Қазақстан Елшісі Эфиопия Президентімен кездесу өткізді

Аддис-Абеба, 2025 жылғы 26 ақпан – Қазақстанның Эфиопия мен Кениядағы (қоса атқарушы) Елшісі, Қазақстан Республикасының Африка Одағындағы Тұрақты Өкілі Барлыбай Садықов Эфиопия Президенті мырза Тайе Атске-Селассиемен кездесу өткізді. 

Кездесу барысында тараптар екіжақты күн тәртібіндегі, оның ішінде саяси, сауда-экономикалық және мәдени-гуманитарлық ынтымақтастықты дамыту, сондай-ақ халықаралық ұйымдар шеңберіндегі өзара іс-қимыл мәселелерінің кең ауқымын талқылады. Өзара тиімді әріптестікті тереңдетуге бағытталған жобаларды іске асыру перспективалары қарастырылды.

Эфиопия Президенті Тайе Атске-Селассие Қазақстанның Әлемдік және дәстүрлі діндер лидерлерінің VIII съезін және Астана экономикалық форумын өткізу жөніндегі бастамаларын жоғары бағалап, Эфиопия өкілдерінің осы маңызды іс-шараларға қатысатынын растады.

Мемлекет басшысы әлемдегі күрделі геосаяси жағдай кезінде  бірлік пен келісімге қол жеткізудің маңыздылығын атап өтіп, мәдениеттер мен діндер арасындағы диалогты ілгерілетуде және жаһандық қоғамдастық алдында тұрған сын-қатерлерге шешім табуда Қазақстанның маңызды үлесін ерекше атап өтті.

Кездесу соңында тараптар Қазақстан мен Эфиопия арасындағы әріптестікті одан әрі дамытуға, сондай-ақ бейбітшілік, тұрақтылық және тұрақты дамуды нығайтуға бағытталған бірлескен бастамаларды сәтті іске асыруға сенімділік білдірді.