Рақышев Мағауя

Мағауя Рақышев стахановшылардың, көмір өнеркәсіп озаттарының бірі болып қарағандылықтардың мәңгі естерінде қалды. Ол 1931 жылы, отыз алты жасқа толғанда, Қарағанды шахталарына келді. Оның сол кездегі өмірлік тәжірибесі өте бай еді. Он бір жасында ол Құржымбаев байдың бақташысы болып істеді. Одан кейін Екібастұз көмір кендерінде забойшы мамандығын игерді. 1929-30 жылдарында ол - Қазақ темір жолының жұмыскері.
Қарағандыда оның еңбекшілдігін, адамдарды ұйымдастыру қабілеттілігін байқап, Киров атындағы шахта забойшыларының бригадирі болып тағайындайды. Ұлы Отан соғысы жылдарында ол - навал соққыштардың бригадирі, №3-бис шахтасының кен шебері. М. Рақышевтің тылдағы еңбек ерлігі туралы сол кездегі «Социалистік Қазақстан» облыстық газеті көп жазған. Соғыс жылдарынан кейін де ол кен жұмысымен 1956 жылға дейін қоштаспады.
Мағауя Рақышев Ленин, Еңбек Қызыл Ту ордендерімен марапатталған, оған «Құрметті шахтер» атағы берілген.
Қалалық көмір өнеркәсібін дамытуда сіңірген үлкен еңбегі үшін, бассейн шахталарында еңбектің жоғары өнімділігі үшін, лайықты шахтерлер кезегін тәрбиелегені үшін 1967 жылдың 26 қазанында «Қарағанды қаласының Құрметті азаматы» атағы берілді.
Атақ берілген күні: 1967 жылы 26 қазан