Ұйғыр ауданының Қоғамдық кеңесі туралы Ереже

Ұйғыр ауданының Қоғамдық кеңесі туралы Ереже

1-тарау. Жалпы ережелер

 

1. Ұйғыр ауданының Қоғамдық кеңесі туралы осы ереже (бұдан әрі – Ереже) Қазақстан Республикасының «Қоғамдық кеңестер туралы» Заңының (бұдан әрі – Заң) 8-бабы 6-тармағына сәйкес әзірленді.
2. Ұйғыр ауданының Қоғамдық кеңесі (бұдан әрі - Қоғамдық кеңес) - Ұйғыр ауданының мәслихаты өзінің құзыретіндегі мәселелері бойынша коммерциялық емес ұйымдармен, азаматтармен құрған консультативтік-кеңесші, байқаушы орган.

 

2-тарау. Қоғамдық кеңестің мақсаты мен міндеттері

 

3. Азаматтық қоғамның қоғамдық маңызды мәселелер бойынша пікірін білдіру қоғамдық кеңес қызметінің мақсаты болып табылады.
4. Қоғамдық кеңестің міндеттері:

1) азаматтық қоғамның мүдделерін білдіру және жергілікті деңгейлерде шешімдерді талқылау мен қабылдау кезінде жұртшылықтың пікірін ескеру;

2) жергілікті мемлекеттік басқару және өзін-өзі басқару органдарының азаматтық қоғаммен өзара іс-қимыл жасауын дамыту;

3) қоғамдық бақылауды ұйымдастыру және жергілікті мемлекеттік басқару және өзін-өзі басқару органдары қызметінің ашықтығын қамтамасыз ету болып табылады.

 

3-тарау. Қоғамдық кеңестер қызметінің қағидаттары

 

5. Қоғамдық кеңестер өз қызметін мынадай қағидаттар негізінде жүзеге асырады:

1) тәуелсіздік;

2) мүшелерінің қоғамдық негіздегі қызметі;

3) автономдық;

4) дербестік;

5) жариялылық.

 

4-тарау. Қоғамдық кеңестің жұмыс органдарын ұйымдастыру

 

6. Қоғамдық кеңес тұрақты және (немесе) уақытша жұмыс органдарын: комитеттерді, сараптама топтарын құрады.
7. Қоғамдық кеңес тұрақты жұмыс органдары - комитеттерді құрады. Комитеттердің сандық құрамын Қоғамдық кеңес дербес айқындайды, бұл ретте кемінде үш адамды құрайды.
8. Комитеттер Қоғамдық кеңестің шешімімен Қоғамдық кеңестің құзыретіне жатқызылған тиісті саланың немесе тиісті әкімшілік-аумақтық бірліктің қоғамдық маңызы бар мәселелерін зерделеу үшін құрылады.
9. Комитеттердің құрамы Қоғамдық кеңес мүшелерінің, коммерциялық емес ұйымдардың, ғылыми, кәсіподақ және басқа да ұйымдардың, бұқаралық ақпарат құралдарының өкілдері, сарапшылар қатарынан қалыптастырылады, оны Қоғамдық кеңестің өзі айқындайды және оның отырысында бекітіледі.
10. Комитеттердің өкілеттігі Қоғамдық кеңестің шешімі бойынша тоқтатылады.
11. Қоғамдық кеңестер уақытша жұмыс органдарын - сараптама топтарын құрады. Сараптама топтары Қоғамдық кеңестің құзыретіне жатқызылған тиісті саланың немесе әкімшілік-аумақтық бірліктің нақты мәселелерін зерделеу үшін Қоғамдық кеңестің шешімімен құрылады.
12. Сараптама топтарының құрамы Қоғамдық кеңес мүшелерінің, мемлекеттік органдардың, коммерциялық емес ұйымдардың, ғылыми, кәсіподақ және басқа да мүдделі ұйымдардың, бұқаралық ақпарат құралдарының өкілдері, сарапшылар қатарынан қалыптастрылады.
13. Қоғамдық кеңестің сараптама топтары:

1) зерделенетін мәселелер бойынша материалдармен алдын ала танысуды және қарау қорытындылары бойынша оның бағытына сәйкес мәселелерді Қоғамдық кеңес комиссиясының отырысында қарауға дайындауды жүзеге асырады; және оның бағыттарына сәйкес оларды Қоғамдық кеңестер комиссияларына қарауға ұсынады;

2) зерделенетін мәселелер бойынша сараптамалық қорытындылардың жобаларын дайындайды және оларды қоғамдық кеңестер комиссияларында қарау үшін оның бағытына сәйкес ұсынады.

14. Нақты мәселе жөніндегі материалдарды зерделеу қорытындылары бойынша сараптама тобы қорытынды жасайды және оның бағытына сәйкес Қоғамдық кеңестің тиісті комиссиясына қарауға жібереді.

Сараптама тобының зерделенетін мәселелер бойынша қорытынды материалдарын Қоғамдық кеңес Қоғамдық кеңестің тиісті комиссиясының ұсынысы бойынша қарайды.

14-1. Қоғамдық кеңестің қалыптастырылған құрамының бірінші отырысында қарапайым көпшілік даусымен ашық дауыс беру арқылы Қоғамдық кеңестің төрағасы, төралқа құрамы, Қоғамдық кеңес комиссия құрамдары сайланады.

Төраға мен төралқаның құрамы Қоғамдық кеңес мүшелерінің арасынан азаматтық қоғамнан сайланады.

Төралқа мүшелерінің санын Қоғамдық кеңес өз бетінше айқындайды.

Өзі болмаған уақытта Қоғамдық кеңестің төрағасы өз міндеттерін атқаруды Қоғамдық кеңес төралқасы мүшелерінің біріне жүктейді.

Қоғамдық кеңес төрағасының өкілеттігі тоқтатылған жағдайда, оның өкілеттігі жаңа төраға сайланғанға дейін Қоғамдық кеңестің шешімі бойынша төралқа мүшелерінің біріне беріледі.

 

5-тарау. Қоғамдық кеңестердің өкілеттіктері

 

15. Қоғамдық кеңестің өкілеттіктеріне мыналар жатады:

1) бюджеттік бағдарламалар әкімшісінің бюджеттік бағдарламаларының жобаларын, Қазақстан Республикасының мемлекеттік жоспарлау жүйесі құжаттарының жобаларын талқылау;

2) бюджеттік бағдарламалар әкімшісінің бюджеттік бағдарламаларының орындалуын талқылау, Қазақстан Республикасының мемлекеттік жоспарлау жүйесі құжаттарының іске асырылу барысы мониторингінің нәтижелерін қарау;

3) атқарушы органдардың нысаналы индикаторларға қол жеткізуі туралы есептерін талқылау;

4) бюджеттік бағдарламалар әкімшісінің бюджеттік бағдарламалардың іске асырылуы туралы, тауарларды (жұмыстарды, көрсетілетін қызметтерді) өткізуден түсетін ақша түсімдері мен шығыстары жоспарларының орындалуы туралы, қайырымдылықтан түсетін ақшаның түсуі мен жұмсалуы туралы есептерін талқылау;

4-1) квазимемлекеттік сектор субъектілерін қоспағанда, мемлекеттік кәсіпорындардың, мемлекет бақылайтын акционерлік қоғамдар мен жауапкершілігі шектеулі серіктестіктердің даму жоспарларының іске асырылу мониторингінің нәтижелері туралы есептерді талқылау;

5) орталық және жергілікті атқарушы органдардың, сондай-ақ әкімдердің тиісті аумақта карантиндік режимді енгізе отырып, карантиндік аймақты белгілеу (күшін жою), Қазақстан Республикасының ветеринария саласындағы заңнамасында көзделген жағдайларда карантинді және (немесе) шектеу іс-шараларын белгілеу (алып тастау) туралы шешімдер қабылдауды, сондай-ақ табиғи және техногендік сипаттағы төтенше жағдайды жариялауды көздейтін нормативтік құқықтық актілерінің жобаларын қоспағанда, "Құқықтық актілер туралы" Қазақстан Республикасының Заңына сәйкес азаматтардың құқықтарына, бостандықтары мен міндеттеріне қатысты нормативтік құқықтық актілердің жобаларын әзірлеуге және талқылауға қатысу;

6) Қоғамдық кеңес туралы үлгілік ережеге сәйкес мемлекеттік қызметшілердің қызметтік әдеп нормаларының сақталуын қоса алғанда, мемлекеттік органның немесе өңірдің тиісті қызмет саласының қоғамдық маңызы бар мәселелері бойынша, оның ішінде мемлекеттік басқаруды жетілдіру және мемлекеттік аппараттың ашық жұмысын ұйымдастыру мәселелері бойынша жеке және заңды тұлғалардың жолданымдарын қарау;

7) Қазақстан Республикасының заңнамасын жетілдіру жөнінде ұсыныстар әзірлеу және оларды мемлекеттік органдарға енгізу;

7-1) Қоғамдық кеңес туралы ережені бекіту;

8) қоғамдық бақылауды осы Заңда көзделген нысандарда жүзеге асыру;

9) қызмет бағыттары бойынша комиссиялар құру;

10) жергілікті мемлекеттік басқару органдарының Қазақстан Республикасының жер заңнамасына сәйкес жер қатынастарын реттеу мәселелері жөніндегі жұмысына қатысу;

          11) "Арнайы экономикалық және индустриялық аймақтар туралы" Қазақстан Республикасының Заңына сәйкес жергілікті атқарушы органның өңірлік маңызы бар индустриялық аймақты құру туралы шешімінің жобасын қарау;

   12) мемлекеттік құпияларды не Қазақстан Республикасының заңдарымен қорғалатын өзге де құпияны құрайтын мәліметтерді қоспағанда, жергілікті деңгейде заңдылықты қамтамасыз ету және адам мен азаматтың құқықтарын және бостандықтарын сақтау мәселелері бойынша тиісті әкімшілік-аумақтық бірлік шегінде құқық қорғау органдары басшыларының ақпаратын тыңдау.

2. Осы баптың 1-тармағының 2), 3), 4), 4-1), 6), 7), 8) және 12) тармақшаларында көзделген өкілеттіктердің орындалу қорытындылары бойынша Қоғамдық кеңес тиісті мемлекеттік органға ұсынымдар енгізеді, ол – бір ай ішінде, ал 1) тармақша бойынша он жұмыс күні ішінде Қазақстан Республикасының заңнамасында көзделген шешімдерді қабылдайды және (немесе) тиісті мемлекеттік органның бірінші басшысы не оны алмастыратын адам қол қоятын уәжді жауапты береді.
3. Қоғамдық кеңес өз қызметін ағымдағы жылға арналған жұмыс жоспарына сәйкес жүзеге асырады.

16-1. Жұмыс жоспарлары Қоғамдық кеңес мүшелерінің ұсыныстары негізінде жасалады және Қоғамдық кеңестің отырысында бекітіледі.

17. Қоғамдық кеңес Заңның 5-бабының 1-тармағында көзделген өкілеттіктерді іске асыру үшін отырыстар өткізеді.
18. Қоғамдық кеңестің отырыстары қажеттілігіне қарай Қоғамдық кеңестің шешімі бойынша, бірақ тоқсанына бір реттен сиретпей өткізіледі.

Отырыстарды дайындау және өткізу кезінде Қоғамдық кеңес мынадай:

1) отырыстардың күн тәртібін, өткізу мерзімдері мен орнын талқылау және бекіту;

2) Қоғамдық кеңестің отырысына шығарылатын мәселелерді дайындау;

3) осы Ереженің 20-тармағына сәйкес қажетті қатысушыларды шақыру;

4) отырыс өткізу мәселелерін қарайды.

Қоғамдық кеңестің отырыстарын Қоғамдық кеңестің төрағасы не оны алмастыратын адам жүргізеді.

Қоғамдық кеңестің отырысында хаттама жүргізіледі, оған Қоғамдық кеңестің төрағасы қол қояды және тиісті интернет-ресурста жарияланады.

Отырыстарды өткізудің өзге де мәселелерін Қоғамдық кеңес туралы Ережеге сәйкес Қоғамдық кеңес өз бетінше айқындайды.

19. Қоғамдық кеңестің отырысы оның мүшелерінің жалпы санының кемінде үштен екісі қатысқан кезде құқықты деп есептеледі.

Қоғамдық кеңестің шешімдері Қоғамдық кеңес мүшелерінің қарапайым көпшілік даусымен ашық дауыс беру арқылы қабылданады.

20. Қоғамдық кеңестің отырысына мүдделі мемлекеттік органдардың, жергілікті мемлекеттік басқару органдарының, бұқаралық ақпарат құралдарының, ғылыми, кәсіподақ және басқа да ұйымдардың өкілдері, сондай-ақ сарапшылар мен өзге де мамандар шақырылады.

Қоғамдық кеңес хатшысы Қоғамдық кеңес мүшелерін, шақырылатын адамдарды және отырыстың өзге де қатысушыларын отырысты өткізу туралы алдын ала, бірақ ол өткізілетін күнге дейін үш жұмыс күнінен кешіктірмей хабардар етеді.

21. Мәселелерді қарау нәтижелері бойынша Қоғамдық кеңес Заңның 5-бабының 2-тармағында көзделген мерзімде мемлекеттік органдардың қарауы және шешімдер қабылдауы міндетті болып табылатын ұсынымдарды қабылдайды.
22. Қоғамдық кеңес жергілікті өкілді немесе жергілікті атқарушы органдар жіберген азаматтардың құқықтарына, бостандықтары мен міндеттеріне қатысты нормативтік құқықтық актілердің жобаларын қарайды.
23. Қоғамдық кеңестің хатшысы нормативтік құқықтық актінің жобасын алған кезден бастап ұсыныстар енгізу үшін бір жұмыс күні ішінде Қоғамдық кеңес мүшелеріне қағаз немесе электрондық жеткізгіште не электрондық пошта арқылы жіберуді ұйымдастырады.
24. Қоғамдық кеңестің мүшелері екі жұмыс күні ішінде нормативтік құқықтық актінің жобасын қарап, Қоғамдық кеңестің хатшысына нормативтік құқықтық актінің жобасын қарау немесе нормативтік құқықтық актінің жобасын қараусыз қалдыру жөнінде қабылданған шешім туралы хабарлайды.
25. Қоғамдық кеңестің хатшысы Қоғамдық кеңес мүшелерінің келіп түскен ұсыныстарын түпкілікті шешім қабылдау үшін Қоғамдық кеңес төрағасының қарауына енгізеді.
26. Қоғамдық кеңестің нормативтік құқықтық актінің жобасын қарау немесе қараусыз қалдыру жөніндегі шешімі Қоғамдық кеңес мүшелерінің жалпы санының көпшілік дауысымен қабылданады. Дауыстар тең болған жағдайда, Қоғамдық кеңес төрағасының дауысы шешуші болып табылады.
27. Қоғамдық кеңес шешім қабылдағаннан кейін бір жұмыс күні ішінде Қоғамдық кеңестің хатшысы жергілікті өкілді немесе жергілікті атқарушы органдарды Қоғамдық кеңестің қабылдаған шешімі туралы хабардар етеді.
28. Қоғамдық кеңес нормативтік құқықтық актінің жобасын қарау туралы шешім қабылдағаннан кейін бір жұмыс күні ішінде нормативтік құқықтық актінің жобасы Қоғамдық кеңес мүшелерінің қатысуымен өтетін оның отырысына қарау үшін енгізіледі.
29. Нормативтік құқықтық актінің жобасын қарау қорытындылары бойынша шешім Қоғамдық кеңес мүшелерінің жалпы санының көпшілік дауысымен қабылданады. Дауыстар тең болған жағдайда, Қоғамдық кеңес төрағасының дауысы шешуші болып табылады.
30. Дауыс беру қорытындыларын ескере отырып, Қоғамдық кеңестің хатшысы қаралатын нормативтік құқықтық актінің жобасы бойынша Қоғамдық кеңес ұсынымдарының жобасын дайындайды және Қоғамдық кеңестің төрағасына қол қоюға енгізеді.
31. Қоғамдық кеңестің хатшысы Қоғамдық кеңестің ұсынымдарын Қоғамдық кеңестің төрағасы қол қойған күннен бастап бір жұмыс күні ішінде нормативтік құқықтық актінің жобасын қарауға ұсынған жергілікті өкілді немесе жергілікті атқарушы органдарға қағаз немесе электрондық жеткізгіштерде не электрондық пошта арқылы жібереді.
32. Заңның 5-бабы 1-тармағының 6) тармақшасына сәйкес Қоғамдық кеңес мемлекеттік органның немесе тиісті әкімшілік-аумақтық бірлік өңірінің тиісті қызмет саласындағы қоғамдық маңызы бар мәселелер бойынша жеке және заңды тұлғалардың өтініштерін қарайды.
33. Өтініштерді қарау нәтижелері бойынша Қоғамдық кеңес мынадай шешімдердің бірін қабылдайды:

1) өз құзыреті бойынша тиісті мемлекеттік органға немесе жергілікті өкілді органға өтініш жіберу туралы;

2) осы өтінішті Қоғамдық кеңестің отырысында қарау туралы;

3) келіп түскен өтінішті қарау бойынша қоғамдық бақылау нысандарының бірін өткізу туралы.

34. Ұйымдастырушылық мәселелерді шешуді, Қоғамдық кеңес отырыстарын дайындауды және өткізуді, Қоғамдық кеңесте іс жүргізуді ұйымдастыруды және жүргізуді қамтамасыз ету мақсатында Қоғамдық кеңестің хатшысы:

1) Қоғамдық кеңестің отырыстарын дайындау мен өткізудің ұйымдастырушылық мәселелерін шешуді қамтамасыз етеді;

2) Қоғамдық кеңесте іс жүргізуді ұйымдастырады және жүргізеді, сондай-ақ Қоғамдық кеңес шешімдерінің орындалу мерзімдеріне бақылау жасайды.

35. Қоғамдық кеңестің хатшысы Қоғамдық кеңес мүшесі болып табылмайды.

 

6-тарау. Қоғамдық кеңес төрағасының өкілеттігі

 

38. Қоғамдық кеңестің төрағасы:

1) Қоғамдық кеңестің қызметін ұйымдастырады;

2) Регламентке және отырыстың бекітілген күн тәртібіне сәйкес отвырыстарда төрағалық етеді;

3) Қоғамдық кеңестің шешімімен айқындалған тәртіппен олардан ұсыныстар түскен кезде кезектілік тәртібімен Қоғамдық кеңес мүшелеріне сөз береді;

4) Қоғамдық кеңес мүшелерінің ұсыныстарын олардың түсу тәртібімен дауысқа салады;

5) Дауыс беруді жүргізеді және оның нәтижелерін жариялайды;

6) Қоғамдық кеңес отырысының хаттамаларының жүргізілуін бақылайды;

7) Қоғамдық кеңестің атынан құжаттарға қол қояды;

8) Қоғамдық кеңестің шешімдерін орындау жөніндегі қызметті үйлестіреді;

9) Өзі болмаған кезде төрағаның міндеттерін орындауды Қоғамдық кеңес төралқасы мүшелерінің біріне жүктейді;

10) Мемлекеттік органдардан Қоғамдық кеңес отырыстарында қаралатын мәселелер бойынша қосымша материалдарды сұратып алады.

 

7-тарау. Қоғамдық кеңес төралқасының өкілеттіктері

39. Қоғамдық кеңестің қызметіне жедел басшылық жасау үшін оның отырыстары арасындағы кезеңде Қоғамдық кеңестің төралқасы сайланады. Қоғамдық кеңестің төралқасының құрамына Қоғамдық кеңестің төрағасы, комиссиялардың төрағалары, қоғамдық кеңестің жекелеген мүшелері кіреді.

39.1. Қоғамдық кеңестің төралқасы:

1) Қоғамдық кеңестің комиссияларының жұмысын үйлестіреді;

2) Қоғамдық кеңес отырыстарын дайындауды ұйымдастырады;

3) Қоғамдық кеңестің қызметін ұйымдастырушылық және ақпараттық қамтамасыз етуді жүзеге асырады;

4) Қоғамдық кеңес ұсынымдарының орындалуына бақылауды жүзеге асырады.

 

8-тарау. Қоғамдық кеңес комиссияларының қызметін ұйымдастыру тәртібі

 

40. Комиссиялардың дербес құрамы Қоғамдық кеңес отырысында бекітіледі.
41. Қоғамдық кеңестің комиссиялары келесі құрамдағы Қоғамдық кеңестің өкілеттік мерзімінен аспайтын мерзімге құрылады. Қоғамдық кеңес мүшесінің комиссия жұмысына қатысуы ерікті таңдау негізінде жүзеге асырылады.
42. Қоғамдық кеңес комиссияларының жұмысын Қоғамдық кеңестің төралқасы үйлестіреді.
43. Қоғамдық кеңес комиссияларының төрағалары Қоғамдық кеңес мүшелерінің жалпы санының көпшілік даусымен сайланады. Қоғамдық кеңес

отырысында комиссия төрағасының міндеттерін орындаудан мерзімінен бұрын босату туралы мәселе қаралады.

44. Қоғамдық кеңес комиссиясы жұмысының негізгі нысаны отырыс болып табылады. Комиссия отырыстарының хаттамалары Қоғамдық кеңес мүшелеріне танысу үшін ұсынылады.
45. Қоғамдық кеңес комиссияларының өкілеттіктері мыналар:

1) материалдарды алдын ала зерделеуді және комиссияның Қоғамдық кеңес отырысының қарауына жіберу үшін мәселелерді дайындауды жүзеге асыру;

2) комиссияның жолдамасы бойынша Қоғамдық кеңес шешімдерінің жобаларын дайындауды жүзеге асыру;

3) комиссияның жолдамасы бойынша Қоғамдық кеңеске сараптамалық қорытындылардың жобаларын енгізу;

4) Қоғамдық кеңестің шешімдеріне сәйкес, мемлекеттік органдарға, квазимемлекеттік сектор субъектілеріне, жергілікті өзін-өзі басқару органдарына және басқа да ұйымдарға Қоғамдық кеңестің сұрау салуларының жобаларын дайындау;

5) Қоғамдық кеңестің шешіміне сәйкес, Қоғамдық кеңестің қоғамдық іс-шараларын ұйымдастыруға;

6) комиссияның жолдамасы бойынша мемлекеттік орган қызметінің әртүрлі салаларындағы істердің жай-күйіне талдау жүргізу;

7)  Қоғамдық кеңестің іс-шараларын өткізу жөнінде ұсыныстар енгізу;

8) өз қызметін ұйымдастыру туралы шешім қабылдау;

9) Қоғамдық кеңеске келіп түскен азаматтар мен ұйымдардың өтініштері бойынша алынған ақпаратты жинақтау, азаматтар мен коммерциялық емес ұйымдардың бастамалары туралы ақпаратты жинау және өңдеу.

10) Қоғамдық кеңес комиссиясының отырыстарында нормативтік құқықтық актілердің жобалары олардың мамандануына қарай алдын ала қаралады.

11) Қоғамдық кеңестің комиссиялары алдағы жылға жұмыс жоспарларын қалыптастырады және Қоғамдық кеңеске атқарылған жұмыстардың нәтижелері туралы есеп береді.

46. Құрылған комиссиялар тиісті қызмет салаларындағы мемлекеттік органдардың қызметіне қоғамдық бақылауды жүзеге асырады.
47. Қоғамдық кеңес комиссиясының мүшелері арасында ақпаратпен, материалдармен алмасу, Қоғамдық кеңестің қорытындысын алу электрондық пошта арқылы жүзеге асырылады. Келіспеушіліктер болса, бетпе-бет кездесу өткізіледі.
48. Әрбір комиссия мүшелерінің санын Қоғамдық кеңес дербес белгілейді, бұл ретте оның саны үш адамнан кем болмауы тиіс. Қоғамдық кеңес комиссиясының мүшесі олардың келісімімен басқа комиссиялардың жұмысына қатысады.
49. Қоғамдық кеңес комиссиясының отырыстары қажеттілігіне қарай өткізіледі. Қоғамдық кеңес комиссиясының отырысы, егер Қоғамдық кеңес комиссиясы мүшелерінің жалпы санының кемінде үштен екісі қатысса, құзыретті болып табылады

 

 

9-тарау. Қоғамдық кеңестердің және олардың мүшелерінің құқықтары мен міндеттері

 

50. Қоғамдық кеңес мүшелерінің өз өкілеттіктерін іске асыру мақсатында:

1) Қазақстан Республикасының заңнамасында белгіленген негізде және тәртіппен, Заңның 5-бабының 1-тармағында көзделген мәселелер бойынша – мемлекеттік органдарға, жергілікті мемлекеттік басқару органдарына кіруге;

2) Заңның 5-бабының 1-тармағында көзделген мәселелер бойынша мемлекеттік органдар, жергілікті мемлекеттік басқару органдары өткізетін іс-шараларға қатысуға;

3) Заңда белгіленген өз өкілеттіктерін жүзеге асыру мақсатында қоғамдық маңызы бар мәселелер бойынша мемлекеттік органдарға, жергілікті мемлекеттік басқару органдарына жүгінуге құқығы бар.

4) азаматтардың құқықтарына, бостандықтары мен міндеттеріне қатысты, Қоғамдық кеңесте қаралуға жататын нормативтік құқықтық актілерді айқындау жөнінде ұсыныстар енгізуге құқығы бар.

5) Ұйғыр ауданы мәслихатынан Қоғамдық кеңес мүшесінің мәртебесін куәландыратын құжатты алуға;

6) тиісті мемлекеттік органның құзыретіне жатқызылған мәселелерді талқылау үшін мемлекеттік органдардың өкілдерін Қоғамдық кеңестің отырысына шақыруға;

7) қажеттілігіне қарай тұрақты және уақытша жұмыс органдарын: комитеттер мен сараптама топтарын құруға құқығы бар;

8) ерекше тәртіп қолданыла отырып жүзеге асырылатын мемлекеттік сатып алуды қоспағанда, тиісті мемлекеттік органның мемлекеттік сатып алу жөніндегі конкурстық комиссияларына қатысуға.

51. Өз қызметінде Қоғамдық кеңес және оның мүшелері:

1) Конституцияның, оған сәйкес келетін заңдардың, Қазақстан Республикасының Президенті, Қазақстан Республикасының Үкіметі актілерінің, Қазақстан Республикасының өзге де нормативтік-құқықтық актілерінің нормаларын сақтауға;

2) өз қызметін жұртшылықпен өзара іс-қимыл жасай отырып жүзеге асыруға;

3) жылына екі реттен сиретпей бұқаралық ақпарат құралдары және (немесе) интернет-ресурстар арқылы халыққа Қоғамдық кеңестің қызметі туралы ақпарат беруге;

4) өз қызметі туралы жылдық есепті бұқаралық ақпарат құралдарында жариялауға және (немесе) Ұйғыр ауданы мәслихатының интернет-ресурсында орналастыруға;

5) «Ақпаратқа қол жеткізу туралы» Қазақстан Республикасының Заңына сәйкес қол жеткізуге шектеу қойылмайтын ақпаратты қоспағанда, мемлекеттік органнан, жергілікті өзін-өзі басқару органынан алынған дербес деректерді дербес деректер субъектісінің келісімінсіз таратпауға, сондай-ақ мемлекеттік құпияларды не Қазақстан Республикасының заңдарымен қорғалатын өзге де құпияны құрайтын мәліметтерді жария етпеуге міндетті.

10-тарау. Жиналыстарды өткізу мен шешімдерді қабылдаудың тәртібі

52. Қоғамдық кеңестің отырыстары белгіленген өкілеттіктер шегінде Заңның 5-бабының 1-тармағында және 5-1-бабының 1-тармағында көзделген өкілеттіктерді жүзеге асыру үшін өткізіледі.
53. Қоғамдық кеңестің отырысы оның мүшелерінің жалпы санының кемінде үштен екісі қатысқан жағдайда құзыретті болып саналады. Қоғамдық кеңес мүшелерінің бейне-конференц байланыс арқылы қатысуына рұқсат етіледі.
54. Қоғамдық кеңес отырысына Қоғамдық кеңестің шешімімен мемлекеттік органдардың, жергілікті өзін-өзі басқару органдарының, квазимемлекеттік сектор субъектілерінің, бұқаралық ақпарат құралдарының, ғылыми, кәсіподақ және басқа да ұйымдардың өкілдері, сондай-ақ сарапшылар мен басқа да мамандар шақырылады.
55. Қоғамдық кеңес отырысында хаттама жүргізіледі, онда:

1) жиналыстың күні мен орны;

2) қатысқан адамдар саны;

3) сөйлеушілердің тегі, аты, әкесінің аты (бар болса);

4) күн тәртібі, баяндама мен баяндаманың мазмұны.

56. Қоғамдық кеңестің отырыстары ашық болып табылады.
57. Мәселелерді қарау нәтижелері бойынша Қоғамдық кеңес аталмыш Заңның 5-бабының 2-тармағында, 5-1-бабының 2-тармағында көзделген мерзімдерде мемлекеттік органдардың қарауы және шешім қабылдау үшін міндетті болып табылатын ұсынымдарды қабылдайды.
58. Қоғамдық кеңестің шешімдері Қоғамдық кеңес отырысына қатысқан мүшелер жалпы санының көпшілік даусымен қабылданады. Шешімдер хаттамамен ресімделеді, оған Қоғамдық кеңестің төрағасы қол қояды.
59. Қоғамдық кеңес отырысында қаралған мәселелер бойынша шешімдер қабылдау кезінде Қоғамдық кеңестің әрбір мүшесі бір дауысқа ие. Дауыстар тең болған жағдайда Қоғамдық кеңес төрағасы дауыс берген шешім қабылданды деп есептеледі.
60. Қоғамдық кеңестің қызметіне қатысты құжаттар оның өкілеттік мерзімі ішінде Қоғамдық кеңес хатшылығында электрондық немесе қағаз күйінде сақталады.
61. Қоғамдық кеңестің өкілеттік мерзімі өткеннен кейін, Қоғамдық кеңестің қызметіне қатысты құжаттар Ұйғыр аудандық мәслихатының мұрағатына сақтауға беріледі.

 

 

11-тарау. Қоғамдық кеңес жұмысының жариялылығы

 

62. Қоғамдық кеңес халыққа:

1) өзінің азаматтық қоғаммен және мемлекеттік органдармен іс-қимыл жасау нәтижелері;

2) Қоғамдық кеңестің құрамы;

3) отырыстардың күн тәртібі;

4) қабылданған шешімдер;

5) қоғамдық маңызы бар басқа да мәселелер туралы хабар береді.

63. Ақпарат бұқаралық ақпарат құралдарында жарияланады және (немесе) тиісті интернет-ресурстарда орналастырылады.

 

12-тарау. Қоғамдық кеңес мүшелерінің өкілеттіктерін тоқтату

 

64. Қоғамдық кеңестің мүшесі жазбаша түрде өтініш беру арқылы өз аудануы бойынша оның құрамынан шыға алады.
65. Қоғамдық кеңестің мүшесі денсаулық жағдайына байланысты оның жұмысына қатысуға мүмкіндігі болмаған жағдайда не мынадай негіздер бойынша:

1) ол қайтыс болған жағдайда;

2) сот хабарсыз кетті деп танығанда;

3) сот қайтыс болды деп жариялағанда;

4) сот Қазақстан Республикасының заңдарында белгіленген тәртіппен әрекетке қабілетсіз немесе әрекет қабілеті шектеулі деп танығанда;

5) Қоғамдық кеңестің отырыстарына дәлелсіз себептермен бір жыл ішінде үш реттен артық қатыспағанда;

6) Қоғамдық кеңестің азаматтық қоғамнан сайланған мүшесі мемлекеттік қызметке кіргенде;

7) Қоғамдық кеңеске өкілі сайланған коммерциялық емес ұйым таратылған жағдайда;

8) Заңның 10-бабының 1-тармағында көзделген негіздер басталған жағдайда, Қоғамдық кеңестің шешімімен оның құрамынан мерзімінен бұрын шығарылуы мүмкін.

 

13-тарау. Шығып қалған Қоғамдық кеңес мүшесінің орнына қосымша конкурс өткізу тәртібі

 

66. Мемлекеттік органнан өкілдік ететін Қоғамдық кеңес мүшесінің өкілеттіктері тоқтатылған кезде Қоғамдық кеңестің өкілеттіктерін тоқтатқан мүшесінің орнына жаңа мүшесін қосу туралы шешімді Ұйғыр ауданы мәслихатының төрағасы қабылдайды.
67. Азаматтық қоғам өкілдігінен сайланған Қоғамдық кеңес мүшесінің өкілеттігі тоқтатылған кезде жаңа мүшені іріктеу резервтік тізімнен жүзеге асырылады.

Қоғамдық кеңес резервтік тізімнен Қоғамдық кеңестің құрамына алынған жаңа мүшелерді Ұйғыр ауданы мәслихатының төрағасы бекітеді және бұқаралық ақпарат құралдарында жариялануға және (немесе) Ұйғыр ауданы мәслихатының интернет-ресурсында орналастырылуға жатады.

68. Жұмыс тобы қалыптастырған резервтік тізіміндегі кандидат Қоғамдық кеңеске мүше болудан бас тартқан және Қоғамдық кеңеске кандидаттардың резервтік тізімінде басқа кандидаттар болмаған жағдайда, сондай-ақ резервтік тізім болмаған жағдайда Қоғамдық кеңес Қоғамдық кеңестің құрамына қосымша конкурс өткізу туралы шешім қабылдайды.
69. Қоғамдық кеңес қосымша конкурс өткізу үшін Қоғамдық кеңес мүшелерін сайлау жөніндегі конкурс туралы хабарландыруды бұқаралық ақпарат құралдарында жариялайды және (немесе) Ұйғыр ауданы мәслихатының интернет-ресурсында орналастырады.
70. Хабарландыруда:

1) Ұйғыр ауданы мәслихатының атауы;

2) құжаттар жіберілетін пошта және электрондық мекенжайлары, конкурсқа қатысу үшін құжаттарды беру мерзімі, олардың тізбесі және Заңның 10-бабының 1 және 2-тармақтарына сәйкес кандидаттарға қойылатын талаптар;

3) мемлекеттік органдардың мен коммерциялық емес ұйымдардың, азаматтардың қатарынан Қоғамдық кеңестің сандық құрамы көрсетіледі.

71. Қосымша конкурсқа қатысуға ниет білдірген азаматтар, коммерциялық емес ұйымдардың өкілдері Қоғамдық кеңес мүшелерін іріктеу жөнінде қосымша конкурс өткізу туралы хабарландыру жарияланған күннен кейін он жұмыс күні ішінде хабарландыруда көрсетілген мынадай құжаттарды қолма-қол береді немесе Ұйғыр ауданы мәслихатының электрондық мекенжайына:

1) кандидатураны Қоғамдық кеңестің құрамына ұсыну туралы коммерциялық емес ұйымның жазбаша ұсынысын және (немесе) азаматтың өтінішін;

2) өмірбаян деректері көрсетіле отырып, кандидаттың кәсіптік және (немесе) қоғамдық қызметі туралы мәліметтер;

3) сотталғандығының болуы не болмауы туралы анықтама;

4) психикалық, мінез-құлықтық, оның ішінде психикаға белсенді әсер ететін заттарды тұтынуға байланысты бұзылушылықтардың (аурулардың) болуы не болмауы туралы анықтама;

5) кандидаттың дербес деректерін жинауға, өңдеуге, таратуға және жариялауға келісімді жібереді.

Қоғамдық кеңес мүшелігіне кандидат осы тармақтың бірінші бөлігінің 3) және 4) тармақшаларында көзделген анықтамаларды өз бетінше немесе Ұйғыр ауданы мәслихатының көрсетілген анықтамаларды ақпараттық жүйелерден талап етіп алдыруына жазбаша келісуі арқылы ұсынады.

72. 72. Қоғамдық кеңес құжаттарды қабылдау аяқталған күннен кейін бес жұмыс күні ішінде отырыста Қоғамдық кеңес мүшелігіне кандидаттар бойынша келіп түскен құжаттарды талқылауды және осы Үлгілік ереженің 29-тармағына сәйкес әңгімелесу рәсімін жүргізеді.

Әңгімелесу аяқталғаннан кейін Қоғамдық кеңес мүшелері әрбір кандидат бойынша ашық дауыс береді.

Ең көп дауыс жинаған кандидаттар Қоғамдық кеңестің құрамына сайланған болып есептеледі.

Бірдей дауыс санын жинаған кандидаттар бойынша Қоғамдық кеңестің төрағасы шешуші дауыс беру құқығын өзіне қалдырады.

Қоғамдық кеңес құрамына қосымша конкурс қорытындысымен сайланған кандидаттарды Ұйғыр ауданы мәслихатының төрағасы бекітеді және бұқаралық ақпарат құралдарында жариялануға және (немесе) Ұйғыр ауданы мәслихатының интернет-ресурсында орналастырылуға жатады.

73. 73. Қоғамдық кеңестің жаңа мүшелері өкілеттіктерін тоқтатқан Қоғамдық кеңес мүшелері өкілеттіктерінің қалған мерзіміне сайланады (тағайындалады).

 

14-тарау. Қоғамдық кеңес туралы ережені бекіту тәртібі

74. Қоғамдық кеңестің бірінші отырысында Қоғамдық кеңесті қалыптастыру мәселелері жөніндегі жұмыс тобы әзірлеген Қоғамдық кеңес туралы ереженің жобасы талқылауға шығарылады.
75. Қоғамдық кеңес туралы ереженің жобасын қарау нәтижелері бойынша келісу туралы шешім көпшілік дауыспен қабылданады және Қоғамдық кеңес отырысының қорытынды хаттамасында көрсетіледі, оған Қоғамдық кеңестің төрағасы қол қояды.
76. Ұсынылған Қоғамдық кеңес туралы ереже жобасымен келіспеушіліктер болған жағдайда, нормативтік құқықтық актінің жобасы Қоғамдық кеңес мүшелерінің ұсыныстары ескеріле отырып, пысықталады және қайта талқылауға жіберіледі.
77. Қоғамдық кеңес туралы ереженің жобасын әзірлеу кезінде Қоғамдық кеңес мүшелері және (немесе) жұмыс тобының мүшелері Үлгілік ереженің ережелерін басшылыққа алады.

 

15 тарау. Қоғамдық кеңес мүшелерінің мінез-құлқының этикалық нормалары

78. Қоғамдық кеңес мүшелері өз қызметінде мынадай этикалық нормаларды сақтай отырып, қоғамдық сенім мен Қоғамдық кеңестің және оның мүшелерінің қызметіне құрметпен қарауға ықпал етуге тиіс:
79. Қоғамдық кеңестің мүшесі Қоғамдық кеңестің ресми ақпараты болып табылатын мәселелер бойынша оларға қатысты ресми шешім қабылданған кезден бастап, Қоғамдық кеңес атынан бұқаралық ақпарат құралдарында өз пікірін ашық білдірмеуі керек;
80. Жалпы Қоғамдық Кеңестің емес, көпшілік алдында жеке пікірін білдіруге құқылы;
81. Қоғамдық кеңестегі әріптестердің пікірлері мен шешімдерін құрметтеуге;
82. Азаматтардың ар-намысы мен қадір-қасиетін, сондай-ақ Заңға сәйкес, қоғамдық бақылау объектілеріне айналған заңды тұлғалардың іскерлік беделін құрметтеуге.

 

16-тарау. Қоғамдық кеңестің қызметін тоқтату

 

83. Қоғамдық кеңес туралы Заңның 9-бабы 8-тармағының екінші бөлігінде көзделген өкілеттіктер мерзімі өткеннен кейін немесе Ұйғыр ауданының мәслихаты таратылған жағдайда өз қызметін тоқтатады.
84. Қоғамдық кеңес Ұйғыр ауданының мәслихаты қайта ұйымдастырылған жағдайда, қайта ұйымдастырылған мемлекеттік органның Қоғамдық кеңесінің жаңа құрамы бекітілгенге дейін өз қызметін жалғастырады.
85. Қайта ұйымдастыру нәтижесінде құрылған мемлекеттік органдарда Қоғамдық кеңесті қалыптастыру Заңға сәйкес жүзеге асырылады.

 

17-тарау. Өтпелі және қорытынды ережелер

 

86. Осы Ереже жергілікті қоғамдастық жиналысын қалыптастыру тәртібіне қолданылмайды, ол Қазақстан Республикасының жергілікті мемлекеттік басқару және өзін-өзі басқару туралы заңнамасымен регламенттеледі.
87. Жергілікті қоғамдастық жиналысы Қоғамдық кеңестің функцияларын Қазақстан Республикасының «Қазақстан Республикасындағы жергілікті мемлекеттік басқару және өзін-өзі басқару туралы» Заңымен және Қазақстан Республикасының «Қоғамдық кеңестер туралы» Заңмен белгіленген өкілеттіктерге сәйкес жүзеге асырады.

 

Дата публикации

24 апреля 2025