АЙМАҚ БАСШЫСЫ АҚЖАЙЫҚ АУДАНЫНДА ЖЕРГІЛІКТІ ӨНДІРУШІЛЕРДІҢ КӨРМЕСІМЕН ТАНЫСЫП, ТҰРҒЫНДАРМЕН КЕЗДЕСТІ
Облыс әкімі Нариман Төреғалиев Ақжайық ауданына жұмыс сапарымен барды. Сапарға Қазақстан Халық Кеңесінің мүшесі Мұрат Мұқаев және басқарма басшылары қатысты.
Аудандық мәдениет үйінде жергілікті тауар өндірушілердің көрмесі таныстырылды. «Ауыл аманаты» бағдарламасына қатысушылар мен мемлекет тарапынан қайтарымсыз қаржы алған азаматтар ет, сүт, бау-бақша және бал шаруашылығы өнімдерін ұсынды. Сондай-ақ қолөнер шеберлері «Құрақfest» іс-шарасының нәтижелерін таныстырып, «Тосапfest» қатысушылары табиғи өнімдерін көрсетті. Аталған фестивальдер аудан тұрғындары мен қонақтарының қызығушылығын тудырды.
Аймақ басшысы жергілікті тауар өндірушілерді мемлекеттік бағдарламаларды тиімді пайдаланып, кәсіп аясын кеңейтуге шақырды.
Сапар барысында облыс әкімі аудан тұрғындарымен кездесіп, өңірдің әлеуметтік-экономикалық дамуы мен алдағы міндеттер туралы баяндады. Аудан әкімі Мұрат Сердалин Жұбан елінде атқарылған жұмыстар жөнінде есеп берді. Тұрғындар ауданның даму бағыттарын оң бағалады.
Кездесуден кейін облыс әкімі азаматтарды жеке мәселелері бойынша қабылдады.
ҚАЗАҚСТАН ХАЛЫҚ КЕҢЕСІНІҢ КОМИССИЯ ОТЫРЫСЫ ӨТТІ
Қазақстан Халық Кеңесінің Өңірлік даму және жергілікті өзін-өзі басқару комитеті Өңірлік даму және кәсіпкерлікті қолдау мәселелері жөніндегі комиссиясының алғашқы отырысы өтті. Іс-шараға комиссия басшысы Нұртай Сабильянов төрағалық етті.
Жиынға Қазақстан Халық Кеңесінің Өңірлік даму және жергілікті өзін-өзі басқару комитетінің төрағасы Табиғат Зейнұлқабден, Қазақстан Халық Кеңесінің мүшесі Мұрат Мұқаев және комиссия мүшелері қатысты.
Мемлекет басшысы Қасым-Жомарт Тоқаевтың тапсырмалары аясында қатысушылар өңірлердің әлеуметтік-экономикалық даму мәселелерін талқылап, бірқатар бастама көтерді.
Атап айтқанда, жергілікті инфрақұрылымның сапасын арттыру, кәсіпкерлікті қолдау, сондай-ақ азаматтардың өтініштері негізінде нақты ұсыныстар әзірлеу мәселелеріне баса назар аударылды.
АЙМАҚ БАСШЫСЫ ЖАҢАҚАЛА АУДАНЫНДАҒЫ ОҢАЛТУ ОРТАЛЫҒЫНЫҢ ЖҰМЫСЫМЕН ТАНЫСТЫ
Батыс Қазақстан облысының әкімі Нариман Төреғалиев Жаңақала ауданына жұмыс сапары барысында «Ауданаралық сауықтыру ауруханасы» оңалту орталығына барды. Сапарға Қазақстан Халық Кеңесінің мүшесі Мұрат Мұқаев пен тиісті басқарма басшылары да қатысты.
Өңір басшысы медициналық мекеменің тыныс-тіршілігімен, емделушілерге көрсетілетін қызмет түрлерімен және оңалту шараларының ұйымдастырылуымен танысты.
2009 жылы ашылған мамандандырылған медициналық мекеме 100 орынға лайықталған. Қазіргі таңда орталықта 109 қызметкер еңбек етеді.
Мекемеде емдік дене шынықтыруға басымдық берілген. Сонымен қатар тұзды шахта, оттекті коктейль, балшықпен, парафин және озокеритпен емдеу, балқарағай фитобөшкесі, «Гольфстрим» гидротерапиялық ваннасы, уқалау және физиотерапиялық емдеу әдістері қолданылады.
Орталықтың жұмысы тұрғындардың денсаулығын нығайтуға, аурудан кейінгі қалпына келуіне және сапалы оңалту қызметтеріне қолжетімділігін арттыруға бағытталған.
ҚАЗАҚСТАН ХАЛЫҚ КЕҢЕСІНІҢ ҚЫЗМЕТІ МЕН ӨҢІРДІҢ ӨЗЕКТІ МӘСЕЛЕЛЕРІ ТАЛҚЫЛАНДЫ
Қазақстан Халық Кеңесінің мүшесі Мұрат Мұқаев облыстың Қоғамдық кеңес төрағасы Бауыржан Атауовтың, Қазақстан Халық Кеңесінің мүшесі Шолпан Қоспаеваның және экология мәселесіне қатысты құзырлы мемлекеттік орган басшыларының, сарапшылардың, қатысуымен кездесу өткізді.
Кездесу барысында Қазақстан Халық Кеңесінің негізгі міндеттері, қызмет бағыттары мен қоғамдық маңызы туралы ақпарат берілді. Кеңестің ел дамуына қатысты өзекті мәселелерді көтерудегі және қоғам мен мемлекет арасындағы байланысты нығайтудағы рөлі түсіндірілді.
Сонымен қатар, Қазақстан Халық Кеңесінің Өңірлік даму және жергілікті өзін-өзі басқару комитетінің экология жөніндегі комиссиясының жоспарына енгізілетін өңірдегі түйткілді мәселелер талқыланды.
Жиында Мемлекет басшысының «Таза Қазақстан» жалпыұлттық экологиялық бастамасы аясында атқарылып жатқан жұмыстар, қалалық қатты тұрмыстық қалдықтар полигоны, қоршаған ортаны қорғау және киік мәселелері бойынша пікір алмасты.
Сондай-ақ, Мұрат Мұқаев қатысушылардан өңірде шешімін күткен, республикалық деңгейде қарауды қажет ететін мәселелер бойынша ұсыныстарын білдіруді сұрады. Қатысушылардың пікірлері тыңдалып, жергілікті мәселелерді орталық деңгейде көтеру мүмкіндіктері қарастырылды.
Осындай кездесулерді жүйелі түрде өткізу, өңірдің өзекті мәселелерін зерделеуге, азаматтардың ұсыныстарын жинақтауға және оларды республикалық деңгейде қарауға жол ашатынын жеткізді. Басты мақсат – қоғам мен мемлекет арасындағы өзара байланысты нығайту және ел игілігіне бағытталған бастамаларды қолдау.
ҚАЗАҚСТАН ХАЛЫҚ КЕҢЕСІНІҢ ТӨРАҒАСЫ ОҢАЛТУ ОРТАЛЫҒЫНЫҢ ЖҰМЫСЫМЕН ТАНЫСТЫ
Қазақстан Халық Кеңесінің Төрағасы Ерлан Қошанов бастаған делегация Орал қаласындағы мүгедектігі бар адамдарды оңалту орталығына барды. Кездесуге Қазақстан Халық Кеңесінің мүшесі Мұрат Мұқаев та қатысты.
Орталықта тірек-қимыл аппараты бұзылған және ерекше қажеттілігі бар азаматтарға тегін медициналық оңалту және әлеуметтік-педагогикалық қызметтер көрсетіледі. Емдеу мекемесі жүзу бассейні, массаж, сенсорлық, Монтессори, еңбек терапиясы, стоматология кабинеттері және спорт залымен жабдықталған.
Бұған дейін мұндай қызметтерді алу үшін өңір тұрғындары Астана мен Алматы қалаларына баруға мәжбүр болатын. Қазір қажетті ем-шараларды облыс орталығында қабылдауға мүмкіндік жасалған.
Халық Кеңесінің Төрағасы мен мүшелері мекеменің материалдық-техникалық базасын көріп, мамандармен тілдесті. Оңалту шараларының қолжетімділігі, көрсетілетін қызмет сапасы және ерекше қажеттілігі бар азаматтарды әлеуметтік қолдау мәселелеріне назар аударылды.
БҚО-ДА ЭТНОМӘДЕНИ БІРЛЕСТІКТЕР, АЗАМАТТЫҚ ҚОҒАМ ЖӘНЕ ЖАСТАР ӨКІЛДЕРІМЕН КЕЗДЕСУ ӨТТІ
«Жаңа қоғамдық этика: мәдениет, әдеп, әдет» республикалық форумы аясында Қазақстан Халық Кеңесінің Төрағасы Ерлан Қошанов Батыс Қазақстан облысының этномәдени бірлестіктері, азаматтық қоғам және жастар өкілдерімен кездесті.
Кездесуге Қазақстан Халық Кеңесінің мүшесі Мұрат Мұқаев қатысып, жиынға төрағалық етті.
Кездесу барысында қоғамдық келісім мен бірлікті нығайту, ұлттық құндылықтарды сақтау, мәдениет пен әдеп қағидаттарын дәріптеу, сондай-ақ өскелең ұрпақтың бойында азаматтық жауапкершілік пен қоғамдық тәртіп мәдениетін қалыптастыру мәселелері талқыланды.
Жиынға қатысушылар қоғамдағы өзара құрмет пен түсіністіктің маңызын атап өтіп, этномәдени бірлестіктердің, азаматтық қоғам институттарының және жастардың қоғамдық өмірдегі рөліне назар аударды.
Кездесу қоғамдағы татулық пен тұрақтылықты сақтауда мәдениет пен әдептің айрықша мәнге ие екенін тағы бір мәрте көрсетті. Ұлттық құндылықтарды ұлықтап, оны жас буынның санасына сіңіру – қоғам бірлігін нығайтуға және ұрпақ сабақтастығын сақтауға бағытталған маңызды міндет.
ҚАЗАҚСТАН ХАЛЫҚ КЕҢЕСІНІҢ ТӨРАҒАСЫ ОРАЛҒА ІС-САПАРМЕН КЕЛДІ
Қазақстан Халық Кеңесінің Төрағасы Ерлан Қошанов өңірге жұмыс сапары аясында Орал қаласында өткен «Жаңа қоғамдық этика: мәдениет, әдеп, әдет» атты республикалық форумға қатысты. Жиынға облыс әкімінің орынбасары Қайыржан Меңдіғалиев, Қазақстан Халық Кеңесінің мүшесі, Батыс Қазақстан облыстық мәслихатының VIII шақырылым төрағасы Мұрат Мұқаев, мыңнан астам қоғам өкілі, белсенді аналар мен сарапшылар жиналды.
Форумның ашылуында Ерлан Қошанов Мемлекет басшысы Қасым-Жомарт Тоқаевтың құттықтау хатын оқып, Президент құттықтауындағы жаңа Конституцияның құндылықтарын кеңінен насихаттау, ұлттық тәрбие мен қоғамдық мәдениетті нығайту, сондай-ақ «Заң мен тәртіп» және «Таза Қазақстан» қағидаттарын қоғам өміріне орнықтырудың маңыздылығына тоқталды.
Форум барысында өңірдегі отбасы институтын нығайту бағытында атқарылып жатқан жұмыстар да атап өтілді. Қазіргі таңда облыста 150-ден астам Аналар кеңесі, барлық аудандар мен Орал қаласында Отбасын қолдау орталықтары жұмыс істейді.
Сонымен қатар, әскери қызметшілердің тұрмыстық жағдайын жақсарту, жастарды жұмыспен қамту, әйелдер құқығын қорғау, кітап оқу мәдениетін дамыту және ұрпақ тәрбиесі секілді өзекті мәселелер кеңінен талқыланды.
Жиын қорытындысы бойынша қатысушылар тарапынан бірқатар ұсыныс айтылды. Аталған ұсыныстар Қазақстан Халық Кеңесінің алдағы жұмысы аясында қарастырылатын болады.
ТЕРЕКТІ АУДАНЫНДА ӨНДІРІС, КӘСІПКЕРЛІК ЖӘНЕ АБАТТАНДЫРУ ЖҰМЫСТАРЫНА НАЗАР АУДАРЫЛДЫ
Облыс әкімі Нариман Төреғалиев Теректі ауданына жұмыс сапарымен барып, ауданның әлеуметтік-экономикалық даму барысымен танысты. Жұмыс сапарына облыстық мәслихат төрағасы Мұрат Мұқаев пен облыстық мәслихат депутаты Сержан Идиятов қатысты.
Сапар барысында биыл іске қосылған M&N Filters ЖШС кәсіпорнының жұмысымен танысып, су сүзгілерін өндіру барысы қаралды. Жаңа өндірістің іске қосылуы жергілікті кәсіпкерлікті дамытуға және жаңа жұмыс орындарын ашуға мүмкіндік береді.
Сонымен қатар «Таза Қазақстан» бастамасы аясындағы абаттандыру және көгалдандыру жұмыстарының барысы пысықталды. Биыл Теректі ауданында 5 мыңнан астам ағаш көшеті отырғызылған.
Жергілікті тауар өндірушілер мен қолөнер шеберлерінің көрмесі ұйымдастырылып, олардың өнімдері таныстырылды. Ауданда мал шаруашылығы, жиһаз өндірісі, азық-түлік, сүт және ет өнімдерін қайта өңдеу бағыттары дамып келеді.
Жұмыс сапарының қорытындысында аудан тұрғындарымен кездесу өтіп, ауданның өзекті мәселелері мен алдағы міндеттер талқыланды.
ОБЛЫСТЫҚ МӘСЛИХАТТЫҢ КЕЗЕКТЕН ТЫС XXVIII СЕССИЯСЫ ӨТТІ
Батыс Қазақстан облыстық мәслихатының кезектен тыс XXVIII сессиясы өтті.
Сессия Батыс Қазақстан облысы әкімінің орынбасары Тілепберген Каюповтың қатысуымен, облыстық мәслихат төрағасы Мұрат Мұқаевтың төрағалығымен өтті.
Сессия жұмысына облыстық мәслихат депутаттары, мемлекеттік мекемелердің басшылары және бұқаралық ақпарат құралдарының өкілдері қатысты.
Күн тәртібінде денсаулық сақтау саласында көрсетілетін қызметтер бойынша төлеуге жататын шығыстардың асып кеткен сомасын төлеу мәселесі қаралды.
Күн тәртібіндегі мәселелер бойынша депутаттар тарапынан ұсыныстар айтылып, бірқатар сауалдар қойылды. Талқылау қорытындысы бойынша тиісті шешімдер қабылданды.
ҚАЗАҚСТАН ХАЛЫҚ КЕҢЕСІНІҢ ӨҢІРЛІК ДАМУ ЖӘНЕ ЖЕРГІЛІКТІ ӨЗІН-ӨЗІ БАСҚАРУ КОМИТЕТІНІҢ АЛҒАШҚЫ ОТЫРЫСЫ ӨТТІ
Отырысқа Қазақстан Халық Кеңесі төрағасының орынбасары Жайсанбаев Қанатбек ,Комитет төрағасы Зейнұлқабден Табиғат, төрағаның орынбасарлары Зулфухар Гаипов пен Қазақстан Республикасы Ұлттық экономика вице-министрі Бауыржан Омарбеков, сондай-ақ Батыс Қазақстан облыстық мәслихатының төрағасы Мұрат Мұқаев қатысты.
Күн тәртібіндегі негізгі мәселе – Халық Кеңесі мүшелерін өңірлік даму және кәсіпкерлікті қолдау, экология және әлеуметтік жауапкершілік бағыттары бойынша салалық комиссияларға бөлу. Сонымен қатар Комитеттің алдағы кезеңге арналған жұмыс жоспары талқыланып, «Адал азамат», «Заң мен тәртіп», «Таза Қазақстан» бағыттары бойынша ұсыныстар қаралды. Халықтың өтініштері мен ұсыныстарын жинақтайтын ортақ ақпараттық платформа құру мәселесі де айтылды.
Комитет құрамының басым бөлігін өңір өкілдері – қоғамдық кеңес мүшелері, мәслихат депутаттары және өзге де азаматтар құрайды. Бұл жергілікті мәселелерді ортақ талқылауға шығарып, өңірлердің үнін жеткізуге мүмкіндік береді.
Отырыс барысында Кеңес мүшелері өз пікірлері мен ұсыныстарын ортаға салып, алдағы жұмыс бағыттарын айқындады. Комитет бекітілген жұмыс жоспарына сәйкес өз қызметін жалғастырады.