Мұхаметжанов Қамалтин Ескендірүлы

Шығыс-Қазақстан облысы, Большенарым ауданының Нұғманов селосында 1948 жылы 20 қыркүйекте туды.
1976 жылы Өскемен қаласының кұрылыс-жол институтын бітіріп, автомобиль көлігі мамандығы бойынша инженер-механик мамандығын игерді. 1995 жылы РФ Президентінің жанындағы Россия мемлекеттік қызмет академиясынан менедж­мент мамандығына ие болды, экономика ғылымының кандидаты.
Еңбек жолын 1970 жылы Зырьян қорғасын комбинатында слесарьлықтан бастады. Институтты бітіргеннен кейін Теміртау қаласының авиакәсіпорындарында еңбек етті, Қарағанды металлургия комбинатында бас директордың орынбасары болды. Теміртау қалалық әкімшілігінің әкімі, Қарағанды облыстық әкімшілігі әкімінің орынбасары — мемлекеттік мүлік жөніндегі аумақтық комитеттің төрағасы, Көкшетау қаласының әкімі, Қарағанды облысы әкімінің орынбасары болды.
1999 жылы Қазақстан Республикасы Президентінің Жарлығымен Қарағанды облысының әкімі болып тағайындалды.
Қазақстан Республикасы Президентінің стратегиясына сәйкес Қарағанды қаласындағы әлеуметтік-экономикалық реформаны жүргізу ісіндегі ерекше қызметі, білім беру, мәдениет, спорт, инфрақұрылымдар және қала тұрғындарын әлеуметтік қорғауды жақсартудың жаңа объектілер құрылыстарына елеулі еңбек сіңіргені үшін 2001 жылдың 5 желтоқсанында «Қарағанды қаласының Құрметті азаматы» атағы берілді.
Атақ берілген күні: 2001 жылы 5 желтоқсан