінің бірігіп ұйымдастыруымен қымызға арналған Халықаралық «Қымыз Fest» өтті.
Іс-шараға ТҮРКСОЙ ұйымының Бас хатшысы Сұлтан Раев, Қазақстан Республикасының Түркиядағы Елшісі Еркебұлан Сәпиев, Астана қаласынан «Ұлы тағзым» қоғамдық ұйымы директорының орынбасары Нұрлан Омаров, Дүниежүзі қазақтарын дамыту қорының төрағасы Ерлан Байын, қазақ диаспорасы мен зиялы қауым өкілдері, қазақстандық студенттер, Анкараның жергілікті халқы мен бұқаралық ақпарат өкілдері қатысты.
Фестивальдің ашылуында сөз алған Қазақстан Елшісі Е.Сәпиев қазақ халқының салт-дәстүрі мен әдет-ғұрпын дәріптейтін мұндай фестиваль биыл Анадолының жүрегі Анкарада алғаш рет өткізіліп отырғанын, жалпы қымыз - түркі мәдениетінің маңызды бір бөлігі болып табылатынына назар аударып, Қазақстанда «Қымыз Fest» мереке ретінде аталып өтілетінін баяндады.
Бас хатшы С.Раев өзінің сөзінде «бүгін Түркі әлемінің ортақ дәстүрі болып табылатын дәмді қымыз сусынын таныстыру мақсатында осындай фестивальдің алғаш рет ұйымдастырылып отырғанына қуанышын білдіріп, қымыз – түркі халықтарына ғасырлар бойы серік болған жылқы сүтінен жасалған, қымыз-қазақ-қырғыз ажырамас ұғымдар», - деді.
Н.Омаров сөзінде бүгінгі Қымыз мерекесі алғаш рет ресми түрде Қазақстаннан тыс бауырлас Түркия елінде өтуі - екі бауырлас елдің тарихында із қалдыратын оқиға екенін, «Қымыз мерекесі» Еуропа мен Қытай елдерінің тарихшылар мен саяхатшыларының жазба деректерінде жазылғанын және жалпы Түркі халықтарының ең басты мерекесі болып табылатынын баяндады.
Іс-шара барысында көрермендер Қазақ халқының ұлттық сусыны - қымыздың әзірлену жолдарымен танысты. Алдыменен желбау тартылды, құлындар байланды, бие сауылды, саумал күбіге құйылды, қымыздың әзірлену жолдары көрсетілді.
Фестивальде қатысқан қонақтарға қымыз бен қазақтың дәстүрлі тағамдары ұсынылды және қазақтың әні мен күйі орындалды.
Қымыз фестивалі келген қонақтар мен жергілікті халық тарапынан үлкен қызығушылыққа ие болды. Қазақстан мен Түркияның бұқаралық ақпарат құралдарында кеңінен жарияланды.