Қарсыбекова Күлімжан Рахымжанқызы

1919 жылы малшының отбасында дүниеге келді. 1937-1938 жылдары Алматы қала-сындағы медицина институтының жұмысшылар факультетінде білім алды.
1938-1942 жылдары медици­на институтында оқыды. Ұлы Отан соғысы жылдары Яро­славль, Ленинград, Новгород облыстарының, сонымен қатар Польша, Австрия, Венгрия госпитальдарында жұмыс істеді. 1946 жылдан бастап Алматы қаласының Аймақтық патология институтында қызмет етті. 1955 жылы кандидаттық диссертациясын қорғағаннан кейін Қарағандыға көшіп келіп, осы уақытқа дейін тұрады. 1955-1985 жылдар аралығында Қарағанды мемлекеттік медицина институтында еңбек етті. Ғылыми зерттеулері басылып шыққан 35 ғылыми еңбегінде көрініс тапты. 1987-1995 жылдары Ұлы Отан соғысына қатысушылар мен мүгедектерді емдеу орталығында жұмыс жасады. Қарағанды қаласының халық депутаттары аудандық және қалалық Кеңесінің депутаттығына сайланды.
Ленин, 2 дәрежелі Отан соғысы, Қызыл Жұлдыз ордендерімен, сонымен қатар басқа да мемлекеттердің 11 медалімен марапатталды.
Ұлы Отан соғысы жылдарындағы Отан алдындағы елеулі қызметі және жастарды әскери патриоттық тәрбиелеудегі жемісті еңбегі мен қаланың қоғамдық өміріне белсене қатысқаны үшін 1979 жылы «Қарағанды қаласының Құрметті азаматы» атағы берілді.
Атақ берілген күні: 1979 жылы 22 ақпан