Руанда Қазақстанмен сауда-экономикалық қатынастарды дамытуды жоспарлап отыр
Астана, 2023 жылғы 9 маусым –Қаржы және экономикалық жоспарлау министрі Уззиэль Ндағиджимана бастаған Руанда делегациясы Астана Халықаралық форумына қатысу үшін Қазақстанға келді.
Руанда министрі форумның пленарлық сессиясына қатысты, сонымен қатар «Қаржының алдыңғы қатарында: инновация тұрақты дамудың қозғаушы күші ретінде» тақырыбы бойынша панельдік сессияда спикер ретінде сөз сөйледі. Өз сөзінде ол Руанданың тұрақты дамуы және экономикада терең реформалар жүргізу тәжірибесімен бөлісті. Халықаралық сарапшылар Руанданы елдің тұрақты даму және экономикалық прогресс саласындағы жетістіктері үшін жиі «Африка арыстаны» деп атайды.
Сарапшылар азаматтардың табысын арттыру бойынша нақты мақсаттар белгілейтін ақылды басқару мен ауқымды реформалардың арқасында қол жеткізілген елдің қауіпсіздігінің, тұрақтылығы мен дамуының жоғары деңгейін атап өтті. Атап айтқанда, Руанда 2035 жылға қарай орташа табысы бар елдер тізіміне және 2050 жылға қарай жоғары табысы бар елдер тізіміне кіруді жоспарлап отыр.
Форум шеңберінде Ұ.Ндағиджимана ҚР Ұлттық экономика министрі Әлібек Қуантыровпен екіжақты кездесу өткізді. Тараптар экономикалық өзара іс-қимылдың жай-күйі мен перспективаларын талқылады, өзара мүдделілік білдіретін барлық бағыттар бойынша ынтымақтастықты жандандыруға жәрдемдесуге уағдаласты.
Сонымен қатар, Руанда министрі ҚР сауда және интеграция вице-министрі Қайрат Төребаевпен екіжақты кездесу өткізді. Келіссөздердің негізгі тақырыбы өзара сауда көлемін ұлғайту және жүктерді жеткізу бойынша логистикалық жолдарды дамыту жай-күйі мен перспективаларын талқылау болды. Руанда, Қазақстан секілді, теңізге шыға алмайтын ел болып табылады және екіжақты экономикалық байланыстар құру кезінде прагматизм мен өзара тиімділікке басымдық бере отырып, көпжақты сыртқы экономикалық саясатты ұстанады.
Жалпы, тараптар Қазақстан мен Руанданың сауда-экономикалық ынтымақтастығының әлеуетін жоғары бағалады және іскерлік байланыстарды дамыту және өзара сауда көлемін ұлғайту үшін өз деңгейінде күш салуға уағдаласты.